Itan 18 - Edo Bible (E Baibol Ẹdo) Version 1996

¹ Emwa ne ẹ i gu emwa ọvbehe ro, enegbe iran okpa ọ re iran rẹnrẹn; emwa hia gha rhe rẹn wẹ emwi ne ọ gbae nene emwi khin, iran ghi wẹ, ẹn o.

² Ọzuọ i zẹyọ deghẹ ọ rẹn otọ nene emwi ra ọ ma rẹn ọnrẹn, emwi ne irẹn ho ọrọre ne ọ rhie ma emwa hia wẹ okpia ne okpia rẹn khin.

³ Orukhọ kevbe efaa ọ re ọ gba khian. U gha mu ọghọ ne egbe uẹ fua nẹ, ozan ọ re u ghi ra rhie ye ihe ẹre.

⁴ Ẹmwẹ ne unu ọmwa, sẹtin gha re ehe ne ẹwaẹn ke rre, ne ọ dinmwi vbe okun, ne ọ furre zẹvbe amẹ ezẹ ne ọ lẹ.

⁵ Emwi ne ọ ma gba nọ ne a ya ma ọmwa ne ọ rriabe vbe ne a ma na rhie ase ne ne ọ rria ase.

⁶ Ọzuọ eso gha mu imuaẹmwẹ hẹn, ugbemwẹ ọ re ọ gualọ.

⁷ Ọzuọ gha guan, egbe ẹre ọ re ọ murhia; ifi ne ẹmwẹ ne unu ẹnrẹn khuẹn ghi mu ẹẹn.

⁸ Ewẹwẹwẹ rhiẹnrhiẹn gbe — u miẹn vbe ima ho ne a gha rhie ẹre mi re hẹ!

⁹ Ọmwa oroho kevbe ọka ẹrhia, okpa ọ re iran eveva khin.

¹⁰ Te Nọyaẹnmwa ye vbe owa ọkhẹ ne ọ wegbe, ehe ne emwa esi gha lẹ fi, iran ghi vbe miẹn uhunmwu.

¹¹ Sokpan emwa ni fe ghi gha mwẹ ọnrẹn vbe ekhọe wẹ te ẹfe iran degue iran zẹvbe ekẹn ne ọ wegbe ne a gbe lẹga okpẹvbo.

¹² A i yọghọ ne ọmwa adeghẹ ẹ i mu egbe rriotọ; emwa ni tengbemu, odẹ ọfuan ọre iran gbẹn khian.

¹³ Gha danmwehọ ẹmwẹ nẹ, u kegha rhie ewanniẹn yọ, adeghẹ ẹ i re vberriọ, te u ru emwi ọzuọ ne ọ vbe yagha ọmwa.

¹⁴ Ekhọe ruẹ gha rrọ wẹ u ho ne u fe, ọnii sẹtin yevbe eda nuẹn vbe ẹghẹ emianmwẹ, sokpan, ọnii gha lahin rre, idaehọ ruẹ ne okiekie ọ re ọ fo nii.

¹⁵ Ọ rre ekhọe avbe umẹwaẹn, iran vbe mu egbe ne iran ruẹ emwi vbe ẹghẹ hia.

¹⁶ A dẹghe u ho ne u miẹn ọmwa kpataki aro, ya emwi ha oko giẹe, ẹ i ra zẹdẹ lọghuẹ hiehiere.

¹⁷ Ọmwa ne ọ ka gui vbe iko, ọ ghi yevbe ne a miẹn wẹ rẹn ọ re ọ rria ase, ọmwa ne iran gba gui ke nọ rẹn ọta.

¹⁸ Erhanigberhan eva gha vbe egbe vbe iko ẹzọ, uta ne a yan ọ re a ra sẹtin ya ta ọfo yọ.

¹⁹ Ru iyobọ ne ọtuẹn nokpia, te ọ ra gha degue ruẹ zẹ vbe ekẹn ne ọ wegbe ne a gbe lẹga okpẹvbo; u gha guẹe ru ẹmwẹ, te ọ ra khui urho ẹre ke uẹ ye ore.

²⁰ Mu egbe ne u ya ye egbe miẹn emwi ne ọ la ẹmwẹ ne u ye unu ruẹn ta ladian.

²¹ Ẹmwẹ ne u tae sẹtin sinmwi ọmwa, ọ vbe sẹtin gbe ọmwa, rhunmwuda ọnii, u ghi mu egbe ne u ye egbe miẹn emwi ne ẹmwẹ ne unu ruẹn si rre.

²² Gualọ okhuo rhie, emwi esi ọ re u miẹn rhie; ọ rhie ma wẹ Nọyaẹnmwa wa ru uwẹ ẹse.

²³ Ovbiogue gha guan, ọ ghi gha ta ẹre ọghe ọghọ, sokpan, ọmwa ne ọ fe gha rhie ewanniẹn yọ, ọ ghi gha re ọghe izevbudu.

²⁴ Iku eso i tọ, sokpan avbe ọse eso rrọ ni maa sẹ etẹn.