II Samuẹl 3 - Edo Bible (E Baibol Ẹdo) Version 1996

¹ Igbinna na keghi wa kpẹe vbe otọ ne iran ni rre ọghe igiowa e Sọl, kevbe ni rre obọ ọghe e Devid gha gu egbe gbinna. E Devid keghi wa gha ye owẹ muotọ yọ, sokpan ọghe ne iran gba suan kegha yẹkẹ yọ.

Ivbi E Devid Nikpia

² Emọ ehan ne Devid biẹlẹe vbe Hibrọn ọ re ena khin zẹ vbene a ya biẹlẹ iran lele egbe. Ne ọdiọn kegha re Amnọn ne a tie iye ẹe Ahinoam ne ovbi e Jezrẹl;

³ Ne ogieva kegha re Kiliab, ne a tie iye ẹe Abigẹl ne ọ de ẹgbẹe vbe obọ Nabal ne ovbi Kamẹl; ne ogieha kegha re Absalọm, ne a tie iye ẹe Maaka, ovbi e Talmai ne ọba Gẹsiọ;

⁴ Ne ogienẹ kegha re Adonaija, ne a tie iye ẹe Hagit, ne ogisẹn kegha re Siefatia ne a tie iye ẹe Abital;

⁵ ne ogiehan kegha re Itrim ne a tie iye ẹe Egla e Hibrọn ọ re a na biẹlẹ iran na hia.

Abna Deba E Devid

⁶ Igbinna ne ivbiyokuo e Sọl kevbe ọghe Devid gbinna zẹ sun vbe otọ Abna keghi do khian ne ọ ghi mwẹ ẹtin yọ vbe uwu avbe emwa Sọl.

⁷ Ọ ghi sẹ ẹdẹ ọkpa, Isbosiẹt ne ovbi e Sọl keghi ba Abna ifi ẹzọ wẹ ọ gu Rizpa ne ovbi Aia ne okhuo kevbe egbakhian e Sọl ru emwi ọdọ vbe amwẹ.

⁸ Emwi na keghi wa ya ohu mu Abna ẹsẹse, ọ keghi kha wẹẹ, “Te uwẹ ghi ro ighẹ I gha hiẹ e Sọl ra? Wa ke otọ gha dee, te I wa mu ẹmwẹ e Sọl ne erha a yan uhunmwu, kevbe etiọnrẹn, kevbe esiọre. Mẹ ọre ọ vbe zẹ ne Devid ma na he khọn miẹn ruẹn otọ, ọ re u na ghi do gha gun mwẹ gui ẹzọ okhuo na!

^9-10 E Nọyaẹnmwa yan ma e Devid wẹ rẹn gha mu arriọba hin obọ e Sọl kevbe uniẹn ọnrẹn hia rre, rẹn ghi ma e Devid ọba Izrẹl kevbe ọghe Juda la ehe ne otọe nii sẹe, ehe ne ọ rhanmwẹ. Banbanna nian, te Osanobua gha kinmwi mwẹ gbe ua, a deghẹ I ma ru ẹe ne ọ gele do sẹ vberriọ!”

¹¹ Ohan Abna keghi mu Isbosiẹt sẹ vberriọ wẹ, ọ ma zẹdẹ guan hiehiere.

¹² Vbe ẹghẹ ne a kha na, e Devid kegha rre Hibrọn, ọ re Abna na gie emwa ya khama rẹn wẹẹ, “De ọmwa ne ọ ra rriọba yan otọe na yi? Gun mwẹ hẹnhẹn unu ẹnrẹn, I gha ru iyobọ ne uẹn ne I viọ Izrẹl hia ne iran do khian ọwuẹ.”

¹³ E Devid keghi wanniẹn wẹẹ. “Ọ wa maa!” Emwi ọkpa rrọọ ne u gha ru ne I guẹ hẹnhẹn unu ẹnrẹn kugbe, ọ ni nọ wẹẹ, “U gha dee do miẹn mwẹ, u ghi rhie Mikal ne ovbi e Sọl ne okhuo gun mwẹ.”

