Itan 13 - Edo Bible (E Baibol Ẹdo) Version 1996

¹ Ọmọ ne ọ wan ghi gha danmwehọ vbe erha ẹe a gha gu ẹe gui, sokpan, ọmwa ne ọ hio i miẹnkue ẹdẹdẹmwẹdẹ ighe rẹn ba emwi ku ru.

² A gha san emwa esi ẹse ye ẹmwẹ ne iran guan, sokpan, iran ni re emwa erẹrẹ, e piankhanrhan ọ re iran fie ho khin.

³ Gha rhie aranmwẹ kọ ehọ guan ne u rhie uhunmwu ẹn hin ẹbe rre. Ọmwa ne ọ mu ẹmwẹ fua gha khian rhie.

⁴ Vbene emwi a ya khọn ọmwa oroho sẹ, ẹ i sẹ ọre obọ. Ọmwa ne ọ mu aro ye iwinna, emwi ne ọ rhirhi a gha ho hia, ọ re ọ sẹ ọre obọ.

⁵ Ohoghe ne a ta i yẹ emwa ẹmwata, sokpan, ẹmwẹ ne unu emwa dan, ne ọ mu ekhue kevbe ne ọ fa ọmwa ran ọ re nọ.

⁶ Uyinmwẹ ẹmwata Ọ re ọ sinmwi ọmwa ne ọ ma rukhọ, uyinmwẹ dan ọ re ọ si udemwẹ emwa orukhọ.

⁷ Emwa eso ghi gha rhie egbe ye ukpo ọmwa ẹfe, vberriọ ẹ i mwẹ emwi rhọkpa. Emwa ọvbehe eso ghi gha rhie egbe ye ukpo ovbiogue sokpan, ọ wa mwẹ emwi ẹsẹse.

⁸ Igho ọ re ọmwa ne ọ fe ya dẹ uhunmwu ẹnrẹn, sokpan, a i miẹn ne ọ lẹre khẹ ovbiogue.

⁹ Te emwa ẹmwata ye vbe ukpa ne ọ baa ẹsẹse, sokpan, emwa dan keghi ye vbe ukpa ne ọ ghi ra dọyọ.

¹⁰ Itengbemu i si emwi ọvbehe rre gberra orueghe. Ne a gualọ ọmwa ne ọ gha bu ọmwa ude ọ re ẹwaẹn ye sẹ.

¹¹ Ẹfe ne ọ ma sọn ọ sẹ ọmwa obọ, ẹ i vbe sọn ọ kpao sẹ ọmwa rae, vbene ọ ya lọghọ a ke miẹn ọẹn, erriọ ọ re ọ vbe ya di ọmwa obọ ya.

¹² Idaehọ ọmwa gha rẹnkhẹn uan, orhiọn ghi dọyọ, sokpan, emwi ne a rhie aro yi gha sẹ ọmwa obọ, ẹko ghi gha sẹ ọmwa ọyẹnmwẹ.

¹³ A gha bu ruẹ ude esi, u na fieghe uhunmwu yọ, orueghe ọre u gualọ, u gha ya ẹe ru emwi, u gha rrọọ vbe ai mwẹ ẹbe.

¹⁴ Emwi ne ọmẹwaẹn ma ọmwa re, uhunmwu uwa ne a rrọọ ke rre nọ, iran gha ru iyobọ ne uẹn ne u ya lẹfe vbe u a gha rre uwu ẹbe uwu.

¹⁵ Te emwa hia ya ọghọ ne ẹwaẹn, sokpan, emwa ne ẹ i gia mu ẹtin yan, odẹ ọfuan iran gbẹn.

¹⁶ Emwa ni wan, te iran roro emwi nẹ iran kegha ru ẹe, sokpan avbe ogboi ghi mu ukọnmwẹ iran ye ahẹn gha bọnmwẹ.

¹⁷ Emwa ne a gie ẹre uhunmwu, otighi ọ re iran si rre vbe iran a gha re emwa ne ẹ i gie a mu ẹtin yan, sokpan, ọfumwegbe ọ re iran ni gie a mu ẹtin yan rhie rre.

¹⁸ Ọmwa ne ẹ i ho ne ọ ruẹ emwi gha khian ovbiogue, ọ ghi vbe fa egbe ua. Ọmwaikọmwa ne ọ danmwehọ vbe a gha gu ẹe gui, te a ya ọghọ ne ẹẹn.

¹⁹ U miẹn vbene ọ maa hẹ ne emwi ne ọmwa ho sẹ ọre ohọ! Avbe akpa i ho ne iran zobọ vbe emwi dan ne iran ru.

²⁰ Gha gu umẹwaẹn mu obọ, wẹ gha vbe do khian umẹwaẹn. Adeghẹ u gu avbe akpa gha ru ọse, ọnii ọ re ọwuẹ fo.

²¹ Te orueghe lele emwa orukhọ la ehe hia, sokpan, a gha ye emwi esi san emwa esi ẹse.

²² Ọmwa esi gha miẹn emwi sẹrae ye avbe eyẹ ọre otọ, sokpan, emwa esi ọ re ọ ra ya emwa dan emwi ru.

²³ Oha ne a ma mu ẹre ugbo gha te sẹtin ma emwiokọ ne avbe ivbiogue, sokpan avbe emwa dan i gie a mu ẹre ugbo.

²⁴ Adeghẹ u i gbe ovbuẹ hin ọkhọ rre, ọnii rhie ma wẹ u i ho ẹmwẹ ọnrẹn. Adeghẹ u ho ẹmwẹ ọnrẹn, te u gha dia ẹre ye odẹ.

²⁵ Ọmwata mwẹ sẹ vbene ọ gha ho ne ọ re, sokpan te ohanmwẹ gbe avbe emwa dan vbe ẹghẹ hia.