II Samuẹl 6 - Edo Bible (E Baibol Ẹdo) Version 1996

A Mu Ẹkpẹti Ile Gha die Jerusalẹm

¹ E Devid keghi vbe dọlegbe si ivbiyokuo ni ghi maa sẹẹ vbe Izrẹl koko, ehia keghi do gha re arriaisẹn ọgban (30,000).

² Ọ keghi viọ iran gha rrie Baala vbe Juda, ne ọ ya mu ẹẹn rre ighẹ Ẹkpẹti Ile Osanobua ne a he ẹre eni Nọyaẹnmwa ne Oghodua, ne ọ tota ye Ẹkpẹti ẹnrẹn vbe adesẹneva emwi ne a yi ni mwẹ ifuẹn nii.

³ Iran keghi mu ẹẹn yan okotọ ọgbọn, iran keghi ya mu ẹẹn ke owa Abinadab ne ọ rre uhunmwu oke gha dee. Uzza kevbe Ahio ne ivbi Abinadab ọ re ọ dia nene okotọ.

⁴ Ne ọ mu Ẹkpẹti Ile dee, Ahio kegha rre odaro.

⁵ E Devid kevbe ivbi Izrẹl hia keghi wa gha ya ẹtin iran hia ku iran na gha so ihuan ne iran ya rho e Nọyaẹnmwa. Iran kegha kpe akpata, ẹgiọn, e ma, ẹgogo kevbe ukusẹ.

⁶ Iran ghi sẹ otọe ne Nakọn na khuọn ọka, ẹmila keghi rrua owẹ, ẹre Uzza na niẹn obọ ya da Ẹkpẹti Ile nii yi.

⁷ Vbe ọwarọkpa nii, ohu Uzza keghi mu e Nọyaẹnmwa, Ọ keghi gbe ẹe rua rhunmwuda, udinmwẹ amiọmwafo ọghe ọe, ẹre Uzza na wu ye evba, vbe ọkpẹn Ẹkpẹti Ile nii.

⁸ Ọnii ọzẹe ne a na tie evba nii Pẹrẹs Uzza do sẹ ẹdẹnẹrẹ na. Ohu keghi kakabọ mu e Devid ye ne Nọyaẹnmwa na ya ohu rri Uzza oya vberriọ.

⁹ Ohan e Nọyaẹnmwa kegha mu e Devid, ọ keghi kha wẹẹ, “Ohan gha ye gun mwẹ mu Ẹkpẹti Ile gha khian nian?”

¹⁰ Rhunmwuda ọnii, ọ na wẹ rẹn ighi mu rri e Jerusalẹm ne ẹvbo ẹre, ọ na ghi fi egbe werriẹ, ọ na mu ẹẹn gha rrie owa Obẹd Idọm ne ọ ke ẹvbo Gat rre.

¹¹ Ọ keghi gbe uki eha vbe evba, e Nọyaẹnmwa keghi fiangbe Obẹd Idọm ke ẹe kevbe ẹgbẹe ọre.

¹² E Devid ne ọba keghi do họn wẹẹ, e Nọyaẹnmwa wa fiangbe ẹgbẹe Obẹd Idọm kevbe emwi ne ọ mwẹ hia, rhunmwuda Ẹkpẹti Ile ọ keghi rhunmwuda ọnii ya mu ẹẹn vbe owa Obẹd rre ne ọ do kpee mu ẹẹn gha rrie Jerusalẹm.

¹³ Iran ni mu Ẹkpẹti Ile nii ghẹ ghi vbe zẹ owẹ ehan, e Devid ghi ya ẹkhuia ẹmila kevbe ohuan ne ọ tii zọ ese ghe Nọyaẹnmwa.

¹⁴ Ukpọn eto ovbiohuẹ ọkpa ọ re Devid rra mu ẹkun, ọ kegha ya ẹtin ẹnrẹn hia kuu ne ọ ya ya ọghọ ne Nọyaẹnmwa.

¹⁵ Rẹn kevbe ivbi Izrẹl hia keghi gba mu Ẹkpẹti Ile nii gha die Jerusalẹm kevbe uwemwẹ oghọghọ kevbe urhu okpe.

¹⁶ A ghi wa mu Ẹkpẹti ni sẹ ore ẹvbo, e Mikal ne ovbi e Sọl ne okhuo keghi yọn urhu la ewindo ladian, ọ keghi ya bẹghe Devid ne ọba vbe ọ kuu, ọ gha fi obodo, ọ keghi wa sọnnọ ẹẹn ruan vbe aro.

¹⁷ Iran keghi mu Ẹkpẹti ni rre, iran keghi mu ẹẹn ye ihe ẹre vbe ehe ne Devid mwamwa khẹ ọre. Ọ keghi zẹ ese, ọ na si isara ghe Nọyaẹnmwa.

¹⁸ Ọ ghi zọ ese fo nẹ ọ keghi ya eni e Nọyaẹnmwa ne Oghodua fiangbe emwa nii.

¹⁹ Ọ keghi mu ebrẹd ọkpọkpa ne dọmwadẹ ikpia kevbe ikhuo ni rre Izrẹl kevbe emiowo ne aranmwẹn deba ọmọ erhan eso ne a re. Ẹre dọmwadẹ ọghọe na gha rrie owa.

²⁰ E Devid keghi dọlegbe gha rrie owa ya tuẹ emwa rẹn. E Mikal ne ovbi e Sọl nokhuo keghi ya khian vba ẹre, ọ tama rẹn wẹẹ, “Ọba Izrẹl wa vbe mu eni ne ọ hin usi ne egbe ẹre ẹrẹna. Ọ na wa bannọ egbe ua ye otọ zẹ vbe ọzuọ vbe odaro eguọmwadia ni ikhuo ọghe avbe emwa ni rre asẹ vbe ototọ ẹre.”

²¹ E Devid keghi wanniẹn wẹẹ, “Te I gha kuu ne I ya ya ọghọ ne Nọyaẹnmwa ne ọ rhie obọ gberra erhaa kevbe ẹgbẹe ruẹ ọ na do zẹ mwẹ ne ọ ya mwẹ ru ọkaolotu ivbi Izrẹl ne emwa rẹn. Ẹn ẹn te I khian ye gha ku khian, ne I ya ya ọghọ ne Nọyaẹnmwa.

²² Ne I ya dọlegbe fa egbe mwẹ uan sẹẹ ayọ. Wẹ sẹtin gha ro wẹ mẹ i re ọmwa, sokpan te avbe emọ ikhuo ni khian gha ghe mwẹ gẹdẹgbẹẹ.”

²³ E Mikal ne ovbi e Sọl ne okhuo ma miẹn ọmọ biẹ.