II Timoti 2 - Edo Bible (E Baibol Ẹdo) Version 1996

Ovbiyokuo Ne Ọ Guobọ Kristi Jesu

¹ Zẹ vbe ọghe uwẹ, ovbi mwẹ, u ghi ya ẹsọhẹ ni, ne ọre ọghe ima vbe uwu a ya egbe ba Kristi, wegbe.

² U ghi viọ avbe ẹmwẹ nii ne u họẹn vbe I kpe orhu ẹre vbe odaro osẹe ni bun, u ghi viọ ne emwa ne u gha sẹtin mu ẹtin yan viọ mwẹ, emwa ni gha vbe sẹtin ma emwa ọvbehe re.

³ Ghae vbe uwu oya, zẹ vbe ovbiyikuo ne ọ guobọ Kristi.

⁴ Ovbiyokuo ne ọ ye yo igbinna, te ọ gha ho ne ọ ru emwi ne ọ gha yẹ arowa ne ọ gbe aro ghe iran, rhunmwuda ọnii, ẹ i khian gha gbe egbe avbe emwi ne emwa kẹkan ni rre ẹvbo ru.

⁵ Ọmọ ne egbe sasa, ne ọ vbe deba emwa rhulẹ ne a ya sinmwi emwi, ẹ i sẹtin miẹn emwi rhọkpa, vbe ẹ i re te ọ gha ru vbene uhi iku ni khare.

⁶ Ọwẹe ne ọ winna iwinna ne ọ wo vbe egbe, ọre ọ kere ne ọ ka gha zẹ, vbe emwi ne a rhọre vbe ugbo.

⁷ U ghi roro ẹmwẹ ne I ta na, rhunmwuda, Nọyaẹnmwa gha gu ẹe rẹn emwi ne a ya emwi hia kha.

⁸ Ye Jesu Kristi rre, ọmwa ne a huẹn kpaegbe vbe orinmwi, ovbi uniẹn Devid, zẹ vbene a ta ẹe vbe Iyẹn Ne ọ maa ne I kpe orhu ẹre.

⁹ Rhunmwuda ighẹ I kpe orhu nene Iyẹn Ne ọ maa, oya i ghi re, u hin ighẹ te a ghi guọ eghan yọ mwẹ obọ, zẹ vbe izigan. Sokpan a ma ya eghan mu ẹmwẹ Nọyaẹnmwa gba.

¹⁰ Ọna ọre ọ si ẹe, ne I na ya egbe miẹn emwi hia, rhunmwuda, emwa ne a hannọ zẹ ọghe Osanobua, ne imiẹnfan ne ọ rre uwu Jesu Kristi sẹtin vbe sẹ iran obọ, ke ẹe kevbe uyi etẹbitẹ.

¹¹ Ẹmwẹ ẹmwata ọna khin: wẹ, “Deghẹ ma wu lele ẹe, ma gha vbe gu ẹe gha rrọọ.

¹² Deghẹ ma ye zin egbe, ma gha vbe gu ẹe dakha. Deghẹ ma siẹn ọẹn, rẹn gha vbe siẹn mwa.

¹³ Deghẹ ma ma gia ya egbe yan, rẹn wa gia ye egbe yan. Rhunmwuda rẹn i sẹtin rẹrẹ egbe ẹre.” Ọmwa Iwinna Ne Ẹ I Ga Miẹn Okan

¹⁴ Ye avbe emwa ruẹn emwi na rre, kakabọ yan ma iran vbe odaro Osanobua wẹ, ne iran ghẹ gha khọn ye ẹmwẹ vbene a ta ẹe hẹ. Ẹ i mwẹ ere rhọkpa, emwa ni danmwehọ ọre ọ gbe ẹre okọ ye amẹ.

¹⁵ Lo ẹtin ruẹn hia ne u gha re ọmwa iwinna ne Osanobua rhan obọ miẹn, zẹ vbe ọmwa iwinna ne iwinna rẹn i mu ẹre ekhue, ọmwa, ne ọ ma emwa ẹre ẹse ighẹ ẹmwata Osanobua.

¹⁶ Ghẹ mwẹ obọ vbe imuanẹmwẹ akpa ne imuohan Osanobua i ye, emwi ne ọ sua emwa khian rrei ne Osanobua.

¹⁷ Emwi ne iran ma emwa ẹre ghi ye vbe okobẹtẹ ne ọ kẹkẹ egbe rrie. Eva vbe uwu iran ni maemwaemwi vberriọ ọrọre Himeniọs kevbe Filetọs.

¹⁸ Iran la hin odẹ ẹmwata rre nẹ, te iran ya iro iyayi han emwa iyayi eso, vbene iran na ta ẹe khian wẹ arhiọkpaegbe mwa sunu gberra nẹ.

¹⁹ Sokpan, a i sẹtin mu ẹyotọ ne gbain ne Osanobua gbe rueghe, a keghi gbẹnnẹ avbe ẹmwẹ na yan rẹn wẹẹ, “Nọyaẹnmwa rẹn iran ni re ọghọe” kevbe wẹẹ, “ọmwaikọmwa ne ọ ghi tie egbe ẹre ọghe Nọyaẹnmwa nẹ, te ọ kere ne ọ zobọ vbe emwi dan ne a ru.”

²⁰ Vbe owa ne ọ ghi kpolo nẹ, okpan kevbe uyẹngbe ughughan ọre ọ rrọọ, a ya igoru kevbe esiliva ru eso vbọ, a vbe ya erhan kevbe obuẹ ru eso vbọ, a ru eso ne a lo vbe ẹghẹ eso kpataki, eso vbọ keghi re ne a lo vbe ẹghẹ hia.

²¹ A deghẹ ọmwaikọmwa yuo egbe ẹre hin uwu avbe emwi dan na rre, rẹn ghi gha re ne a lo vbe ẹghẹ kpataki, rhunmwuda rẹn ya egbe fi ohan, ọ keghi vbe guobọ arowa ẹre, ọ mu egbe vbe ẹghẹ hia, ne a ya lo ẹre ye emwi ne ọ maa.

²² Gha bi egbe hin orriarria ibiẹka, u ghi gha gbinna ne emwi ẹmwata, iyayi, kevbe ahoẹmwọmwa kevbe ọfumwegbe vbe uwu a ku obọ gbe ba iran ni ye ekhọe ne ọ huanrẹn datie Nọyaẹnmwa, ne ọ yi iran obọ.

²³ Sokpan, gha lẹ ne igbagbanmwẹ akpa vbe abobo, u rẹnrẹn ighẹ ẹzọ ọre a ya mu ẹn ye otọ.

²⁴ Ọ ma kei ne ọguọmwadia e Nọyaẹnmwa gha gui ẹzọ. Ọ kere ne ọ gha tohan emwa hia, ọmaemwaemwi ne ọ maa kevbe ne ọ zin egbe.

²⁵ Ọmwa ne ọ ya urhu khuẹrhẹ tama ọmwa ne ọ gu ẹe suan, ehe ne ọ na bae ku. Ughaghe Osanobua gha rhie ẹkpotọ ne iran ya fi uyinmwẹ werriẹ, ne iran vbe do rẹn ẹmwata ne ọ rrọọ.

²⁶ Ẹghẹ nii aro ghi do hian iran, iran ghi lẹfe vbe obọ ifi ne Esu rhuẹre, ọmwa ne ọ te ka mu iran yi ọ na ya iran gha ru enegbe ẹre.