Itan 20 - Edo Bible (E Baibol Ẹdo) Version 1996

¹ U gha da ayọn gbe u ghi gha vannọ ọghe ọzuọ. Ukọnmwẹ wa nọ ne ọmwa da ayọn gbe egbe.

² Lẹ ne ọba ne ohu mu, zẹ vbene u gha lẹ ne oduma ne ọ tu utumwẹ ohanmwẹ. Ọmwa ne ọ ya ohu mu ẹẹn ọ re ọ gbe egbe ẹre.

³ Ọzuọ ikọzuọ sẹtin suẹn imuaẹmwẹ; uyinmwẹ enọrẹn enegbe ọrọre ne a ghẹ mwẹ obọ vbọ.

⁴ Ọwẹe ne evburriẹ ma gie ẹe gua ye ihe, ẹ i miẹn emwi rhọ.

⁵ Iro ne ọ rre ọmwa ẹko, te ọ yevbe amẹ ne ọ rre uhae ne ọ dinmwi, sokpan ọmwa ne ọ sẹtin ghe umian emwi gha sẹtin sa ẹe ladian.

⁶ Dọmwadẹ ọghọe ọ re ọ kha ighe ọmwa ne ọ ye ekhọe ga ne ọ gia mu ẹtin yan ọ re irẹn khin. Akpawẹ a gha gele miẹn ọmwa okpa ne ọ ye vberriọ nian.

⁷ Emọ ni mwẹ erha ne ọ ta ẹmwata kevbe ne uyinmwẹ ọnrẹn vbe gba, uhunmwu esiesi ọ re iran khin.

⁸ Ọba gha tota gha bu ohiẹn, ọ gha bẹghe emwi dan, te ọ wa rẹn ọnrẹn.

⁹ A gha gele miẹn ọmwa ne ọ gha sẹtin kha wẹ ekhọe irẹn i gu irẹn gui hiehiere kevbe wẹ rẹn wa khọnmiotọ nẹ vbe uhunmwu orukhọ irẹn hia.

¹⁰ E Nọyaẹnmwa i ho ẹmwẹ ọmwa ne ọ ye emwi omuru mwa emwi, ọghe ubunmwẹ ra ukhuamwẹ.

¹¹ Ọvbokhan sẹtin rhie egbe ọmwa ne irẹn khin ma vbekpa vbene ọ ru emwi hẹ, wẹ gha wa rẹn a dẹghe ọmwa esi ne ọ ta ẹmwata ọ re nọ.

¹² E Nọyaẹnmwa rhie aro ne ima nẹ ne a ya gha bẹghe, kevbe ehọ ne a ya gha họn ẹmwẹ.

¹³ U gha zẹdẹ vbiẹ, u gha khian ovbiogue. Gha winna vbe ẹghẹ hia, u gha miẹn evbare re ọwọrhọwọrhọ.

¹⁴ Ọmwa ne ọ dẹ emwi ghi gha gui wẹ emwi ghan gbe, sokpan, ọ ghi ke evba ladian ya gha rhuọ ighe a i ta vbene irẹn guara dẹ emwi hẹ ẹre.

¹⁵ U gha rẹn emwi ne u guan yan, emwi ne u mwẹ maa sẹẹ igoru ra ikpẹrọnmwọ.

¹⁶ Ọmwa ne ọ ghi kọn sẹrriọ ne ọ na kha ighe rẹn gha mu osa ọrriọvbe hae, te ọ kere ne a viọ ẹre emwi dayi vbe ọ te do ha ẹre.

¹⁷ Emwi ne u ye ẹki ogberhu miẹn, ọ sẹtin he gha rhiẹnrhiẹn zẹ vbe evbare ne ọ maa sẹẹ, sokpan, vbe ọ ma he kpee wan, ọ gha do yevbe uguobọ ekhae ne a kpolo ye uwu unu.

¹⁸ U gha miẹn ne ọ bu ruẹ ude esi, ọ gha dunna nuẹn; ghẹ wa khọn la uwu okuo vbene u i na ka mwamwaẹn nẹ.

¹⁹ Ọmwa ne ọ guẹ ewẹwẹwẹ ne a ta, ẹ i sẹtin rhie ẹmwẹ oro lẹre. Gha gban egbe ne emwa ni talọ gbe.

²⁰ U gha tie ihẹn ne avbe evbibiọ, te ẹdagbọn ruẹn ra wa fo zẹvbe ukpa ne ọ dọyọ vbe ebiebi.

²¹ Adeghẹ ọ ma lọghọ ọ u ke miẹn ẹfe ruẹ, ẹ i ra vbe mobọ maa nuẹn.

²² Ghẹ wa kha wẹ u ra ya rria ikhi ne egbe ruẹ. Mu ẹtin yan e Nọyaẹnmwa, ọ gha dọlọ ẹe yi.

²³ E Nọyaẹnmwa i ho ẹmwẹ emwa ni ya omwa omuru mwa emwi ọghe ubunmwẹ ra ukhuamwẹ.

²⁴ E Nọyaẹnmwa zẹ uviẹn edọmwadẹ ọghọe nẹ, vbe ọmwa okpa ghẹ ghi na rẹn hẹ ehe ne ẹdagbọn rẹn ye egbe rrie vbọ?

²⁵ Roro ẹe ẹsẹse u ke yan wẹ u gha ya emwi ha oko gie Osanobua. U sẹtin gbe I ma rẹn vbe okiekie.

²⁶ Te ọba ne ọ wan gualọ ọmwa ne ọ ru emwi dan ladian, ọ gha vbe rri ọre oya vbe ne itohan i na rrọọ.

²⁷ E Nọyaẹnmwa ọ re ọ rhie ekhọe kevbe iro ne ima; ma i sẹtin lẹre ne egbe mwa.

²⁸ Ọba gha ye gha rre asẹ la inu ẹghẹ ne asẹ ọre ya gha re ne ẹ i ru ero, ọghe ẹmwata, kevbe ne ọ ya obọ okpa mu emwa hia.

²⁹ Ma tian ẹtin igbama, a ghi vbe gha ya ọghọ ne edẹ ọmaẹn.

³⁰ Ugbẹnso, emwi ma kakabọ hie ima aro nẹ, ai sẹtin dọlọ uyinmwẹ yi.