Itan 10 - Edo Bible (E Baibol Ẹdo) Version 1996

Avbe Itan Ọghe Solomọn

¹ Avbe itan ọghe Solomọn ọre ena khin: Ọmọ ne ọ wan, te erha ẹe ghe ẹre hio; sokpan, akhiẹ ọ re ọmọ ne ọ kọẹn si ye iye ẹe egbe.

² Ẹfe ne a ye ogberhu miẹn i ra maa ne ọmwaikọmwa, sokpan te uyinmwẹ ẹmwata de ọmwa ye agbọn.

³ E Nọyaẹnmwa i ra gie ohanmwẹ gbe ẹmwata, sokpan, ẹ i ra gie emwi ne emwa dan ho sẹ iran obọ.

⁴ Ogue ọ re oroho si ye ọmwa egbe, sokpan, a ye obọ mu, ọ re ẹfe la rre.

⁵ Umẹwaẹn ghi ya rhọ emwiokọ vbe ọ gha wo nẹ, sokpan, emwiekhue nọ ne ọmwa wa ye ẹghẹ emwiorhọ vbiẹ.

⁶ Erhunmwu ọ re ọmwa esi miẹn. Ẹmwẹ ne ọmwa dan guan, ọkhọ ọ re ọ gbalọ yọ.

⁷ A gha ye ẹmwata rre zẹ vbe emwa ne a fiangbe, sokpan, banbanna a mianmian ọmwa dan nẹ.

⁸ Avbe umẹwaẹn ghi rhie vbe a gha bu iran ude esi. Emwa ni guan ẹmwẹ ukọnmwẹ gha fuan.

⁹ Emwa ni yin ẹse rrọ vbe ai mwẹ ẹbe ẹkun ne ọ sotọ, sokpan obọ gha vba emwa uyinmwẹ orhure.

¹⁰ Ọmwa ne ọ rhie ẹmwata lẹre, te ọ gbe olighi, sokpan, ọmwa ne ọ kha ladian ighe emwi ma gba, ọfumwegbe ọ re ọ gualọ.

¹¹ Ẹmwẹ ne unu ọmwa esi, isi a rrọọ nọ. Sokpan, ẹmwẹ ne unu ọmwa dan rhie egbe ọkhọ ma.

¹² Otighi ọ re ikhuiwu si rre, sokpan te aho ẹmwẹ ọmwa ye abakuru hia bọ ọmwa.

¹³ Ẹmwẹ ẹwaẹn ọ re ọ ke unu avbe umẹwaẹn rre, sokpan, te ọ kere ne a gha rri avbe akpa oya.

¹⁴ Ọmwa ne ọ wan ghi viọ irẹnmwi ne ọ miẹn hia, sokpan, akpa gha guan, u ghi rẹn ighe olighi ra la evba.

¹⁵ Te ẹfe degue ọmwa ne ọ fe sokpan, te ogue miẹn ovbiogue uhunmwu.

¹⁶ Emwi ne a ya san ọmwa ẹse ye emwi esi ne ọ ru, ọrọre arrọọ, sokpan te orukhọ si ọmwa la orukhọ ọvbehe.

¹⁷ Ọmwa ne ọ rhie ehọ ye otọ vbe a gha gu ẹe gui, ọ gha di agbọn ya, sokpan, emwa ne ẹ i rhie wẹ rẹn gele ba emwi ku, te ọ rhie uhunmwu da ẹbe.

¹⁸ Ọmwa ne ọ rhie ohu ọmwa mu ọmwa lẹre, ọhọn ohoghe nọ. Ọmwa ne ọ wewe ewẹwẹwẹ khian, akpa nọ.

¹⁹ Omwa vbene a talọ sẹ, ọ re a vbe ya ru orukhọ. A dẹghe wẹ wan, te u gha hẹko hunwan.

²⁰ Ẹmwẹ ne unu ọmwa esi, te ọ yevbe esiliva ne a ma gua, sokpan iro ne ọmwa dan zẹ, i zẹdẹ mwẹ asa ne ọ ye.

²¹ Ẹmwẹ ne unu ọmwa esi guan gha rhie ọ maa gie emwa nibun, sokpan, ọmwa sẹtin ye ukọnmwẹ gbe egbe ẹre ua.

²² Afiangbe Nọyaẹnmwa ọ re ọ zẹ ẹfe ku ọmwa. Ẹsọn i rhie ba emwi ne ọmwa mwẹ.

²³ Ukọnmwẹ nọ, a deghẹ ẹko rhiẹnrhiẹn ọmwa ye iba ne a zẹ. Avbe umẹwaẹn, ẹwaẹn ọ re ọ ye ẹko iran rhiẹnrhiẹn.

²⁴ Emwi ne emwa ẹmwata ho ghi gha sẹ iran obọ, sokpan, emwi ne ohan rẹn mu avbe emwa dan sẹẹ, ọ re iran ra gha miẹn.

²⁵ Okpẹhoho gha rre, ọ ghi kpolo avbe emwa dan gha rrie sokpan emwa ne ẹ i ru ero rrọọ vbe ai mwẹ ẹbe.

²⁶ Ghẹ we ne ọmwa oroho ru emwi nuẹn, ọ gha ye egbe balọ ọ gberra okikan vbe akọn ruẹn, ra ighogho vbe aro ruẹ.

²⁷ Gha ya ọghọ ne Nọyaẹnmwa, u gha tọ sayọ. Emwa dan i wu uwu ẹhi.

²⁸ Oghọghọ ọ re idaehọ emwa esi yakọ yi, sokpan, emwi ọkpa irrọọ ne emwa dan rhie aro yi.

²⁹ E Nọyaẹnmwa ọ re ọ degue emwa ẹmwata, sokpan, ọ ghi gha rẹnkhẹn iran ni ru emwi dan an.

³⁰ Te ẹkun sẹ ẹmwata otọ vbe ẹghẹ hia, sokpan, ọmwa dan i miẹn uhunmwu vbe otọe nii.

³¹ Emwa ẹmwata ghi gha guan ẹmwẹ ẹwaẹn, sokpan aranmwẹ ne ọ ta ẹmwẹ dan, a gha da ẹre obọ yi.

³² Emwa ẹmwata rẹn ẹmwẹ itohan ne iran gha ta, sokpan, ẹmwẹ ne ọ kan ọmwa egbe ọ re emwa dan ta vbe ẹghẹ hia.