Itan 1 - Edo Bible (E Baibol Ẹdo) Version 1996

Umamwẹ Itan

¹ Avbe itan e Solomọn ne ovbi e Devid ne ọba Izrẹl.

² Avbe itan ne u gha ya rẹn ẹwaẹn kevbe ibude esi, ọ re ena khin, u gha vbe ya ẹe rẹn otọ avbe ẹmwẹ ne ọ mwẹ emwi ne ọ dinmwi ne a ya ẹe kha.

³ Iran gha sẹtin ma ruẹn vbene a ya ye ẹwaẹn yin agbọn hẹ, kevbe vbene a ya mwẹ uyinmwẹ a i zẹ ibeleku, ẹmwata kevbe a ya obọ ọkpa mu emwa hia hẹ.

⁴ Iran gha sẹtin ye ọmwa ne ọ ma rẹn emwi rhọkpa khian ne ọ gu ẹwaẹn, ọ ghi vbe ma avbe igbama vbene a ye obọ mu hẹ.

⁵ Avbe itan na gha sẹtin rhie ba ẹwaẹn avbe umẹwaẹn, ọ ghi vbe ru igiodẹ ma emwa ni rẹn ehe.

⁶ Vbene a gha na miẹn wẹ iran ghi sẹtin gha rẹn ẹmwẹ ni dinmwi ne a ya itan ta, kevbe avbe ọta ni lọghọ ne avbe umẹwaẹn nọ.

Ibude Ne Avbe Igbama

⁷ Ọmwa ne ọ ho ne ọ gha wan, ọ ghi ka gha ya ọghọ ne Nọyaẹnmwa nẹ. Avbe ọzuọ i zẹdẹ da ne ẹwaẹn, iran ghi vbe he ne iran ruẹ emwi.

⁸ Ovbi mwẹ, u ghi gha danmwehọ ẹmwẹ ne erhaa kevbe iyuẹ tama ruẹn.

⁹ Emwi ne iran ma ruẹn re gha dọlọ uyinmwẹ ruẹn yi zẹ vbene ọza uhunmwu ra ọghe ẹyaẹn ne ọ mose, dọlọ egbe ne u mu yi.

¹⁰ Ovbi mwẹ, avbe emwa orukhọ gha rẹrẹ uẹ, ghẹ kue yọ.

¹¹ Adeghẹ iran khare wẹẹ, “Larre, gie ima ya gualọ orhiọnkpa ne a gbẹe rua. Wa gia ya gu emwa eso ni ma ru emwi rhọkpa gbinna, ne ima miẹn ogiẹ giẹ!

¹² Iran sẹtin gha rre agbọn, egbe ghi vbe rran iran vbe ima a miẹn iran, sokpan, ma ghẹ ghi gu iran do ẹe fo nẹ, iran ghi gha re orinmwi.

¹³ Ma gha miẹn ẹfe ughughan nibun, ma ghi ya emwi ne a furu vuọn owa mwa.

¹⁴ Do deba ima, ne ima hia gba ghae emwi ne ima do viọ.”

¹⁵ Ovbi mwẹ, ghẹ gu emwa vberriọ mu obọ. Gban egbe ne iran.

¹⁶ Iran i sẹtin ziengbe ne iran ghẹ ru emwi dan. Iran wa mu egbe vbe ehe hia ne iran de izigha.

¹⁷ Ẹ i mwẹ esa ne a gha rhuẹ ifi ahianmwẹ vbe ne ahianmwẹ ne a rhuẹ ọ re khẹ ghe ọmwa.

¹⁸ Sokpan, emwa vberriọ egbe iran ọ re iran rhuẹ ifi khẹ, ifi ne iran ra wulo yi.

¹⁹ Ẹmwẹ oyi ne a rha ọ re oyi lele rrie, emwi na ọ re ọ sunu vbe egbe ọmwa ne ọ yin uyinmwẹ ika.

Ẹwaẹn Tiere

²⁰ Danmwehọ vbe ẹwaẹn tie emwa vbe adesẹ ore kevbe ẹki.

²¹ Ọ tọn urhu mu gha tie emwa vbe onurho ẹvbo kevbe ehe ne emwa ghi na gbe ẹbu ọ wẹẹ,

²² “Wa ne akpa! Inu ẹghẹ wa ho ne uwa ya gha re akpa? Inu ẹghẹ wa ra ghọghọ ye irẹnmwi ne uwa ya gbogiẹ la? Wa i ra ruẹ emwi ẹdẹdẹmwẹdẹ ra?

²³ Wa gha danmwehọ vbe a gha gu uwa gui, I gha rhie ibude esi ne uwa, I ghi vbe ghae ne uwa vbe uwu irẹnmwi mwẹ.

²⁴ Ọ kpẹre ne I kegha tie uwa, I na wẹ ne uwa gha dee, sokpan wa ma danmwehọ. Wa ma zẹ yọmwẹ ẹre.

²⁵ Wa fi iyeke gbe ibude mwẹ hia, wa ma vbe kue yọ wẹ ne I dia uwa ye odẹ.

²⁶ Rhunmwuda ọnii, wa gha rre ibaro, I gha giẹ uwa. I gha ya uwa gbogiẹ vbe ugborrirri a fi emwi.

²⁷ Ẹghẹ ne ọ gha na hihiẹ yan uwa zẹ vbe okpẹhoho, ọ ghi si ẹhoho dan ọghe ọlọghọmwa rre, wa ghi gha rre obalọ kevbe orriara.

²⁸ Ẹghẹ nii, wa ghi gha kpetie ẹwaẹn, sokpan, mẹ ira khuẹnniẹn. Wa sẹtin gualọ mwẹ lele ehe hia, sokpan, wa i ra miẹn mwẹ.

²⁹ Irẹnmwi ma he mwẹ emwi ne ọ khin ne uwẹ ẹdẹdẹmwẹdẹ, erriọ wa ma kue yọ ne uwa gha họn ẹmwẹ ne Nọyaẹnmwa.

³⁰ Wa ma he vbe gualọ ibude mwẹ ẹdẹdẹmwẹdẹ ra ne uwa danmwehọ vbe a gha dia uwa ye odẹ.

³¹ Rhunmwuda ọnii nian, wa miẹn emwi ne ọ ke ne uwa, uyinmwẹ uwa ọ re ọ ra si emianmwẹ ye uwa egbe.

³² Emwa ne ẹ i mwẹ ẹwaẹn wulo rhunmwuda iran he ẹwaẹn yotọ. Ai tie emwi emwi ọghe iran ne akpa ọ re ọ ra fuẹn iran an.

³³ Sokpan, ọmwaikọmwa ne ọ rhie ehọ mẹ ta yi, ẹkun gha sẹ ọre otọ. Ọ gha rrọ vbe a i mwẹ ẹbe, vbe ne emwi i na vbe rrọ ne ọ gha gie ohan gha mu ẹẹn.”