Itan 16 - Edo Bible (E Baibol Ẹdo) Version 1996

¹ Ma sẹtin gha mwamwa emwamwa ọghe obọ mwa sokpan, e Nọyaẹnmwa ọ re ọ ta ọfo yọ.

² U sẹtin gha ro wẹ emwi ne u ru hia wa gba, sokpan, e Nọyaẹnmwa ghi ghe emwi ne ọ ya uwẹ ru ẹe.

³ Rinmwian e Nọyaẹnmwa ne ọ yobọ ye emwamwa ruẹn, u gha ra ru ẹe, te ọ wa dunna nuẹn.

⁴ Emwi ne Nọyaẹnmwa yi hia wa mwẹ ne a zẹ yotọ khẹ ọre; emwi ne a ghae khẹ ọmwa dan ọrọre ọfuan.

⁵ Te ẹmwẹ ọmwaikọmwa ne ọ tọn egbe mu sọnnọ e Nọyaẹnmwa; ẹ i vbe gie irrioya la iran ban ẹdẹdẹmwẹdẹ.

⁶ Gha re ne ọ gie a mu ẹtin yan kevbe ne ọ guobọmwa, e Nọyaẹnmwa gha ya orukhọ ruẹ bọọ. Gha ya ọghọ ne Nọyaẹnmwa, emwi dan rhọkpa i ra vbe sunu vbe egbe ruẹ.

⁷ U gha ru vbene ọ yẹ Nọyaẹnmwa, u gha sẹtin ya avbe eghian ruẹn khian ọse.

⁸ Ọ kere ne a gha mwẹ emwi kherhe ne a la odẹ ẹmwata miẹn, sẹẹ ne a gha mwẹ okpe ere ne a la odẹ ero miẹn.

⁹ Wẹ sẹtin ru emwamwa ọwuẹ. Sokpan Osanobua ọ re ọ ta vbene u gha ru emwi hẹ.

¹⁰ Ẹtin uyi ẹrinmwi ọ re ọba ya guan, emwi ne ọ tae hia ọ re ọ wa re ne ọ gbae.

¹¹ E Nọyaẹnmwa ho ne emwi ne a mwa rẹn hia, ọghe ubunmwẹ kevbe ọghe ukhuamwẹ ne ọ gha re ọghe ẹmwata, kevbe ne emwi ne a khiẹn hia gha re vbene ọ kei yi.

¹² Avbe ọba i zẹdẹ rhie otọ ne ọkhọ; rhunmwuda uhunmwu ẹmwẹ ọ re ọ ye arriọba khian ne ọ wegbe.

¹³ Ẹmwata ọ re ọba ho ne ọ gha họn, iran ni tae gha miẹn aro ne ọ maa vbe obọ ẹre.

¹⁴ Ọmwa ne ọ wan ghi gha hia ne ọ gha ya ẹko ọba rhiẹnrhiẹn, ohu gha mu ọba, ọmwa hoho sẹtin lae.

¹⁵ Aro ne ọ maa ọghe ọba yevbe okuku amẹ ne ọ ye amẹ rhọ vbe ẹghẹ ahọ orhọ, uwa rre evba.

¹⁶ Ọ maa sẹ ukhukhu uri ukhukhu ọgban ne a gha mwẹ ẹwaẹn kevbe irẹnmwi sẹ ne a gha mwẹ igoru kevbe esiliva.

¹⁷ Odẹ ne ẹbe i ye ọ re emwa esi la, rhunmwuda ọnii, gha rhuan egbe vbe ehe ne u yo, ọnii sẹtin da uhunmwu ẹn yi ye agbọn.

¹⁸ Te uhiomwẹ khian rrie odẹ ọfuan, itengbemu ọ re ọ vbe si udemwẹ.

¹⁹ Ọ maa ne a gha re ọmẹhẹ ne a tọ, sẹẹ ne a gha rre usun iran ni tọn egbe mu ne avbe ghae vbe emwi ne a furu ọghe iran.

²⁰ Gha danmwehọ emwi ne a ma ruẹn re, ọ gha dunna nuẹn; mu ẹtin yan e Nọyaẹnmwa, ẹko gha sẹ uẹ ọyẹnmwẹ.

²¹ Ọmwa ne ọ wan, ne ọ vbe sẹ ekpe, irẹnmwi ọ re a ya rẹn ọnrẹn. Vbene ẹmwẹ ọnrẹn ya rhiẹnrhiẹn, erriọ ọ re ọ ya la ọmwa ehọ.

²² Uhunmwu uwa ẹfe ọ re ẹwaẹn khin ne umẹwaẹn, sokpan, ne a gha hia ne a ma avbe akpa emwi, te a mu ẹghẹ rhia kẹkan.

²³ Te emwa ni wan ka roro ẹmwẹ nẹ iran ke ta ẹe, iran ghẹ ghi ta ẹe, ẹghẹ nii, ọ ghi gha la ọmwa ehọ.

²⁴ Te ẹmwẹ itohan ye vbe owọn, ọ rhiẹnrhiẹn ne a re, ọ vbe rhie egberranmwẹ ne ọmwa.

²⁵ Emwi ne uwẹ wa ro wẹ ọnii ọrọre odẹ ẹmwata, sẹtin gha re odẹ ne ọ rrie uwu.

²⁶ Emwi ne ọ khọn ọmwa ne ọ winna, ọ re ọ ya ẹe winna sayọ, rhunmwuda ọ ho ne ẹko emwi ne ohanmwẹ ọnrẹn gbe ẹe vuọn irẹn.

²⁷ Emwa dan ghi gha ho odẹ ne ọ gha na kuan ẹrrẹe, uhin ighe te erhẹn tọn vbe ẹmwẹ ne unu iran rhunmwuda emwi dan ne ọ khin.

²⁸ Emwa dan ọ re ọ rhie awẹawẹ ye ahẹn bọnmwẹ, iran ọ re ọ si ẹti rre iran ọ re ọ rhia ọse.

²⁹ Emwa ni khọ gha rẹrẹ ọse iran nẹ, iran ghi silo iran obọ la ọfuan.

³⁰ Gha mwẹ ẹwaẹn vbe egbe emwa ni guẹ yan akọn ni vbe bun ruẹn aro, iro dan ọ re iran zẹe.

³¹ Utọmwẹ ọrọre ere ẹmwata, ede uyi ọ re edẹ khin.

³² Ọmwa ne ọ ziengbe ọ re ọ maa sẹẹ ne ọ hẹ ẹtin. Ọmwa sẹtin kha yan egbe ẹre ọ re ọ maa sẹẹ ọ kha yan okpẹvbo.

³³ Emwa nagbọn ghi gha yan uta ne iran miẹn ehe na rẹn emwi ne ọ rre Osa ekhọe, sokpan, Osanobua ọ re ọ tobọ ọre ta vbene uta ni gha kha hẹ.