II Samuẹl 4 - Edo Bible (E Baibol Ẹdo) Version 1996

Iran De Isbosiẹt Izigha

¹ Ugbẹn vbe Isbosiẹt ne ovbi e Sọl ghi họn ighẹ iran gbe Abna rua vbe Hibrọn. Ohan keghi mu ẹẹn, afianma kegha vbe fian ivbi Izrẹl hia.

² Isbosiẹt kegha mwẹ arhin eva ni rre asẹ, iran ni ya gha fu emwi giẹe, iran na kegha re Baana kevbe Rekab ne ivbi e Rimọn ne ovbi ẹvbo ne a tie ẹre Biẹrot vbe ẹwae Bẹnjamin. (Otọe e Bẹnjamin ọ re a ka Biẹrot ba.

³ Emwa ni ka yin ẹnrẹn lẹkua gha rrie Giteim, evba ọ re iran ghi ye ke ẹghẹ nii gha dee.)

⁴ E Jonatan ne ovbi e Sọl kegha mwẹ ọmọ, ne a tie ẹre Mẹfibosiẹt. Ẹghẹ ne ọ na rre ọmọ ukpo isẹn ọ re a na họn emwi ne ọ sunu vbe egbe Sọl kevbe Jonatan vbe ne iran ta ẹe ke Jezrẹl rre. Ọmwa ne ọ gha koko ẹe keghi wa tọn ẹn mu, ọ na lẹ sokpan, ehe ne ọ na khirhi khian ni, ọ keghi fe ẹre obọ degbe otọ, ọ re ọ na khian uke.

⁵ Rekab kevbe Baana kegha rrie owa Isbosiẹt iran na sẹ evba vbe ẹghẹ ogiavan vbe ẹghẹ ne ọ ya hẹwẹ vbe avan nii.

⁶ Ovbe kegha gbe okhuo ne ọ rre onurho vbe ehe ne ọ na khan ọka, ọ keghi vbiẹ ua, rhunmwuda ọnii, e Rekab kevbe Baana keghi ba la owa.

⁷ Iran ghi sẹ uwowa nẹ, iran la ughugha ne Isbosiẹt vbiẹ, iran na gbẹe rua. Iran keghi fian ẹre uhunmwu, iran na mu kpa, iran keghi ya asọn hia khian vbe Iya e Jọdan.

⁸ Iran na mu uhunmwu ẹnrẹn gie Devid ne Ọba vbe Hibrọn, iran tama rẹn wẹẹ, “Ghe uhunmwu Isbosiẹt ne ovbiye Sọl ne oghian an, ọ te gha ho ne ọ gbe uẹ ua. Vbe ẹdẹ nẹrẹ na nian, e Nọyaẹnmwa khọn ekhae nuẹn, Umogun, vbe egbe Sọl kevbe uniẹn ọnrẹn.”

⁹ E Devid keghi wanniẹn iran wẹẹ, “I vẹn ihẹn vbe eni e Nọyaẹnmwa nọ rrọọ ne ọ miẹn mwẹ fan vbe uwu ẹbe hia.

¹⁰ Ọmwa ne a gie ẹre uhunmwu, ne ọ do tama mwẹ vbe Ziklag ighẹ Sọl wu, te gha ro ighẹ iyẹn esi rẹn do na. I keghi gua ẹe rhie, I na wẹ ne a gbẹe rua. Ọnii ọ re emwi ne I ya san ẹre ẹse ye iyẹn esi ne ọ do na!

¹¹ Inuinu ọ re iran gha ya khọ sẹ ighẹ emwa dan, ni ya gbe ọmwa ne ọ ma rukhọ ye irri ovbe vbe owa ẹre. Te i ra rria uwa ikhi ha ẹmwẹ ne uwa na de ẹre izigha na, I gha wabọ uwa hin agbọn na rre.”

¹² E Devid keghi wẹ ne emwa rẹn gbele Rekab kevbe Baana, iran keghi gbele iran uan, iran na giagia iran obọ giagia iran owẹ, iran na silo iran lẹe rrọ ye ọkpẹn uhẹnhẹn amẹ ọghe Hibrọn. Ira keghi mu uhunmwu Isbosiẹt, iran na re ẹre ye idin Abna vbe Hibrọn.