II Samuẹl 24 - Edo Bible (E Baibol Ẹdo) Version 1996

E Devid Ka Avbe Emwa Rẹn

¹ Vbe ẹghẹ ọkpa ohu Izrẹl kegha mu e Nọyaẹnmwa, ọ na sua e Devid ne ọ mu ọlọghọmwa gie iran. E Nọyaẹnmwa na tama rẹn wẹẹ, “Ya ka emwa Izrẹl kevbe Juda.”

² Ẹre Devid na tama e Joab ne ọkaokuo ẹre wẹẹ, “Viọ emwa iwinna ruẹn mwẹ obọ, ne uwa la ẹwae Izrẹl hia khinkhian ne uwa ka emwa hia. I ho ne I rẹn inu ne iran khin.”

³ Sokpan, e Joab keghi wanniẹn wẹẹ, “Umogun, te Nọyaẹnmwa ne Osanobua ruẹ gha gie ivbi Izrẹl muan yọ ukhukhu arriaisẹn sẹ vbene iran ye na, te u gha vbe tọ ne aro ruẹ sẹ ọe vbe ọ gha ru ẹe. Sokpan vbọzẹ ne u na ho ne u ru emwi na yi Umogun?”

⁴ Sokpan, ọba keghi ya tua Joab kevbe emwa iwinna rẹn, ne iran ru vbene irẹn khare; iran keghi kpao vbe odaro ẹre rre, iran na ladian ne iran ya ka ivbi Izrẹl.

⁵ Iran keghi fian e Jọdan rra, iran na bu agọ ye odẹ ekẹn Aroa, ne ẹvbo ne ọ rre iya vbe otọ e Gad. Evba iran keghi kpao gha rrie odẹ okuọ vbe Jeza,

⁶ yasẹ Giliad kevbe Kedẹs vbe otọ Hiti. Iran na vbe gha rrie Dan, iran na ke Dan mu aro da odẹ orrie yasẹ Saidọn.

⁷ Iran keghi vbe la ghe odẹ ekẹn ya sẹ e Taia ne ẹvbo ne a gbe odin gaa, iran keghi ya la ẹvbo avbe Hivi kevbe Kenan, vbe okiekie ehia, iran na ya sẹ biẹsiẹba vbe odẹ ekẹn Juda.

⁸ Iran gbe uki ihinrin kevbe ikpẹdẹ ugie nẹ, iran keghi dọlegbe gha die Jerusalẹm vbe iran ghi la ẹvbo ni hia khinkhian nẹ.

⁹ Iran keghi na iyẹn ma ọba vbene iran bun sẹ ighẹ avbe emwa ni gha sẹtin yo okuo hia: iran kegha re arriaisẹn uri enẹ (800,000) vbe Izrẹl, kevbe arriaisẹn iyisẹn yan uri eva (500,000) vbe Juda.

¹⁰ Sokpan, ugbẹn vbe Devid ghi ka ẹvbo nẹ, ekhọe ẹre kegha gu ẹẹ gui, ọ keghi tama e Nọyaẹnmwa wẹẹ, “Emwi ne I ru na, orukhọ dan ọ re I wa ya ẹe ru! Lahọ, yabọ mwẹ. Emwi akpa ọ re I wa ru.”

^11-12 Ẹre Nọyaẹnmwa na tama akhasẹ ighẹ Gad ne ọbiro e Devid wẹẹ, “Ya tama e Devid wẹ emwi eha ọre I ra viọ ne ẹẹn ne ọ zẹ vbọ, ne ọ ghi zẹ vbọ ọ re I khian ru.” E Devid ghi rhiọrre vbe owiẹ ne ọ lele ẹe,

¹³ e Gad keghi bu ẹre gha khian, ọ na ya tama rẹn vbene Nọyaẹnmwa kha hẹẹ, ọ keghi nọ rẹn wẹẹ, “De ne u ho vbọ? Ne ukhunmwu fi la ikpiia vbe otọe ruẹ? Ne avbe eghian ruẹn gha khuẹ khian la uki eha? Ra ne egboghogbogho ya ikpẹdẹ eha lomi vbe otọe ruẹ? Banbanna nian, rorẹe ne u rhie ewanniẹn mẹ rhie gie Nọyaẹnmwa.”