¹⁴ Ọ re Devid na gie ne a tama Isbosiẹt wẹẹ, “Rhie Mikal ne ọvbokhan mwẹ gun mwẹ, ukpikolo e Filistin iyisẹn (100) ọ re I hae yọ ya rhie ẹre rọnmwẹ.”

¹⁵ Ọ re Isbosiẹt na ya miẹn Paltiẹl ne ovbi e Lais ne ọdafẹn ọnrẹn re.

¹⁶ E Paltiẹl keghi wa viẹ lele ẹe do sẹ ẹvbo ne a tie ẹre Bahurim. Ẹre Abna na tama rẹn. “Werriegbe ne u gha rrie owa.” Ọ keghi gele gha rrie.

¹⁷ Abna keghi bu avbe olotu ivbi Izrẹl gha khian, ọ na tama iran wẹẹ, “Ke ẹghẹ ne ọ kpẹre gha dee, ọ re uwa kegha ho ne Devid gha re ọba uwa.

¹⁸ Banbanna nian, ẹkpotọ rrọọ ne uwa. Wa yerre wẹẹ Nọyaẹnmwa ta ẹe nẹ wẹẹ, ‘E Devid ne ọguọmwadia mwẹ ọ re I ra la obọ ẹre fannọ emwa mwẹ yotọ vbe obọ e Filistin kevbe obọ eghian iran ọvbehe hia.’ ”

¹⁹ Abna keghi vbe gu emwa ẹwae Bẹnjamin guan, ọ kevbe gha rrie Hibrọn ya tama e Devid emwi ne emwa Bẹnjamin kevbe ivbi Izrẹl khare ighẹ, iran ra ru.

²⁰ Abna keghi viọ arhin ugie ba egbe bu e Devid gha die Hibrọn. E Devid keghi le evbare ya mu ọghọ ye iran egbe.

²¹ Abna keghi tama e Devid wẹẹ, “I ra ya fi emwa Izrẹl hia ekhọe werriẹ ne iran do gha re ọwuẹ nian Umogun. Iran gha rhan obọ miẹn ruẹn zẹ vbe ọba iran. Ẹghẹ nii emwi ne u ho ghi do sẹ uẹ obọ, u ghi do rriọba yan otọe nii hia.” E Devid keghi yan ma Abna wẹ, emwi rhọkpa i ra ru ẹe, ọ na zẹ ọre urrie.

Iran De Abna Izigha

²² Vbe iyeke ọnii, e Joab kevbe emwa e Devid nekpa ni rre asẹ keghi ke ehe ne iran na ya fu emwi viọ rre, iran na viọ emwi ni bun ne obọ iran vba re gha dee. Sokpan, Abna i ghi rre ehe ne Devid ye vbe Hibrọn, rhunmwuda, e Devid zẹ ọ re urrie nẹ, ọ kevbe yan ma rẹn ighẹ emwi rhọkpa i ra ru ẹe.

²³ E Joab kevbe emwa rẹn ghi rre, iran keghi tama rẹn wẹẹ, Abna do miẹn Devid ne ọba, ọ kevbe zẹ ọ re urrie ba eyan wẹ emwi rhọkpa i ra ruẹe.

²⁴ E Joab keghi rhunmwuda ọnii bu ọba gha khian, ọ tama rẹn wẹẹ, “De emwi ne u ru na yi? Abna bu ruẹ gha dee, vbe u a na gie ẹe gha rrie hẹ vberriọ?”

²⁵ Te ọ rre do rẹrọọ, ne ọ do rẹn ehe ne u yo hia, kevbe emwi ne u ru hia. Wẹ tobọọ rẹn ọnii!

²⁶ E Joab ghi kpao vbe ehe ne Devid ye rre nẹ, ọ keghi gie ne iran ya rhie Abna rre, iran ya tie ẹre ke uhae Sira gha dee. Sokpan, e Devid ma rẹn hiehiere.

