Itan 19 - Edo Bible (E Baibol Ẹdo) Version 1996

¹ Ọmwa re ovbiogue ne adazẹ, ọ re ọ maa sẹẹ ne a gha re ọzuọ ne ọhọn ohoghe.

² Isasegbe ne irẹnmwi i ye ma kei, te ibalegbe si ẹmwẹ ye ọmwa egbe.

³ Uyinmwẹ ọzuọ ne emwa eso yin ọ re iran ya gbe egbe iran, vbe iyekọni, iran ghi gha kpe e Nọyaẹnmwa.

⁴ Emwa ni fe, ọse ọgbọn i vbe iran, sokpan ivbiogue i sẹtin da ibozẹghẹ ne iran mwẹ yi.

⁵ U gha ta ohoghe vbe iko, a gha rri uẹ oya, ẹ i mwẹ vbene a tae hẹ.

⁶ Emwa hia ọ re ọ ho ne iran gha re ọse okpọmwa, emwa hia ọ re ọ kha ighe ọse ọmwa ne ọ zẹ emwi obọ rẹn khin.

⁷ Uhin ighe etẹn ovbiogue i vbe ka ẹe ye ọmwa, ghe emwi ne ọ si ẹe ne ẹ i na mwẹ ọse. Vbene ọ khọn rẹn wẹ ne ọ ziga sẹ hẹ, ẹ i miẹn.

⁸ Ru iyobọ ne egbe ruẹ, vbene u gha na hia ne u ruẹ emwi hia ne u gha sẹtin ruẹ, u ghi vbe gha ye emwi ne u ruẹe rre, agbọn gha ma ruẹn.

⁹ Ọmwa ne ọ ta ohoghe vbe iko ẹzọ ne ọ gha le ọre fe irrọ, ọghọe fo nẹ.

¹⁰ Ọ ma kei ne avbe ọzuọ miẹn gha zẹ re zẹ kua, ọ ma vbe kei ne avbe eviẹn gha kha yan avbe ọdafẹn.

¹¹ U gha re ọmọ ne ọ wan, u gha ziengbe vbe ohu a gha mu ẹn. Ọmwa gha ruẹ emwi ne ọ ma kei, uyinmwẹ ọmẹguae nọ adeghẹ u yangbe ẹe.

¹² Te ohu ọba yevbe utumwẹ oduma, sokpan, ọ gha ru ọmwa ẹse, ọ ghi ye vbe amẹ ne a rhie aro ye odẹ khẹ ọ ke do rhọ.

¹³ Ọmọ dan sẹtin mu erha ẹe agbọn rhia. Okhuo ne ọ vian keghi yevbe amẹ ne ọ nọnọ taitai.

¹⁴ Ọmwa sẹtin miẹn ukhu owa kevbe igho re vbe obọ erha ẹe sokpan, e Nọyaẹnmwa okpa ọ re ọ rhie okhuo esi ne ọmwa.

¹⁵ Mu aro yọ ne u gha si oroho khian, gha vbiẹ, sokpan, ohanmwẹ gha fi ẹkun leluẹ.

¹⁶ Gha ya uhi Osanobua ru emwi, u gha tọ, u gha fi iyeke gbe iran, u gha wu.

¹⁷ U gha rhie emwi ne ovbiogue, te ọ ye vbe ne a rhie emwi ne Nọyaẹnmwa mọmọ; e Nọyaẹnmwa gha ha ẹre werriegbe nuẹn.

¹⁸ Ma ivbi uẹ emwi vbe iran ma he wan gbe ne ọ sẹtin ruẹ emwi guẹ. Adeghẹ u ma ru ẹe vberriọ, te u ru iyobọ ne iran ya fuẹn egbe iran an.

¹⁹ Adeghẹ egbe balọ ọmwa, wa giee ye egbe miẹn emwi ne a lae miẹn. U gha fan ẹn hin ọlọghọmwa rre uhukpa, u gha yevbe dọlegbe ru ẹe.

²⁰ Adeghẹ wẹ họn vbe a gha bu ruẹ ude, u na vbe mu ẹghẹ ne u ya ruẹ emwi, u gha he gha wan ẹdẹ ọkpa.

²¹ Emwa sẹtin mwamwa emwi gbe erhan gbe irri, sokpan, ne ọ yẹ e Nọyaẹnmwa ọ re a ra ru.

²² Ifaegbua nọ ne a gha zuan, ivbiogue ọ re ọ maa sẹ avbe ọhọn ohoghe.

²³ Gha ye ọghọ ne Nọyaẹnmwa, u gha tọ, ẹko gha vbe vuọn ọn, u ghi vbe gha rrọọ vbe a i mwẹ ẹbe.

²⁴ Emwa eso mitan sẹrriọ wẹ, iran i sẹtin fian evbare rhie ye unu.

²⁵ Ọ kere ne a rri ọmwa oya ye itengbemu, ne avbe iran ni ma vbe rẹn emwi gberra ọnii, sẹtin miẹn ọnii ya wan. Adeghẹ ọmọ ne ọ wan ọ re uwẹ khin, a gha guẹ gui, u ghi miẹn emwi ruẹ vbọ.

²⁶ Ọmwa ifaegbua ne ekhue i mu ọkpa, ọ re ọ gha ye obọ dan mu erha ne ọ biẹ ọe, ra ne ọ sua iye ẹe ladian vbe owa irẹn.

²⁷ Ovbi mwẹ, u gha dobọyi vbe emwi ne a ruẹ, u gha rherhe mianmian ne u te ka rẹn yi.

²⁸ Ai miẹn ẹmwata vbe ehe ne osẹe ne ọ gualọ emwi ne ọ gha ru ọmwa ẹre ye. Te ọkhọ wa rhiẹnrhiẹn emwa dan.

²⁹ Ọzuọ ne ọ ye obọ rra ẹwẹe, ẹ i mwẹ obọ ma rhanmwẹ ọẹn.