Itan 22 - Edo Bible (E Baibol Ẹdo) Version 1996

¹ A gha we ne u zẹ okpa vbọ, eni esi ra ẹfe, zẹ eni esi.

² Emwi ne ọdafẹn kevbe ovbiogue ma mwẹ sẹ egbe ọrọre wẹ e Nọyaẹnmwa ọ re ọ yii iran eveva.

³ Emwa ni wan gha miẹn wẹ orueghe dee, iran ghi rhie uhunmwu iran lẹre, sokpan, ọmwa ne ẹ i ro iro ghi wa ya owẹ khian larọ, ọ ghi ya gha gbe ima rẹn vbe okiekie.

⁴ Gha ya ọghọ ne Nọyaẹnmwa, gha mu egbe rri otọ, u gha miẹn ẹfe, uyi, kevbe utọmwẹ.

⁵ Adeghẹ u ho ẹmwẹ ẹdagbọn ruẹn, biegbe ne ifi ne ọ mu ọmwa dan vbe odẹ.

⁶ Ma ọmọ vbene ọ gha yin hẹ, te ọ gha ye ẹre rre ọ te ya wu.

⁷ Avbe ivbiogue ọrọre eviẹn enife. Mọmọ igho, ọviẹn ọmwa ne u mọmọ ẹre igho ọre u khian.

⁸ U gha gbọ inian a i ta ẹmwata, ọfuan ọ re ọ ra yuo ladian vbọ, ufomwẹ ọghe ne u na zẹ emwa kpokpo ghi rrie.

⁹ Gha zẹ emwi obọ ne u vbe ghae ne avbe ivbiogue vbe evbare ruẹ. Te a ra fiangbe ue yọ.

¹⁰ Wa yuo ọmwa ne ọ ya obọ rra ẹwẹe ọre fua vbe imuan ẹmwẹ, ẹzọ, kevbe ovan ne a tie egbe re ghi fo vbe otọ.

¹¹ Adeghẹ u ho ẹmwẹ ekhọe ne ọ hianrẹn kevbe ẹmwẹ nekhuẹrhẹ, ọba gha do gha re ọse ruẹ.

¹² Ne a miẹn otọ na gba ogba ga ẹmwata, ọ re Nọyaẹnmwa na gie a gha miẹn otọ ẹmwẹ ohoghe.

¹³ Ọmwa oroho ghi tota ye owa, ọ wẹ ughaghe oduma gha mu irẹn deghẹ rẹn ladian vbe owa.

¹⁴ Ifi ọ re ọghe khin, emwa ne ohu ẹre mu e Nọyaẹnmwa ọ re ọ mu.

¹⁵ Obọ ibiẹka ọ re a na miẹn uyinmwẹ iruẹn kevbe ukọnmwẹ, sokpan, ubi ne a dan ọmọ re vbe ikebe, gha ma iran vbene ọ kere ne a gha ru emwi hẹ.

¹⁶ Adeghẹ u ha oko gie iran ni fe nẹ, ra te u zẹ ivbiogue kpokpo ne u ya họn ẹfe ruẹ, te uwẹ tobọ ruẹ ra do khian ovbiogue.

Ẹmwẹ Ẹwaẹn Ọgban

¹⁷ Danmwehọ mwẹ, I gha ma ruẹn avbe ẹmwẹ eso ne avbe umẹwaẹn tae. U ghi ruẹ emwi ne iran ma ọmwa re.

¹⁸ Ẹko gha vbe rhiẹnrhiẹn uẹn adeghẹ u ye iran rre u na vbe guara gha ya iran kpa itan.

¹⁹ I ho ne u mu ẹtin yan e Nọyaẹnmwa, ọnii ọ re ọ si ẹe ne I ra na ma ruẹn re nian.

²⁰ Itan ọgban ọ re I gbẹnnẹ yotọ ne uẹn na. Irẹnmwi kevbe ude esi ọre iran khin,

²¹ Ọ gha vbe ma ruẹn emwi ne ọre ẹmwata ne ọ rrọ. Ẹghẹ nii, ọ ghẹ ghi giọ wẹ ne u ya gualọ otọ ẹre ladian, u ghi miẹn ewanniẹn ẹmwata ne ọ rrọ rhie rre.

— 1 —

²² Ghẹ balaro mu ovbiogue rhunmwuda ighe obọ ruẹ gba ẹre, ghẹ balaro mu e ne ẹ i miẹn emwi ru vbe iko.

²³ E Nọyaẹnmwa ọ re ọ ra gui ẹzọ iran ne iran, ọ ghi niẹn obọ ye iran aro ighe avbe emwa ni vbe niẹn obọ ye iran aro.

— 2 —

²⁴ Ghẹ gu emwa ne egbe balọ gbagbagba ru ẹse.

²⁵ U sẹtin wa vbe guẹ emwi ne iran guẹe vbe ne ẹ i na gie uẹ fiwerriẹ.

— 3 —

²⁶ Ghẹ yan ighe u gha mu osa ẹrrẹe hae.

²⁷ Adeghẹ u ma sẹtin ha ẹre, te iran ra do mu ukpo ne u lovbiẹ yi.

— 4 —

²⁸ Ghẹ vbọ ikhinmwi uwu ne avbe enikaro gbọre.

— 5 —

²⁹ Ma mwẹ ọmwa ne ọ winna iwinna rẹn ẹse, I gha vbe ma ruẹn ọmwa ne ọ maa sẹẹ emwa nibun kevbe ọmwa ne ọ sẹe ne ọ gha gu ọba tota.