Itan 21 - Edo Bible (E Baibol Ẹdo) Version 1996

¹ Vbene ẹ i lọghọ e Nọyaẹnmwa vbe ọ gha ta ehe ne ẹzẹ gha lẹ la, erriọ ẹre ẹ i vbe lọghọ vbe ọ a gha dia ekhọe ọba ye odẹ.

² U sẹtin gha ro wẹ emwi ne u ru hia ọ re ọ wa gba, sokpan ye rre wẹ iro ne u zẹ u ke ya ru emwi ọ re Nọyaẹnmwa ghe.

³ Ru emwi ne ọ kere kevbe ne ọ hẹnhẹn, ọnii ọ re ọ yẹ Nọyaẹnmwa sẹẹ ese ne a zọ ghe ẹre.

⁴ Emwa dan; a ma he miẹn egbe mwẹ ẹdẹ, kevbe itengbemu, ọ re ọ ye iran ru emwi. Orukhọ ọ re ena khin.

⁵ Mwamwa emwi ẹse, u gha mwẹ emwi ẹsẹse, u gha ye oguegue ru emwi, u i mwẹ sẹ ẹdẹ.

⁶ Ẹfe ne u ya uyinmwẹ ogberhu miẹn, te ọ rherhe zagha, sokpan, ọ te zagha, ọ ghi ka siọ sẹ agbanmwẹ idin nẹ.

⁷ Emwa dan i ibalegbe ọ re ọ gbe iran uhunmwu, iran he ne iran ru emwi ne ọ kere.

⁸ Odẹ ne ọ gọe ọ re emwa ni rri abe la, emwa ni ma rri abe ghi gha ru vbene ọ kere.

⁹ A wa ya di ẹrhunrhun owa ya ọ re ọ maa sẹ ne a gha gu okhuo ne ọ vian rre owa ọkpa.

¹⁰ Ohanmwẹ emwi dan ne a ru ọ re ọ gbe emwa dan vbe ẹghẹ hia; iran i tohan ọmwa rhọkpa.

¹¹ A gha rri ọmwa ne ọ wa ghe ẹwẹe ọre ọkpa oya, uhin ighe ọmwa ne ẹ i ro iro ghi vbe ruẹ emwi vbọ. Ọmwa ne ọ wan, emwi ne a ma ẹre re, ọ re ọ ya ruẹ emwi.

¹² Osanobua ne ọmwa ẹmwata, rẹn emwi ne ọ khian vbe uwu owa ọmwa dan, te ọ ra rhia ọmwa dan ẹdagbọn uan.

¹³ U gha wẹ u i danmwehọ utumwẹ ovbiogue, a i vbe danmwehọ ruẹ vbe uwẹ a gha tu nọ iyobọ.

¹⁴ Deghẹ ọmwa okpa mu ohu ruẹ, u ghi la ẹkhokho ha oko gie ẹe, ọ gha fu ẹre ekhọe rre.

¹⁵ A gha bu ohiẹn ẹmwata, ẹko ghi gha rhiẹnrhiẹn emwa esi, sokpan ọ ghi wa ye egbe wọ emwa dan.

¹⁶ Uwu diakhẹ ọmwaikọmwa ne ọ bibi odẹ lahin ẹwaẹn esi rre.

¹⁷ U gha re ọmwa ne ọ guẹ emwi aghanghan ne a lo, ayọn ne a da, kevbe evbare obọ i sotọ uwawa, u i fe ẹdẹ.

¹⁸ Ọlọghọmwa ne emwa dan wẹ iran ra si ye emwa esi egbe, uhunmwu iran ọre ọ de yi.

¹⁹ A wa gha rre otọ ẹgbo ọ re ọ fu egbe sẹ ne a gu okhuo ne ọ vian ke nọ ọ gui ẹzọ di owa ya.

²⁰ Avbe umẹwaẹn ghi gha rrọ vbe uwu ẹfe kevbe ọwọrhọwọrhọ, sokpan, avbe akpa, ẹgiẹgiẹ ọ re iran lo igho ne ọ la iran obọ.

²¹ Gha mwẹ itohan, ghẹ vbe gha ru ero, u gha wa tọ, emwa ọvbehe gha yọghọ nuẹn, iran ghi vbe gha ye obọ esi mu ẹẹn.

²² Ọkaokuo ne ọ ye ẹwaẹn agbe aro kotọ ru emwi, gha sẹtin khọn mu ẹvbo ne emwa ẹtin wan ga, ọ ghi vbe dunmwu ekẹn ne a gbe ga ẹre ne iran ya khẹ egbe ua.

²³ U gha ho ne u ghẹ miẹn orueghe, gha roro ẹmwẹ u te tae.

²⁴ Ma mwẹ ọmwa ne ọ ye obọ rra ẹwẹe ọre, I gha ma ruẹn ọmwa ne ọ tọn egbe mu, ne ọ hio kevbe ne ẹ i ro ne ọmwa.

²⁵ Ọmwa oroho ne ọ wẹ rẹn i winna, te ọ gbe egbe ẹre.

²⁶ Emwi ne ọ rhie ru i rrọ gberra ne ọ gha roro emwi ne ọ te ho ne irẹn gha mwẹ. Sokpan ọmwa ẹmwata wa sẹtin ru ẹse, ọ ghi vbe ru ẹre ne ọ la ọmwa aro.

²⁷ Te ọ sọnnọ e Nọyaẹnmwa vbe emwa dan a zọ ese ghe ẹre, katekate vbe a gha miẹn wẹ emwi dan ọ re ọ rre iran ekhọe ne ọ ye iran ru ẹe.

²⁸ Osẹe ọhọn ohoghe, a i ya ẹe yi, sokpan te a rhie ẹmwẹ ọmwa ne ọ roro ẹmwẹ sotọ nẹ.

²⁹ Emwa ẹmwata gba egbe iran, sokpan, emwa dan ghi gha ba rhie egbe mama ye ihe vbene ọ gie iran ru sẹ.

³⁰ Ẹwaẹn ọmwa nagbọn, aguẹmwẹ, a ghe umian emwi sotọ, ena rhọkpa imwẹ asa ne iran ye adeghẹ e Nọyaẹnmwa mu aro da ọmwa.

³¹ U sẹtin miẹn ẹsin viọ yotọ ne a ya yo igbinna, sokpan e Nọyaẹnmwa ọ re ọ rhie akhọnmiotọ ne ọmwa.