II Timoti 1 - Edo Bible (E Baibol Ẹdo) Version 1996

¹ E Pọl ne ukọ Kristi Jesu vbe ekpa iho ọghe Osanobua, ọmwa ne a gie ne ọ ya kpe orhu arrọọ ne a ve ima re, ne ima mwẹ vbe uwu a ya egbe ba Kristi Jesu.

² Gie Timoti, ovbi mwẹ ne ọ ghan: Osanobua ne Erha kevbe Kristi Jesu ne ọ rhie ẹsọhẹ nuẹn kevbe itohan kevbe ọfumwegbe.

Ekpọnmwẹ Kevbe A Rhie Ẹtin Ye Ọmwa Iwu

³ I kpọnmwẹ Osanobua, ọmwa ne I ya ekhọe sẹẹnrẹn ga, zẹ vbe ne avbe erha mwa odede vbe ru. I ghi gha kpọnmwẹ ọẹn vbe ẹghẹ hia ne I ya ye ruẹ rre vbe erhunmwu mwẹ, asọn kevbe avan.

⁴ I ye ameve ruẹ rre, I wa ho ne I miẹn ọẹn ẹsẹse, ne a miẹn ehe na ya oghọghọ sẹ mwẹ ọkẹn.

⁵ I ye iyayi ẹmwata ne u mwẹ rre, egbe ne edede ruẹ gha mwẹ ighẹ Luis, kevbe Yunis ne iye uẹ vbe gha mwẹ, mẹ yayi ighẹ wẹ vbe mwẹ ọnrẹn.

⁶ Rhunmwuda ọnọna, ọre I na ye ruẹ rre ne u yobọ da ẹe yi gbain ighe ọhẹ ne Osanobua ya wuẹ vbe ẹghẹ ne I na viọ obọ yan ruẹn uhunmwu.

⁷ Rhunmwuda, Orhiọn ne Osanobua rhie ne ima, ẹ i re ne ọ ya ima vbiẹre sokpan, te Orhiọn rẹn ya ẹtin vuọn ima kevbe aho ẹmwẹ ọmwa kevbe i ziengbe.

⁸ Rhunmwuda ọnii, ghẹ gie ekhue ẹmwẹ Nọyaẹnmwa ne a ta mu uẹn, erriọ, ghẹ vbe gie ekhue imẹ ne oleghan rẹn mu uẹn, sokpan vbe ghae vbe uwu oya ne a re ba ẹmwẹ nene Iyẹn Ne ọ maa zẹ vbene Osanobua rhie ẹtin nuẹn sẹ ya rriọe.

⁹ Ọ miẹn ima fan, ọ kevbe tie mwa ne a do gha re emwa irẹn, ẹ i re rhunmwuda emwi ne ima ru, sokpan vbe ọghe ekhọe obọ ẹre kevbe ẹsọhẹ. Ọ rhie ẹsọhẹ na ne ima nẹ, vbe uwu Kristi Jesu, ẹghẹ te do suẹn.

¹⁰ Sokpan banbanna nian, te a ghi do rhie ẹre ma ima, vbe uwu urremwẹ Kristi Jesu, ne Ọmiọnmwafan mwa. Rhunmwuda, Kristi khuọn ẹtin uwu ua nẹ, ọ keghi vbe la ekpa nene iyẹn ne ọ maa rhie agbọn a i wu ẹdẹ ma emwa.

¹¹ Osanobua zẹ mwẹ, ne I gha kpe orhu nene Iyẹn Ne ọ maa, zẹ vbe ukọ kevbe ọmaemwaemwi.

¹² Ọnii ọre ọ zẹẹ ne I na rri oya emwi na hia. Sokpan ekhọe mwẹ ma he beghe hiehiere, rhunmwuda, mẹ rẹn ọmwa ne I mu ẹtin yan, aro mwẹ da ẹe wẹ, ọ gha sẹtin rhie ẹre mwẹ vbe ne a i na mwẹ ẹbe ighẹ emwi ne ọ ka yọ mwẹ obọ, rhinrin ya sẹ Ẹdẹ ne ẹdẹrriọ.

¹³ Wẹ gha rhie owẹ lele ẹmwẹ ẹmwata ne I ma ruẹn re, zẹ vbe igiemwi ne u gha lele, u ghi mudia ye uwu iyayi kevbe aho ẹmwẹ ọmwa ne ọre ọghomwa vbe uwu a ya egbe ba Kristi Jesu.

¹⁴ Viọ iran mwẹ ighẹ avbe emwi esi ne a ka yuẹ obọ, vbe ekpa ẹtin ọ ghe Orhiọn Ne Ọ Huanrẹn ne ọ rre uwu ima.

¹⁵ Deghẹ u rẹnrẹn ighẹ emwa hia ni rre ikinkin Esia lẹ sẹ mwẹ rae nẹ, uwu iran ọre ọ ye ighẹ Figelus kevbe Hẹmogẹnẹs.

¹⁶ Nọyaẹnmwa ne ọ tohan igiowa Onisiforọs, rhunmwuda, ẹghẹ hia ọre ọ do ya gha mu mwẹ aro ze. Ekhue eghan ni ye ma mu ẹn.

¹⁷ Ọwarọkpa vbe ọ wa sẹ Rom, ọ kegha gualọ mwẹ khian rhinrin ọ te do miẹn mwẹ.

¹⁸ Nọyaẹnmwa ne ọ gi ẹe miẹn itohan Nọyaẹnmwa rhie vbe Ẹdẹ ne ẹdẹrriọ. U vbe rẹn ẹsẹse vbene ọ yọ mwẹ obọ hẹ vbe Ẹfisọs.