Itan 12 - Edo Bible (E Baibol Ẹdo) Version 1996

¹ Ọmwa ne ọ ho ẹmwẹ irẹnmwi ghi gha ho ne a tama irẹn vbe ọ gha ba emwi ku ru. Adeghẹ ọmwa i ho ne a dia ẹre ye odẹ, ukọnmwẹ nọ.

² Ẹko emwa esi ghi gha rhiẹnrhiẹn e Nọyaẹnmwa, sokpan, ọ ghi gha bu abe gbe iran ni zẹ iro emwi dan.

³ Uyinmwẹ dan i gie ẹkun sẹ ọmwa otọ, sokpan, ọmwa ẹmwata ghi mudia gbain.

⁴ Okhuo esi, emwi ọyẹnmwẹ kevbe ne a ya hio nọ ne ọdọ ẹre. Sokpan, okhuo ne ọ si efa ye ọdọ ẹre egbe te ọ yevbe ẹtẹ ne ọ rre uwu ugboloko.

⁵ Emwa ni mwẹ ekhọe esi ghi gha gu emwa yin ẹse, sokpan, te emwa dan ho ne iran gha rẹrẹ ọ kẹkan.

⁶ Izigha ọ re ẹmwẹ ne unu emwa dan khin, sokpan, ẹmwẹ ne unu ọmwa esi ghi gha fannọ emwa ne a yan khẹ yotọ.

⁷ Emwa dan gha de nẹ, iran i ghi vbe sẹ emọ rae yotọ, sokpan, ẹgbẹe emwa esi ghi gha vbẹ yọ.

⁸ U gha mwẹ ẹwaẹn, emwa ghi gha tian ruẹn, sokpan, u gha re akpa, emwa ghi ye aro gbe uẹ re.

⁹ Ne a gha re ọmwa kẹkan ne ọ khuan igho evbare unu ẹnrẹn, ọ re ọ fu egbe sẹ ne a mu akpa okpọmwa yọ vbe ne ai na mwẹ evbare unu.

¹⁰ Ọmwa esi ghi gha gbearoghe emwi irri ẹre, sokpan, emwa dan ghi gha ru ọghe iran khọ.

¹¹ Ọwẹe ne ọ winna ẹse ghi gha mwẹ evbare ne ọ kpọ kua sokpan, ukọnmwẹ nọ ne a ya gha mu ẹghẹ rhia ye iwinna ne ẹ i mwẹ ere.

¹² Emwi okpa ne ọ rre ekhọe emwa dan ọrọre vbene iran gha na miẹn emwi dan ru hẹ, sokpan, ọmwa ẹmwata ghi mudia gbain.

¹³ Ẹmwẹ ne unu ọmwa dan, ọ re a ya khuẹn ifi mu ẹẹn, sokpan, ọmwa esi ghi gha rhie uhunmwu ẹnrẹn ke ẹbe ladian.

¹⁴ Ẹmwẹ ne u guan, kevbe emwi ne u ru, ọ re a vbe lele ya san ruẹn ẹse, emwi ne ọ khẹke uẹ ọ re ọ gha vbe sẹ uẹ obọ.

¹⁵ Avbe akpa ọ re ọ wa ro vbe ẹghẹ hia wẹ emwi ne irẹn ru wa gba, avbe umẹwaẹn ghi gha rhie ude.

¹⁶ Ohu gha mu akpa, ọ ghi wa rhie ẹre ma ẹgiẹgiẹ. adazẹ i zẹ ye ẹmwẹ ihẹn.

¹⁷ U gha ta ẹmwata, iwinna ẹmwata ọ re u winna ẹn nii, sokpan ẹmwẹ ohoghe ọ re a la sẹ emwi ne a ma ru ẹse.

¹⁸ Ẹmwẹ akpa, te ọ fian ẹwẹn ne ọ da zẹ vbe umozo, sokpan ẹmwẹ ne a ya ẹwaẹn ta, te ọ kpe ẹwẹn rrie.

¹⁹ Ohoghe i tọ, sokpan, etẹbitẹ ọ re ẹmwata khin.

²⁰ Emwa ni ziro emwi dan, emwi dan gha vbe de gbe iran, sokpan, iran ni winna ye ọmaa, gha miẹn ẹko ne ọ rhiẹnrhiẹn.

²¹ Emwi dan i sunu vbe egbe emwa esi, sokpan orueghe i fo vbe urhu emwa dan.

²² E Nọyaẹnmwa khuiwu avbe ọhọn ohoghe, sokpan, ẹko ẹre ghi gha rhiẹnrhiẹn iran ni mu ẹmwẹ iran sẹ.

²³ Adazẹ i ta emwi ne ọ rẹnrẹn ladian, sokpan avbe akpa ghi mu ukọnmwẹ iran ye ahẹn gha bọnmwẹ khian.

²⁴ Te iwinna ne a mu aro yi rhie ẹtin ne ọmwa, sokpan, te oroho si ọmwa la iyoha.

²⁵ Ohawa sẹtin rhie ọyẹnmwẹ hin ọmwa obọ rre, sokpan, ẹmwẹ itohan ghi gha ya ọyẹnmwẹ sẹ ọmwa.

²⁶ Arọndẹ ọ re ọmwa esi khin ne avbe esiọre, sokpan, obẹlẹ ọmwa dan ghi de iran odẹ.

²⁷ Adeghẹ ọmwa oroho ọre uwẹ khin, emwi ne u gualọ i sẹ uẹ obọ ẹdẹ, sokpan, adeghẹ u mu aro ye iwinna, u gha mwẹ emwi ẹsẹse.

²⁸ Uyinmwẹ ẹmwata ọrọre urodẹ agbọn, uyinmwẹ dan ovbi odẹ uwu nọ.