²⁷ Abna ghi sẹ Hibrọn, e Joab keghi rhie ẹre ghe efẹn ọkpa vbe onurho ẹvbo vbe ne a miẹn wẹ te ọ ra si ẹre uma, ọ keghi bi agbada ye ọre ẹko vbe evba. Rhunmwuda ọnii, iran keghi gbe Abna an, rhunmwuda ne ọ na gbe Asahẹl ne ọtẹn Joab.

²⁸ E Devid ghi họn ẹmwẹ na, ọ keghi kha wẹẹ, “E Nọyaẹnmwa rẹnrẹn wẹ imẹ kevbe emwa mwẹ, ma ma rẹn ọkpa, a ma rẹn eva vbe ugbemwẹ ne iran gbe Abna re.

²⁹ Uhunmwu ọ re Joab kevbe ẹgbẹe ọre gha ya khiọ re. Ke orre ya sẹ orre, te a gha miẹn vbe uwu ẹgbẹe ọre ne ọ khuọnmwi atọrhi ra emwirregbekẹn, ra ne a miẹn wẹ iwinna okhuo ọkpa ọ re ọ sẹtin winna, ra ne a gbe ua vbe okuo, ra ne ẹ i miẹn evbare unu re!”

³⁰ Erriọ ọ re a na miẹn wẹ e Joab kevbe Abisiai ne ọtiọnrẹn na gbe Abna an, rhunmwuda ighẹ ọ gbe Asahẹl ne ọtẹn iran vbe okuo Hibrọn.

A Re Orinmwi Abna

³¹ Ẹre Devid na wẹ ne Joab kevbe emwa rẹn sọ ukpọn iran uan, ne iran viọ ukpọn akhiẹ rhuan, ne iran khiẹ Abna. Ugbẹn vbe iran ghi re ẹre, e Devid ne ọba tobọ ẹre keghi ya owẹ khian lele ẹkpẹti orinmwi ẹnrẹn.

³² Iran keghi re Abna ye Hibrọn. Ọba keghi kpe orhu eve ua vbe ọkpẹn idin ẹnrẹn, erriọ emwa rẹn hia vbe ru.

³³ Vbenian ọre Devid ya viẹ Abna: “Vbọzẹ yi ne Abna na wu zẹ vbe ọzuọ?

³⁴ A ma gba ẹre obọ, a ma rro ẹre owẹ ọ wu zẹ vbe ọmwa ne izigan gbe.” Avbe emwa ni keghi dọlegbe kpe orhu eve ua ya viẹ ọe.

³⁵ Emwa nii keghi te gha rherhe e Devid wẹ ne ọ rri evbare vbe ẹdẹ te mu ẹdẹrriọ, sokpan rẹn keghi yan wẹẹ, “Te Osanobua gha kinmwi mwẹ gbua a deghẹ I ya unu kan evbare ẹdẹ te mu ẹrẹna.”

³⁶ Iran ghi miẹn emwi na, ọ keghi wa yẹ iran, vbe ne ẹmwata, emwi hia ne ọba ru keghi wa yẹ emwa nii.

³⁷ Emwa e Devid hia kevbe emwa Izrẹl hia keghi rẹn wẹ ọba i mwẹ obọ vbe ẹmwẹ uwu ọghe Abna.

³⁸ Ọba keghi tama emwa rẹn ni rre asẹ wẹẹ, “Wa ma rẹn wẹ ọkaolotu nọkhua ọ re ọ wu vbe Izrẹl ẹrẹna?

³⁹ A gha rhe miẹn wẹ mẹ ọrọre ọba ne Osanobua hannọ zẹ, egbe wa wọ mwẹ yotọ ẹrẹna. Ẹtin mwẹ isẹ ẹmwẹ ọkpankpan ivbi Zeruaia na. Te Nọyaẹnmwa gha ru avbe izigan na emwi ne ọ ma iran.”