¹⁴ E Devid keghi wanniẹn, “Te I la ẹmwẹ na! Sokpan, I i ho ne emwa nagbọn rriọmwẹ oya. Gie Nọyaẹnmwa tobọ ẹre rri ima oya, rhunmwuda, ọ mwẹ itohan.”

¹⁵ Ẹre Nọyaẹnmwa na fi egboghogbogho fi Izrẹl ke owiẹ ya sẹ ẹghẹ ne ọ rhie yọ, ke obọkpa vbe ẹvbo nii ya sẹ obọ nọkpa, ivbi Izrẹl ni wulo kegha re arriaisẹn ekigbe siyenẹ (70,000).

¹⁶ Ugbẹn vbe odibo e Nọyaẹnmwa ghi te ra fuẹn Jerusalẹm rua, e Nọyaẹnmwa keghi fi ekhọe werriẹ vbe oya ne ọ te rhie emwa ni re, ọ keghi tama odibo Osa nii ne ọ te gbele iran wẹẹ, “Dobọyi! Ọnii sẹe!” Ehe ne odibo Osa nii gha ye keghi re isi okọ ọghe Arauna ne ovbi e Jebus.

¹⁷ E Devid keghi bẹghe odibo Osa ne ọ gbele emwa nii, ọ keghi tama e Nọyaẹnmwa wẹẹ, “Mẹ ọrọre ọmwa ne ọ rri abe, mẹ ọ re ọ ba emwi ku ru. De emwi ne ivbi ẹrrẹe na ru? Rri imẹ vbe ẹgbẹe mwẹ oya.”

¹⁸ Vbe ẹdẹ ne ẹdẹrriọ zẹẹ, e Gad keghi bu e Devid gha khian, ọ tama rẹn wẹẹ. “Gha rrie isi okọ Arauna ne u ya gba aka ye evba ne Nọyaẹnmwa.”

¹⁹ E Devid keghi ru vbene Nọyaẹnmwa tama rẹn, ọ kegha khian ya ru vbene Gad khare.

²⁰ Arauna keghi gbe aro ke otọ, ọ ghi ya ghe ọba kevbe ekhaẹmwẹ ọnrẹn bu irẹn dee. Ọ keghi mu ẹko rhu otọ vbe odaro e Devid.

²¹ Ọ nọ rẹn wẹẹ, “Umogun, vbe u a do ru vbe emwa na yi?” E Devid keghi wanniẹn wẹẹ, “Te I do dẹ isi okọ ruẹ ne I gba aka yọ ne Nọyaẹnmwa, ne Nọyaẹnmwa da obọ egboghogbogho na yi.”

²² Arauna keghi kha wẹẹ, “U gha tọ u kpẹre Umogun, mu gha khian ne u yae zọ ese ne ọ khọn ruẹn ne Nọyaẹnmwa, ghe avbe ẹmila ne a gha giẹn ya zọ ese, ghe urọnghọn ẹmila kevbe uhanhan iguọghọka iran, ne a ya hie erhẹn.”

²³ Arauna keghi viọ ehia ne ọba, ọ keghi kha wẹẹ, “Te Nọyaẹnmwa ne Osanobua ruẹ gha rhan obọ miẹn ese ruẹ.”

²⁴ Sokpan, ọba keghi wanniẹn wẹẹ, “Ẹn o, te I gha ha osa yọ. Mẹ i ra ye emwi ne ọ ma rhie emwi rhọkpa hin mwẹ obọ rre zọ ese ghe Nọyaẹnmwa.” Ọ keghi ya igho esiliva ekigbesiyeha dẹ isi okọ nii.

²⁵ Ọ keghi gba aka ye evba ne Nọyaẹnmwa, ọ na zọ ese ne a giẹn uan kevbe isara. E Nọyaẹnmwa keghi họn erhunmwu ẹnrẹn, egboghogbogho nii keghi dobọyi vbe Izrẹl.