II Timoti 3 - Edo Bible (E Baibol Ẹdo) Version 1996

Ẹdẹ Okiekie

¹ U ghi yere o, orueghe nọkhua gha rrọọ vbe ẹdẹ okiekie.

² Rhunmwuda, emwa ghi khian ni rẹn enegbe iran ọkpa, iran ghi gha zuan, kevbe orhuọ, a ghi gha ya obọ so udu, iran ghi gha filo unu, iran i ghi họn ẹmwẹ evbibiẹ iran, emwa ẹse oghodan, iran i ghi ga Osanobua.

³ Iran i ghi mwẹ itohan, iran ghi rri vbe ekhọe, iran ghi ye unu rhia ọmwa ran, iran ghi gha yin uyinmwẹ ikẹtin, aro iran ghi gha kpannọ ugiọnmwẹ erhẹn, ohu emwi ne ọ maa ghi gha mu iran.

⁴ Iran ghi gha si uma isọtẹ, iran ghi gha zẹ esu, uhiomwẹ ghi zẹ iran udu ua. Iran ghi gha hoẹmwẹ egberọkhọmwẹ vbe ne iran i na hoẹmwẹ Osanobua.

⁵ Iran de obọ mu avbe emwi ne a ru ne agbọn miẹn, ni rre iyayi mwa, iran ghi he ẹtin ne ọ rrọọ. Wa bi egbe ne avbe emwa na.

⁶ Eso vbe uwu iran ghi gha la owa, iran ghi ya gha lo iran vbene ọ khọn iran, ighẹ avbe ikhuo ne emitan, ne abe oghẹ orukhọ ne iran ru, yẹnyẹn ginna otọ, kevbe ne aho ughughan khu khian,

⁷ ikhuo ni ho ne iran gha ruẹ emwi vbe ẹghẹ hia, sokpan iran i rẹn ẹmwata ni rrọọ ẹdẹ.

⁸ Zẹ vbene Janis kevbe Jambres gha gbe odan ghe Mosis, erriọ emwa na gbe odan ghẹ ẹmwata, emwa na, ekhọe iran i ghi winna, iran keghi vbe gbe akuọkan vbe iyayi.

⁹ Ẹ i ra mobọ mwẹ iran uhunmwu, rhunmwuda, agbọn hia gha do miẹn vbene iran kọn hẹ, zẹ vbene ọ sunu vbe egbe Janis kevbe Jambres.

Ibude Ne Okiekie

¹⁰ Sokpan, aro ruẹ sẹ emwi ne I ma emwa ẹre, kevbe uyinmwẹ mwẹ, u vbe miẹn iyayi mwẹ, izin egbe mwẹ, aho ẹmwẹ ọmwa mwẹ, kevbe vbene I hia hẹ.

¹¹ Ukpokpo ne a rhie mẹ, kevbe oya ne I re. U rẹn emwi ne ọ sunu vbe egbe mwẹ hia vbe Antiọk, Aikoniọm, kevbe Listra. Ukpokpo nọkhua ne I ya egbe miẹn. Sokpan Nọyaẹnmwa keghi miẹn mwẹ fan vbe ehia.

¹² Emwa hia ni ho ne iran gha yin uyinmwẹ ne ọ yẹ Osanobua, vbe a ya egbe ba Kristi, a gha zẹ iran kpokpo.

¹³ Sokpan avbe emwa dan kevbe ayunukpaegbe ghi gha rhia yọ rhia yọ, iran ghi gha mu emwa ọvbehe rẹrẹ, a ghi vbe gha mu iran tobọ iran rẹrẹ.

¹⁴ Sokpan zẹ vbe ọghe uwẹ, u ghi gha lele avbe ẹmwata ne a ma ruẹn re, kevbe ne uwẹ vbe yayi gbain. Rhunmwuda u rẹn emwa ni ma ruẹn emwi.

¹⁵ U vbe rẹn wẹ, ke ẹghẹ ọvbokhan ruẹn gha dee, u keghi wa rẹn Ebe nii, ne ọ sẹtin rhie nuẹn ighẹ ẹwaẹn ni ne ọ su ọmwa la imiẹnfan, vbe ekpa ne a na ya Kristi Jesu yi.

¹⁶ Rhunmwuda, Osanobua ọre ọ rhie ẹre ye iran ekhọe ighẹ emwa ni gbẹnnẹ avbe Ebe nii hia, ọ keghi vbe re emwi esiesi ne a ya ma emwa emwi ẹmwata ni, ne a ya gbe ọmwa hin ọkhọ rre, ne a ya rhie emwi ne a ma ru ẹse ye vbe ne ọ te kei yi, kevbe ne a ya bu ọmwa ude ne a gha yin ẹse.

¹⁷ Ne a miẹn ehe na miẹn wẹ, ọmwa ne ọ ga Osanobua ghi gha re ne a gbalọ ẹre egbe ye otọ, kevbe ne ọ sẹe ne ọ gha winna iwinna ne ọ maa hia.