Itan 17 - Edo Bible (E Baibol Ẹdo) Version 1996

¹ A rri ebrẹd ne ọ kakae nẹ vbe uwu ẹre, ọ re ọ fu egbe sẹ ne a ya rri evbare eghọ vbe owa ne ẹmwẹ ye.

² Ọguọmwadia ne aro sẹ ọre otọ, ọ re ọ ra gha kha yan ọmọ oya ne arowa ẹre hiẹe, ọ gha vbe sẹ ọ re obọ vbe ukhu ẹre.

³ Erhẹn ọ re a ya danmwẹ igoru kevbe esiliva ghe, sokpan, e Nọyaẹnmwa ọ re ọ ghe ekhọe ọmwa ghe.

⁴ Emwa dan ghi gha danmwehọ emwa dan, avbe ọhọn ohoghe ghi vbe gha danmwehọ ohoghe.

⁵ U gha ya ivbiogue gbe ogiẹ, te u zan Osanobua ne ọ yi iran. A gha rri uwẹ oya adeghẹ te uwẹ ghọghọ ye emwi ne ọ rruan ọmwa ọvbehe.

⁶ Te avbe ọmaẹn ye eyẹ iran hio zẹ vbe ne ibiẹka ikpia ye erha iran hio.

⁷ Avbe adazẹ i ta ohoghe, avbe akpa i vbe mwẹ ẹmwẹ agbọn ne iran gha rhie ta.

⁸ Emwa eso wa ro ighe te igho iyeke winna zẹ vbe ẹbo edunna; iran yayi wẹ ai miẹn emwi ne ẹ i gie ẹe ru.

⁹ U gha ho ne emwa gha ho ẹmwẹ ruẹn, iran gha ruẹ emwi khọ, yabọ iran. U ghi ye rre wẹ abakuru sẹtin rhia ọse.

¹⁰ Ẹwaẹn ne umẹwaẹn miẹn ruẹ vbe a gha gu ẹe gui uhukpa, bun sẹẹ ne ọzuọ miẹn ruẹ vbe a gha gbe ẹe igba iyisẹn.

¹¹ Emwa dan ni gbe ẹti khian, uwu gha bu iran rre zẹ vbe ukọ nẹi mwẹ ekhọe itohan hiehiere.

¹² Ọmwa dekun akpakomiza ne a mu ẹre ọmọ, ọ re ọ maa sẹẹ ne ọ do vba avbe ọzuọ vbe iran a gha fuẹn iwinna akpa ginna otọ.

¹³ U gha ya ọkhọ ha osa ọ maa, ọkhọ i lahin owa ruẹ rre ẹdẹdẹmwẹdẹ.

¹⁴ Omuhẹn imuanmwẹ, te ọ yevbe ehe ne ekẹn ne a gbe khiọ orogho amẹ na ha uvun, zẹgiẹgiẹ ran rẹn ọ te fannọ uan.

¹⁵ Na a bu abe gbe ne ọ ma rria abe kevbe ne a fan ne ọ rria abe fua, osọnnọ ehia khin vbe odaro e Nọyaẹnmwa.

¹⁶ Ẹ i mwẹ ọ maa okpa ne ọ ra la evba sẹ ọre egbe dẹghe a lo igho ya gha ma ọzuọ ebe, ẹ i mwẹ isan ẹwaẹn ọkpa.

¹⁷ Avbe ọse ghi gha rhie ahoẹmwọmwa ma. Vbe ẹghẹ hia, ẹdẹ oseghe ọ re a ye etẹn khẹ.

¹⁸ Ọzuọ okpa ọ re ọ kha ighe rẹn gha mu osa ẹrrẹe hae.

¹⁹ Ọmwa ne orukhọ yẹẹ, ẹti ne a si ọ re ọ vbe ye ọre. U gha wa gha rhuọ vbe ẹghẹ hia, orueghe ọre u fie ho.

²⁰ Ọmwa ne ọ zẹ iro dan, ne ọ vbe ta ẹmwẹ dan, wẹ ne ọ ghẹ rhie aro ye emwi ne ọ maa okpa gberra ọfuan.

²¹ Akhiẹ kevbe irhiaẹko ọkpa, ọ re erha ne ọ biẹ ọmọ ne ọ ru emwi ọzuọ miẹn.

²² Aro ọmwa gha ma vbe uhunmwu vbe ẹghẹ hia, egberranmwẹ ọ re ọ rhie gie ọmwa; emianmwẹ uwu ne huẹẹ nọ ne egbe wa gha kan ọmwa vbe ẹghẹ hia.

²³ Ọbuohiẹn ne ẹ i ta ẹmwata ghi gha do rhie igho odieke, vbe iyeke ọnii, ibuohiẹn ẹmwata i ghi rrọ.

²⁴ Ọmwa ne ọ wan ghi gha rhie aro ye emwi ẹwaẹn ne ọ gha ruẹ, sokpan, akpa ghi wa obọ gba ehe hia.

²⁵ Ọmọ ne ọ kọẹn ghi gha si akhiẹ ye erha ẹe egbe, ọ ghi vbe gha ya ẹe ghe I ma rẹn ọghe ẹko orriara.

²⁶ Ọ ma kei ne a gha rri ọmwa ne ọ ma rri abe uhi, a gha rri ẹmwata oya, te a khiẹn ohiẹn bu.

²⁷ Ọmọ ne ọ rẹn enegbe i talọ ẹghẹ hia; ọmwa ne ọ hẹko zin egbe, ọmwa ne ọ ghe umọdia emwi ọ re nọ.

²⁸ Ọzuọ gha hunwan, ọ na gue unu ẹnrẹn, a ghi ka ẹe ba umẹwaẹn ne ọ rẹn emwi ẹsẹse.