Itan 15 - Edo Bible (E Baibol Ẹdo) Version 1996

¹ Ewanniẹn nekhuẹrhẹ ọ re ọ dọ ohu yọ, sokpan, te ẹmwẹ ne ọ wegbe gua ẹe kpao.

² Avbe umẹwaẹn gha guan, iran ghi gha ya irẹnmwi yẹ ọmwa; sokpan, avbe akpa, te iran kpa ẹmwẹ oya ladian.

³ E Nọyaẹnmwa bẹghe emwi ni sunu vbe ehe hia, rẹn gha ghe ima, deghẹ emwi esi ma ru ra emwi dan.

⁴ Ẹmwẹ itohan te ọ rhie arrọọ rre, sokpan, ẹmwẹ ọbe, te ọ gbe orhiọn.

⁵ Ukọnmwẹ nọ ne ọmwa fi iyeke gbe emwi ne erha ma ẹre re, ẹwaẹn nọkhua nọ adeghẹ u rhie ibude ne ọ rhie ya dia ruẹ ye odẹ.

⁶ Ẹfe emwa esi ghi gha di iran obọ ya, sokpan, emwa dan ghi hẹ ọghe iran kua vbe ẹghẹ ne emwi hia na kan.

⁷ Obọ avbe umẹwaẹn ọ re irẹnmwi na vẹ gba ehe hia ighe ẹ i re avbe ọzuọ.

⁸ Emwa esi gha na erhunmwu, ẹko ghi gha rhiẹnrhiẹn e Nọyaẹnmwa, sokpan te emwi izọ ese ne emwa dan viọ gie ẹe sọnnọ ẹn.

⁹ Te odẹ emwa dan sọnnọ e Nọyaẹnmwa sokpan, ẹmwẹ iran ni ru ẹse ghi gha ye ọre.

¹⁰ U gha ru emwi ne ọ ma gba, a gha rriọọ oya ẹsẹse, sokpan, u gha wẹ ne a ghẹ dia ruẹ ye odẹ, uhunmwu ọ re u ya khiọ ẹre.

¹¹ Emwa ẹvbo iran ni wulo nẹ i sẹtin rhie emwi ni rre ehe ne iran ye lẹre ne Nọyaẹnmwa, vbe ọmwa nagbọn ra na sẹtin rhie iro ekhọe ẹre lẹre ne Nọyaẹnmwa, hẹ?

¹² Emwa ni ghe ẹwẹe iran okpa i ho ne a ta emwi ne iran baku ru ma iran, iran i nọ wẹ ne ọmwa ne ọ wan sẹ iran bu iran ude ẹdẹdẹmwẹdẹ.

¹³ Ẹko gha sẹ emwa ọyẹnmwẹ, iran ghi gha mumu ogiẹ, sokpan, ẹko gha rriara iran, iran ghi suku aro ua.

¹⁴ Emwa ni wan ghi gha ho ne iran ruẹ emwi, sokpan, ẹko amarẹn ne avbe ọzuọ ye wa vuọn iran.

¹⁵ Edomian ne ẹ i gbe amẹ sa wọn ọ re ẹdagbọn ovbiogue khin, sokpan, emwa ne ẹko rhiẹnrhiẹn ghi gha kuobọyuwa ẹghẹ hia.

¹⁶ A re ovbiogue ne ọ mu ohan e Nọyaẹnmwa, ọ re ọ maa sẹẹ ne a gha re ọmwa ne ọ fe ne ọ rre uwu orueghe vbe ẹghẹ hia.

¹⁷ A hẹko gu emwa ne a ho ẹmwẹ ọnrẹn la lọ uwọnmwẹ ọ re ọ maa sẹẹ ne a ya gu ọmwa ne ẹko ọmwa i maa rri emiowo ne ọ maa sẹẹ.

¹⁸ Ibalegbe ọ re ọ si imuan ẹmwẹ rre, sokpan, te izin egbe rhie ọfumwegbe rre.

¹⁹ U gha re ọmwa ne ọ si oroho, ọlọghọmwa ọ re u ra gha miẹn vbe ehe hia; sokpan, adeghẹ ọmwa esi ọ re u khin, u i vbe miẹn orueghe rhọkpa.

²⁰ Ọmọ ne ọ wan ghi gha ya ẹko erha ẹe rhiẹnrhiẹn. Ọmọ ne ọ kọẹn okpa ọ re ọ zan iye ẹe.

²¹ Ẹmwẹ ukọnmwẹ iran wa vuọn avbe ọzuọ ẹko, sokpan, emwa ni wan ghi gha ru vbene ọ kei yi.

²² Gualọ ude vbehe ne a gha na sẹtin bu ruẹ ude hia, ọ gha dunna nuẹn, adeghẹ ẹ i re vberriọ, te u ra baeku.

²³ U miẹn vbe ọ rhiẹnrhiẹn hẹ a deghẹ a miẹn ẹmwẹ ne ọ guae ro ya gie vbene emwi ye hẹ zẹẹ.

²⁴ Odẹ ne ọ hin odukhunmwu rrie arrọọ ọ re avbe umẹwaẹn la ighẹ ẹ i re odẹ ne ọ tuorre rrie uwu.

²⁵ E Nọyaẹnmwa gha fuẹn owa emwa ni tọn egbe mu uan, sokpan ọ gha degue emwi ne ẹgbẹ mwẹ.

²⁶ Te iro dan sọnnọ e Nọyaẹnmwa sokpan ẹmwẹ nekhuerhẹ ghi gha yẹ ọre.

²⁷ Hia ne u ya la odẹ ero gha khuan viọ ye ẹkpo, u gha si ẹti ye igiowa ruẹ egbe. Ghẹ miẹn ọmwa igho odieke, u gha wa tọ.

²⁸ Te emwa esi roro ẹe nẹ ọ ke gha rhie ewanniẹn ye ẹmwẹ. emwa dan wa mwẹ ewanniẹn ẹgiẹgiẹ sokpan ẹti ọre ọ si.

²⁹ Emwa esi gha na erhunmwu, e Nọyaẹnmwa ghi gha danmwehọ sokpan, ọ ghi yangbe avbe emwa dan.

³⁰ Aro ni mumu ogiẹ ghi gha ya ẹko ọmwa rhiẹnrhiẹn, iyẹn esi ghi gha ye ọmwa rran sayọ.

³¹ A gha dia ruẹ ye odẹ, u na gbe ehọ kotọ, umẹwaẹn ọ re u khin.

³² U gha he iruẹmwi, egbe ruẹ ọ re u ru khọ. U gha rhan obọ miẹn aguọmwagui, u ghi do gha wan sayọ.

³³ Ọghọ ne a rhie ne Nọyaẹnmwa iruẹmwi ọ re wa vbe nọ ọghe obọ ẹre. Te uwẹ gha mwẹ amu egbe rriotọ a te miẹn wẹ uyi do gha rruẹ egbe.