Itan 11 - Edo Bible (E Baibol Ẹdo) Version 1996

¹ Osanobua i ho ẹmwẹ emwa ni ya esike omuru mwa emwi. emwi ne a mwa ẹse ọ re ọ ye ọre.

² Emwa ni tọn egbe mu gha fa egbe ua wan, aro emwi uhẹn uhẹn ọ re ẹwaẹn ye sẹ.

³ Adeghẹ u maa, a ta ẹmwata ọ re ọ dia ruẹ. Ai ta ẹmwata ọghe iran, ọ re ọ miẹn emwa ne ẹ i gia mu ẹtin yan uhunmwu.

⁴ Ẹfe i miẹn emwi okpa ru wẹn vbe ẹdẹ ne uwu gha sẹ uẹ egbe, sokpan, uyinmwẹ esi gha sẹtin miẹn orhiọn ruẹn fan.

⁵ Uyinmwẹ esi sẹtin ye agbọn rọkhọ ne ọmwa esi rre, sokpan, ọmwa dan ọ re ọ ye obọ si emwi ne ọ gbẹe.

⁶ Uyinmwẹ ẹmwata sẹtin fan ọmwa ẹmwata vbe irri, sokpan, ọmwa ne ẹ i gia mu ẹtin yan, arovbẹmwẹ ọnrẹn ọ re ọ ra khuẹn ifi mu ẹẹn.

⁷ Ọmwa dan gha wu, rẹn kevbe emwamwa ekhọe ẹre ọ re ọ gba wu. Egbe ne a hẹnhẹn yan ẹfe, te ọ khian akuọkan.

⁸ A degue emwa ẹmwata hin obọ ọlọghọmwa rre, ọmwa dan ọ re ọ ghi bu rre ye ihe ẹre.

⁹ Ẹmwẹ unu emwa ne ekhọe ẹre mu rhu, sẹtin rhia ọmwa ẹdagbọn ruan, sokpan ẹwaẹn ọmwa ẹmwata sẹtin miẹn ruẹn fan.

¹⁰ Agbọn gha maa emwa ẹmwata vbe ẹvbo, ẹvbo ni ghi de hẹnhẹn, emwa dan gha wulo, uwemwẹ oghọghọ ghi gba ehehia.

¹¹ Emwa ẹmwata gha na erhunmwu ne ẹvbo, ẹvbo nii ghi gha maa, sokpan, ẹmwẹ unu emwa dan, ọre ọ si udemwẹ ẹvbo.

¹² Ukọnmwẹ nọ ne a gha ya unu sakan ẹrrẹe. A dẹghe ọmọ ne egbe maa ọ re u khin, u gha hẹko hunmwan.

¹³ A i ta ẹmwẹ uma ma ọmwa ne unu bọbọ, sokpan, u sẹtin ye egbe yan ọmwa ne ọ gia mu ẹtin yan.

¹⁴ Ẹvbo ne ẹ i mwẹ ne ọ su ẹe, te ọ de guọghọ ua. Emwa ni gu ọmwa zẹ iro gha bun, ẹkun ghi sẹ otọ.

¹⁵ U gha kha ighe u gha mu osa orhunmwuyẹn hae, u gha gbe I ma rẹn. U ma zẹdẹ ye egbe hẹ vbọ, ọ re ọ fu egbe sẹ.

¹⁶ Emwa hia ọ re ọ yọghọ ne okhuo ne ọ rẹn enegbe, sokpan, efaa ọ re okhuo ne ẹ i mwẹ uyimwẹ khin. Okpia ne ọ mitan i sẹtin gha mwẹ igho, sokpan okpia ne obọ ẹre tọn gha fe.

¹⁷ Ẹse ọ re u ru ne egbuẹ adeghẹ u mwẹ itohan, adeghẹ ekhọe azẹn ọ re ọ guẹ, egbe ruẹ ọ re u ra kuan.

¹⁸ Ere emwi esi okpa i rrọ ne ọmwa dan re, sokpan, u gha ru emwi esi, ẹ i mwẹ a ma san ruẹn ẹse.

¹⁹ Ọmwa ne ọ mu aro yọ ne irẹn gha ru emwi esi, ọ gha rre agbọn, sokpan, ọmwa ne ọ wẹ emwi dan rẹn ra gha ru khian, ọ gha wu.

²⁰ E Nọyaẹnmwa i ho ẹmwẹ ọmwa ne ọ mwẹ ekhọe ibisi, sokpan, ọ ho ẹmwẹ ọmwa ne ọ ru emwi ẹse.

²¹ Wẹ rẹnrẹn wẹ ẹ i mwẹ a ma rria ọmwa dan ikhi, sokpan, emwa esi gha lẹ fe.

²² Ose ne ọ rre egbe okhuo ne ẹ i mwẹ uyinmwẹ, ọ yevbe oroka igoru ne a rhie ye ihue esiebo.

²³ Emwi esi ọ re ọ la emwi ne emwa esi ho rre, emwi ne emwa dan ho gha sẹ iran obọ, ohu ghi gha mu emwa hia.

²⁴ Emwa eso rrọ ni lo igho iran wọrhọwọrhọ, ẹfe iran ghi ye gha maa yọ, eso ghi gha hẹko lo ẹre, sevba, ọ ghi ye gha khian ovbiogue.

²⁵ Gha zẹ emwi obọ, u gha mwẹ ẹfe, yi emwa ọvbehe obọ, a gha vbe yi uwẹ obọ.

²⁶ Te emwa ya amẹ unu ne ọmwa ne ọ si evbare gboo, ọ ghi viọ iran lẹre khẹ ẹghẹ ne emwi gha na gha ghan. Sokpan, a ghi gha na erhunmwu ne ọmwa ne ọ viọ iran ladian gha khiẹn.

²⁷ Adeghẹ vbene uwẹ ho ne ọ sunu maa, emwa ghi gha ya ọghọ ne uẹn sokpan, adeghẹ ọlọghọmwa wẹ gualọ, ọlọghọmwa nii ọ re u ra vbe miẹn.

²⁸ Emwa ne ọ mu ẹtin yan ẹfe iran gha dele zẹ vbene ebe khuọn kua vbe ẹghẹ okhuakhua; sokpan, agbọn gha ma ẹmwata zẹ vbene ebe ye vbe ẹghẹ orhọ.

²⁹ Ọmwa ne ọ fi otighi fi uwu ẹgbẹe ọre, te ọ ra wa gbe ihoi fẹẹrẹ. Te avbe akpa ra gha ga avbe umẹwaẹn khian rhinrin ẹdẹ.

³⁰ Uyinmwẹ esi, te ọ rhie arrọọ ne ọmwa, sokpan, te okhọ miẹn ọmwa ẹre.

³¹ Te a wa san iran ni maa ẹse vbe agbọn na, wẹ ghi la evba rẹn wẹ te a gha rria emwa dan kevbe emwa orukhọ ikhi.