II Samuẹl 7 - Edo Bible (E Baibol Ẹdo) Version 1996

Uhunmwu Ne Natan Gie Gie Devid

¹ Vbe ẹghẹ na nian, te obọ e Devid ghi wa gba otọe arriọba ẹre hia ẹsẹse, e Nọyaẹnmwa keghi vbe rhie ẹre lẹre hin obọ avbe eghian rẹn hia rre.

² Ẹre ọba na tama e Natan ne akhasẹ wẹẹ, “Ghe, mẹ rre owa ne a ya sida bọ, sokpan, Ẹkpẹti Ile ọghe Osanobua rre uwu owa ukpọn.”

³ E Natan keghi wanniẹn wẹẹ, “Ru emwi ne ọ rhirhi gha rre uẹ ekhọe, rhunmwuda e Nọyaẹnmwa rrọọ yaba ruẹ.”

⁴ Sokpan, vbe asọn nii, e Nọyaẹnmwa keghi tama e Natan wẹẹ,

⁵ “Ya tama ọguọmwadia mwẹ ighẹ Devid wẹẹ, ‘Ẹ i re uwẹ ọ re ọ gha bọ Ọgua Osa mẹ ne I gha ye.

⁶ Ke ẹghẹ ne I ya viọ ivbi Izrẹl ke Igipt ladian gha dee, do sẹ banbanna, I ma he di Ọgua Osa ya, ehe ne I he la hia owa ukpọn ọre I dia.

⁷ Vbe ehe ne I lele ivbi Izrẹl la hia fẹẹrẹ, I ma he vbe nọ avbe ọkaolotu nii I wẹ ne ọ gha gbe aro ghe iran wẹ, vbọzẹ ne iran ma na bọ Ọgua Osa sida mẹ.’ ”

⁸ Rhunmwuda ọnii, ya tama Devid ne ọguọmwadia mwẹ wẹẹ, “Mẹ ne Nọyaẹnmwa ne Oghodua ọ re ọ tama rẹn wẹẹ, ‘I rhie ruẹ ke ehe ne u na su ohuan vbe uwu oha ladian ne u do su ivbi Izrẹl ne emwa mwẹ.

⁹ Te I wa mudia ke uẹ la ehe ne u he la hia, I keghi vbe khọn avbe eghian ruẹn hia mu otọ vbene u ya nana sikẹ odaro. I gha ya a khian enọkhua, u ghi do kpọlọ vbe emwa ni he hin ukhuan sẹ vbe agbọn na.

^10-11 I gha hannọ ihe ọkpa ne Izrẹl ne emwa mwẹ, I ghi gbe iran ẹkun sotọ vbe evba, ehe ne iran gha ye, ne a i ghi ra na kpokpo iran ọvbehe. Ke ne iran ya sẹ otọ na gha dee, emwa dan ne piankhanrhan ni bun ọ re ọ he gu iran gbinna, sokpan, ọna i ghi ra dọlegbe sunu ọvbehe. I yan rẹn i ghẹ I gha degue ruẹ hin obọ eghian uwa hia rre, kevbe wẹ, u gha mwẹ uniẹn ruẹn.

¹² Wẹ gha ghi wu, a na vbe re ruẹ ba avbe erha a odede nẹ, I gha ya ọkpa vbe uwu ivbi uẹ ma ọba, I ghi vbe gie arriọba ẹre digiẹ.

¹³ Rẹn ọ re ọ gha bọ Ọgua Osa mẹ, I gha vbe mu ẹẹn wẹ te uniẹn ọnrẹn gha rriọba ẹdẹdẹmwẹdẹ.

¹⁴ Mẹ gha re erha ẹe, rẹn ghi vbe gha re ovbi mwẹ. Ọ gha ba emwi ku ru, I ghi rri ọre oya zẹ vbene erha rri ovbi ẹre oya.

¹⁵ Sokpan I i ra fi iyeke gbe ẹe vbene I fi iyeke gbe Sọl ne I rhie hin evba rre, ne uwẹ miẹn ehe na do rriọba.

¹⁶ U gha mwẹ uniẹn ruẹn khian rhinrin. I ghi vbe gie arriọba ruẹ gha rrọọ rhinrin ẹdẹ. Akhaemwisẹ arriọba ruẹ ẹ i ra fo ẹdẹ.’ ”

¹⁷ E Natan keghi ya tama e Devid, emwi hia ne Osanobua rhie ma rẹn.

