Itan 24 - Edo Bible (E Baibol Ẹdo) Version 1996

— 19 —

¹ Ghẹ gbe ọ ma kan uwa ne emwa dan, ghẹ vbe gu iran ru ọse.

² Iro ne iran zẹ ma gberra ne a gha si ẹti khian, ẹghẹikẹghẹ ne iran a rhirhi ya rhan unu iran, ọ ghi zẹ ẹbe ne emwa ọvbehe eso.

— 20 —

³ Ẹyotọ ọghe ẹwaẹn kevbe irẹnmwi ọ re a bọ owa yan.

⁴ Ehe ne irẹnmwi ye, emwi ighobioye ne mose ọ re a ya te avbe ughugha ni rrọọ.

— 21 —

⁵ A waan ọ re ọ maa sẹ a wegbe, vbe ne ẹmwata, irẹnmwi ọ re ọ ru emwi kpataki sẹẹ ẹtin.

⁶ Agbọn hia rẹnrẹn wẹ, te a ka mwamwa ẹẹn nẹ, a kevbe ya khọn okuo, vbe ne a ya bu ruẹ ude esi, ọ re a vbe ya rhie aro yọ wẹ, u gha khọn miotọ.

— 22 —

⁷ Ẹmwẹ ẹwaẹn dinmwi gbe ne ọzuọ gha sẹtin rẹn otọ ẹre. Ẹ i miẹn ẹmwẹ okpa ta vbe a gha guan yan emwi kpataki.

— 23 —

⁸ Adeghẹ ọkhọ ọ re u mwamwa vbe ẹghẹ hia, agbọn ghi do rẹn ruẹn ye ọmwa ne ọ si ẹti khian.

⁹ Emwi ne akpa a rhirhi zẹ iro ẹre rre, orukhọ nọ. Emwa hia ọ re ọ khu iwu ọmwa ne ọ zan emwa ọvbehe vbe ẹghẹ hia.

— 24 —

¹⁰ U gha ye gha vburriẹ vbe ẹghẹ asobọyegbe, evburriẹ ne evburriẹ ọ re u gele wa khin.

— 25 —

¹¹ Ghẹ siobọ vbe iwinna ọghe ne a fan ọmwa ne a bu ohiẹn eku uwu gbe ne a ra gbe ua yotọ.

¹² U sẹtin kha wẹ ọ ma kan ruẹn, sokpan Osanobua rẹnrẹn, ọ vbe ghe ekhọe ruẹ. Ọ wa rhie aro lele uẹ, ọ rẹnrẹn, ọ gha vbe ha ẹre nuẹn zẹ vbene u vbe ru.

— 26 —

¹³ Ovbi mwẹ, gha rri owọn ighe ọ maa. U ghi rẹn wẹ zẹ vbene owọn ne a min ke ipapa owọn rre maa,

¹⁴ erriọ ọ re ẹwaẹn vbe maa ne orhiọn. Gie ẹwaẹn gha guẹ, agbọn gha ma ruẹn.

— 27 —

¹⁵ Ghẹ yevbe ọmwa dan, ne ọ mwamwa vbene irẹn gha ya rha ọmwa ne ọ yin ẹse hẹ, ra vbe ne ọ gha mu ẹre owa hẹ.

¹⁶ Inugba ne ọ khọnrẹn wẹ ne ọmwa ne ọ yin ẹse de, te ọ gha ye kpaegbe; sokpan, ọkhọ ọ re ọ fuẹn ọmwa dan an.

— 28 —

¹⁷ Ghẹ gha ghọghọ vbe emwi dan a rruan oghian an; ọ gha de, ghẹ vbe ghọghọ ua.

¹⁸ E Nọyaẹnmwa gha rẹn adeghẹ te u giẹ ọe, ẹ i ra yẹ ọre. U gha ghe, ẹ i ra vbe rri ọre oya.

— 29 —

¹⁹ Ghẹ gie emwa dan rueghe uẹ orhiọn, ghẹ vbe gbe ọma kan an ne iran.

²⁰ Umamwẹ i rrọ ne ọmwa dan, emwi ne ọ vbe rhie aro yi i rrọ.

— 30 —

²¹ Gha ya ọghọ ne Nọyaẹnmwa, ovbi mwẹ, vbe gha da ne ọba. Ghẹ gu avbe emwa ni sọtẹ iran muobọ. Egbe emwa vberriọ sẹtin wa fuan vbe udomwurri.

²² U he roro ẹe ghe ẹdẹ vbene ọ kpọlọ sẹhẹ ighe emwi ne ọba ra Osanobua sẹtin wẹ ne ọ rruan ọmwa.

Avbe Ẹmwẹ Ẹwaẹn Ba Ẹre

²³ Avbe emwa ẹwaẹn ọ re ọ vbe guan avbe ẹmwẹ na. Emwi ne ọ ma gba nọ ne ọmwa ne ọbuohiẹn ka gha mwẹ ẹmwẹ nii vbe ekhọe nẹ.

²⁴ Ọ gha ya bu ase ne ọmwa ne ọ rria abe, te agbọn hia ra gha kọọ ne ẹẹn khin, a ghi vbe gha mu ohu ẹre.

²⁵ Emwa ni buohiẹn ni rri emwa ni rri abe oya, agbọn gha ma iran, a ghi vbe gha ta ẹmwẹ iran ne ọ maa.

²⁶ Ewanniẹn ne ọ ta vbene emwi wa ye zẹẹ ma ọmwa, a rhie ma ọghe ọse ẹmwata a gba khin ọ re nọ.

²⁷ Ghẹ bọ owa ruẹ ne u zọ urho ladian, vbe ẹ i re te ugbo ruẹ de mudia nẹ, aro ruẹ na vbe da ẹe ighe u gha sẹtin gha miẹn evbare unu.

²⁸ Ghẹ sẹ osẹe gbe ọmwaikọmwa vbe ne ẹ i na mwẹ otọ esi; ra ne u ya ta ẹmwẹ ne ẹ i gia miẹn otọ ẹmwẹ vbe ekpa ẹre.

²⁹ Ghẹ kha wẹẹ, “I gha ru ẹe vbe ne ọ ru mwẹ ra ma gha ghae ẹre umwọmwẹ!”

³⁰ I la ugbo kevbe ogba azara ọghe ọmwa oroho ne akpa gberra.

³¹ Akọsọ ọ re ọ gba ẹre, irunmwu kevbe mu ẹẹn. Ekẹn okuta ne a gbe lẹga ẹre de guọghọ ua nẹ.

³² I ghe ẹre, I roro ẹe, I keghi miẹn emwi eso ruẹ vbọ.

³³ Gha khian, ya ye ovbe ba aro, gha khian ne u ya vbiẹ, kie obọ ruẹ rre ne u hẹwẹ kherhe.

³⁴ Sokpan, u gha vbiẹ nii, ogue ghi de kun ruẹn guẹ gbinna zẹ vbe ikpata oyi.