II Samuẹl 8 - Edo Bible (E Baibol Ẹdo) Version 1996

Okuo Ne Devid Khọnrẹn

¹ Ọ ghi kpẹe fua kherhe, e Devid keghi khọnmiotọ vbe uhunmwu ivbi e Filistin, ọ deyan iran, ọ na rhie iran obọ hin ẹmwẹ otọe nii ne iran kha yan rre.

² Iyeke ọnii, obọ ẹre keghi vbe gba ivbi e Moab, ọ na wẹ ne iran ne obọ vbare vbọ lovbiẹ lele otọ, a na gbele eva sẹ ọkpa rae vbe arhin eha. Ẹre emwa e Moab na do gha rre ototọ ẹre iran na gha ga gie ẹe.

³ Iyeke ọnii, obọ ẹre kevbe gba ọba ọghe Zeba ighẹ Hadadezẹ ne ovbi e Rehọb, vbe Hadadezẹ rrie odẹ Ẹzẹ Yufretes ehe ne ọ ra na ya dọlegbe kha ighẹ rẹn ọ yan otọe nii.

⁴ E Devid keghi khọn munọ arhin iyisẹn yan arria erẹnrẹn (1,700) vbe uwu iran ni hin ẹsin ẹnrẹn kevbe arriaisẹn ugie (20,000) vbe ivbiyokuo nii ya owẹ khian, ọ keghi vbe ya ẹsin nii si ikẹkẹ okuo ẹre khian uke, ọ na viọ ẹsin nii gha sẹtin si ikẹkẹ okuo iyisẹn (100) ye otọ vbọ.

⁵ Emwa e Siria ni rre Damaskọs na bu e Hadadezẹ gha khian ne iran ya ru iyobọ ne ẹẹn. E Devid keghi gbele arhin arriaisẹn evayanugie (22,000) vbe uwu iran.

⁶ Ọ keghi bu agọ ivbiyokuo ye iran ẹvbo, iran keghi khian eguọmwadia ẹre, iran na gha ga gie ẹe. E Nọyaẹnmwa kegha rhie akhọnmiotọ ne Devid vbe ehe hia.

⁷ E Devid keghi khọn mu avbe asa igoru ne emwa ni rre asẹ ọghe Hadadezẹ hẹ mwẹ, ọ na viọ gha rrie Jerusalẹm.

⁸ Ọ keghi vbe viọ oze ni bun vbe Beta kevbe Bertai ne ẹvbo ne Hadadezẹ gbe aro ghe.

⁹ E Toi ne Ọba e Hamat keghi họn ighẹ e Devid khọnmiotọ ivbiyokuo e Hadadezẹ hia.

¹⁰ Ọ keghi rhunmwuda ọnii gie ovbi ẹre ighẹ Joram bu e Devid ne ọba ne ọ ya we ẹre do kevbe ne ọ gbe ọbevbaru ne ẹẹn rhunmwuda ne ọ na khọn e Hadadezẹ muotọ, ọmwa ne irẹn vbe Toi ka gba gbinna inugba ne ọ khin. E Joram keghi viọ avbe emwi ne a ya esiliva, igoru kevbe oze ru mwẹ obọ gha khian.

¹¹ E Devid ne ọba, keghi ya ẹe fi ohan ne a gha lo ẹre vbe ugamwẹ, deba avbe esiliva kevbe igoru ne ọ viọ vbe avbe ẹvbo ne ọ he khọn miotọ.

¹² Ena ọrọre Idọm, e Moab, E Filistia kevbe Amẹlẹk, deba eso vbe emwi ne ọ miẹn e Hadadezẹ re.

¹³ E Devid ghi ke ehe ne ọ na ya gbele ivbi Idọm arriaisẹn evairrọvbugie (18,000) vbe Iya Umwẹ rre, ọ keghi dọlegbe hin usi yọ.

¹⁴ Ọ keghi bu agọ ivbiyokuo lele Idọm hia, emwa ni rrọọ kegha ga gie ẹe. E Nọyaẹnmwa keghi gie Devid gha khọnmiotọ vbe he hia.

¹⁵ E Devid kegha khaemwisẹ yan Izrẹl hia, ọ keghi gie a miẹn wẹ uyinmwẹ ẹmwata ne ọ gbae ọre a yin ghe emwa hia.

¹⁶ E Joab ne ovbi e Zeruaia kegha re ọkaolotu ivbiyokuo; e Jehosiafat ne ovbi Ahilud, kegha re ọka isiẹnmwẹro.

¹⁷ E Zadọk ne ovbi Ahitub, kevbe Ahimẹlẹk ne ovbi Abiata kegha re ohẹn; e Seraia kegha re ọgbẹn ebe ikotu.

¹⁸ E Benaia ne ovbi Jehoaida, kegha re ọkaolotu iran ne Devid hẹ gaga egbe, ivbi e Devid kevbe gha re ohẹn.