Erhunmwu Ekpọnmwẹ Ne Devid Naẹn

¹⁸ E Devid ne Ọba kegha rrie uwu Owa Ukpon e Nọyaẹnmwa nii, ọ keghi tota, ọ na na erhunmwu wẹẹ, “E Nọyaẹnmwa ne Udazi, mẹ kevbe ẹgbẹe mwẹ, ne ọ sẹe ne ọ kere ne a ru emwi ne u he ka ru mẹ hia na, sẹẹ hia,

¹⁹ u keghi vbe dọlegbe ru eyan nian vbe ekpa ọghe uniẹn mwẹ vbe ẹdẹ ne akhuẹ. Wẹ keghi vbe gie aro ọmwa sẹ ọnọna, e Nọyaẹnmwa ne Udazi,

²⁰ De emwi ne I gha ghi ye tama ruẹn yi! Wẹ rẹn mẹ ne ọguọmwadia ruẹ.

²¹ I ho ruẹ kevbe iziro ekhọe ruẹ nọ ne u ru ọna, te u ru avbe emwi ọrhẹnrhẹn na, ne u ya rhie irẹnmwi mẹ.

²² A miẹn vbe u kpọlọ hẹ Nọyaẹnmwa ne Udazi! Ọvbehe ne ọ yevbe ruẹ, ẹ i rrọọ, ma wa rẹn ke otọ gha dee ighẹ wẹ ọkpa ọrọre Osanobua.

²³ Ẹvbo ọvbehe i rre otọ agbọn ne ọ ye vbe Izrẹl ne emwa ruẹn ne uwẹ miẹnfan hin ọviẹn ọmwa ne iran do gha re emwa ruẹn. U ya egbe ruẹ hin usi, u keghi ru emwi ni kpọlọ kevbe ni yunnuan ne iran, vbene u na khulo avbe agbọn ẹvbo kevbe avbe ẹbọ iran kua hin odaro emwa ruẹn rre, vbene iran ya nana sikẹ odaro. Emwa ne uwẹ faẹn vbe irri vbe Igipt ne iran do khian ọwuẹ.

²⁴ Wẹ ya Izrẹl ne emwa ruẹn khian ọwuẹ nẹ ẹdẹdẹmwẹdẹ, wẹ ne Nọyaẹnmwa keghi vbe khian Osanobua iran.

²⁵ “Wanwanna nian, e Nọyaẹnmwa Osanobua, eyan ne u yan rẹn vbe ekpa mwẹ kevbe ẹgbẹe mwẹ, gie ẹe gha re ne u mu sẹ ke orre yasẹ orre, ne u vbe ru emwi ne u khare ighẹ u gha ru.

²⁶ Usi ruẹ gha kpọlọ ẹdẹdẹmwẹdẹ, emwa ghi vbe gha kha wẹẹ, ‘E Nọyaẹnmwa ne Oghodua ọrọre Osanobua Izrẹl.’ U gha vbe gie uniẹn arriọba mwẹ gha rrọọ ẹdẹdẹmwẹdẹ.

²⁷ Nọyaẹnmwa ne Oghodua, Osanobua ivbi Izrẹl, rhunmwuda ne uwẹ na rhie emwi na ma ime ne ọguọmwadia ruẹ, vbene u na tama mwẹ wẹẹ, u gha ya uniẹn mwẹ rriọba ọ re ọzẹe ne ohan na gunmwẹ na erhunmwu vbenian ghe ruẹ.

²⁸ “Banbanna nian, Nọyaẹnmwa ne Udazi, Osanobua ọre u khin, te U mu eyan ruẹn sẹ ẹghẹ hia, u kevbe ru eyan ọ yunnuan na ne imẹ.

²⁹ Banbanna nian, lahọ, fiangbe uniẹn mwẹ ne iran gha miẹn aro ne ọ maa ruẹn khian ẹdẹ. Wẹ ne Nọyaẹnmwa ne Udazi, yan ọna yotọ nẹ, te afiangbe ruẹ ra gha rre uniẹn mwẹ egbe ẹdẹdẹmwẹdẹ.”