Itan 14 - Edo Bible (E Baibol Ẹdo) Version 1996

¹ Ẹwaẹn ikhuo ọ re a ya gbe owa ẹkun sotọ, sokpan, ukọnmwẹ ọ re ọ zagha ẹe rua.

² Gha ta ẹmwata, u gha rhie ma wẹ u gele ya ọghọ ne Nọyaẹnmwa adeghẹ u i ta ẹmwata, ọnii rhie ma wẹ u i ru vberriọ.

³ Itengbemu ọ re ọ gie akpa gha talọ gbe; ẹmwẹ umẹwaẹn ọ re ọ degue ẹre.

⁴ Vbene ẹmila ne a ya si emwi ne a ya vulo otọ i na rrọ, ai miẹn emwi rhọkpa vbe erru, sokpan ọ gha rrọ, erru gha vuọn ne emwiokọ.

⁵ Emwata ọ re ọ sẹe ne ọ gie a mu ẹtin yan ta ẹghẹ hia; sokpan, ne ẹ i gie a mu ẹtin yan i vbe ta ẹmwẹ ọvbehe gberra ohoghe.

⁶ Ọmwa ne ọ ye obọ rra ẹwẹe ẹre okpa i sẹtin gha wan ẹdẹ, sokpan, ẹ i sọn emwa ẹwaẹn ruẹ emwi guẹ.

⁷ Ladian hin ẹbu avbe akpa rre, iran i ra miẹn emwi ma ruẹn re.

⁸ Vbọzẹ ne ọmwa irẹnmwi na wan yi? Rhunmwuda ighe ọ rẹn emwi ne irẹn gha ru. Vbọzẹ ne ọzuọ na kọn yi? Rhunmwuda, te ọ ro vbe ẹghẹ hia wẹ rẹn rẹn emwi.

⁹ Avbe akpa gha ru orukhọ, ẹ i vbe kan iran egbe, sokpan, avbe emwa esi ghi gha ho ne a ya bọ iran.

¹⁰ Ọyẹnmwẹ ruẹn, ọwuẹ nọ, orriara ruẹ, ọwuẹ nọ. Ọmwa ne ọ ra guẹ ghae ẹre i rrọọ.

¹¹ Owa ọmwa dan gha rẹnkhẹn uan nẹ, owa ọmwa esi ghi ye gha rre atẹ.

¹² Odẹ ne uwẹ te ro wẹ ọ re ọghe ẹmwata sẹtin wa gha re ne a la sẹ uwu.

¹³ Ogiẹ sẹtin degue akhiẹ. Ẹko rhiẹnrhiẹnmwẹ gha kpao, akhiẹ ghi mu evba mwẹ.

¹⁴ Emwa dan gha miẹn emwi ne ọ ma iran. A gha san emwa esi ẹse ye emwi esi ne iran ru.

¹⁵ A i miẹn ẹmwẹ ne akpa i yayi, avbe umẹwaẹn, te iran ghe owẹ zẹ vbe otọ.

¹⁶ Avbe umẹwaẹn ghi gha ya egbe lẹ ne orueghe, sokpan, avbe akpa i gbe aro kotọ, oguegue iran ya ru emwi.

¹⁷ Emwa ne egbe balọ ghi gha yin uyinmwẹ akpa, emwa ni wan sẹẹ ghi hẹko zin egbe.

¹⁸ Emwi ne ọ ma ukọnmwẹ iran, ghi gha rruan emwa ni ma rẹn ne a ye. Sokpan, irẹnmwi ọ re a ya san avbe umẹwaẹn ẹse.

¹⁹ Te emwa dan gha de igue vbe odaro ẹmwata ne iran vbu aro ne ọ maa vbe obọ iran.

²⁰ Ai miẹn ne ọ ho ẹmwẹ ovbiogue uhin ya sẹ egbe ẹdogbo ẹre ne arẹn egbe, sokpan iran ni fe ghi gha mwẹ avbe ọse nibun.

²¹ U gha ho ne u gha mwẹ ẹko rhiẹnrhiẹnmwẹ, gha tohan ivbiogue; orukhọ nọ ne a gha zan ọmwaikọmwa.

²² Adeghẹ uwẹ winna ne emwi gha maa, emwa ọvbehe ghi gha mu ẹtin yan ruẹn, iran ghi vbe gha ya ọghọ ne uẹn; adeghẹ emwi dan wẹ mu aro yi, u ba odẹ ku.

²³ Gha winna, u gha vbe khuan okhuan ẹdẹ ruẹ, adeghẹ te u tota gbe ọta khian, u gha khian ovbiogue.

²⁴ Ẹfe ọ re a ya san avbe umẹwaẹn ẹse; sokpan, ukọnmwẹ iran ọ re a ya rẹn avbe akpa.

²⁵ Osẹe gha ta ẹmwata, uhunmwu nibun ọ re ọ sinmwi ye agbọn, ọ gha ta ohoghe ọ ghi ya emwa nibun na vbokho.

²⁶ A ya ọghọ ne Nọyaẹnmwa, ekhọe kevbe ẹkun ne ọ sotọ ọ re ọ rhie ne igiowa ọmwa.

²⁷ Wẹ ho ne u lẹ uwu fe ra? A ya ọghọ ne Nọyaẹnmwa, uhunmwu uwa ne arrọọ ke rre nọ.

²⁸ Vbene emwa ne ọba kha yan ya bun, ọ re irẹn vbe ya kpolo; vbene iran i na rrọ, rẹn i re emwirhọkpa.

²⁹ Adeghẹ wẹ hẹko zin egbe, ọmẹwaẹn ọ re u khin, egbe gha balọ ọ, te u rhie ma kẹkan vbene u kọn sẹhẹ.

³⁰ Ekhọe ne ọfumwegbe ye, te ọ ye egbe rran ọmwa; sokpan te igbọvo yevbe ẹtẹ ne ẹ i mwẹ ukhunmwu.

³¹ U gha zẹ ivbiogue owẹ, Osa ne ọ yi iran ọ re u zan nii, sokpan emwi itohan ne a ru ne ivbiogue, iwinna ugamwẹ nọ.

³² Emwi dan ne emwa dan ru ọ re iran ya gbe egbe iran; sokpan uyinmwẹ ekhọe esi ọ re ẹmwata ya da egbe yi.

³³ Ẹwaẹn rre iro ne umẹwaẹn ro hia, avbe ọzuọ ma rẹn emwi ne a tie ẹre ẹwaẹn hiehiere.

³⁴ Uyinmwẹ ẹmwata ọ re ọ ye ẹvbo khian nọkhua, ifaegbua ọ re orukhọ khin ni ẹvboikẹvbo.

³⁵ Ewọe ni sẹ ekpe ọ re ọ ya ẹko ọba rhiẹnrhiẹn; sokpan, te irẹn rri ọmwa ne ọ ma giee dunna oya.