II Samuẹl 23 - Edo Bible (E Baibol Ẹdo) Version 1996

Ẹmwẹ Ne Devid Ta Kiekie

¹ E Devid ne ovbi e Jese kegha re ọmwa ne Osanobua ya khian enọkhua, rẹn ọ re Osanobua hannọ zẹ, rẹn ọ re ọ vbe re ọmwa ne ọ gbẹnnẹ ihuan ọghe Izrẹl. Avbe ẹmwẹ ne Devid ghi ta kiekie ọre ena khin:

² Orhiọn e Nọyaẹnmwa guan la unu mwẹ rre, uhunmwu ne ọ gie rre akhuarhamwunu mwẹ.

³ Osanobua Izrẹl guan nẹ, ne ọ de gue Izrẹl keghi tama mwẹ wẹẹ: “Ọba ne ọ ye ẹmwata khaemwisẹ, ne ọ khaemwisẹ vbe a mu ohan Osanobua,

⁴ te ọ yevbe ovẹn ne ọ yunmwu vbe ẹdẹ ne amẹ ma bi ovẹn ne ọ ye ebe fi wainwain vbe amẹ a rhọ nẹ.”

⁵ Erriọ ọ re Osanobua ra fiangbe uniẹn mwẹ, rhunmwuda, ọ gu imẹ ta ile ẹdẹdẹmwẹdẹ nẹ, vbene ehia na la uro, ọ vbe deziẹn. Ọnii ọ re emwi ne I ho. Ọnii ọ re ọ khian gha re akhọnmiotọ mwẹ, ẹ i mwẹ Nọyaẹnmwa ma gie ẹe sẹ.

⁶ Sokpan, emwa dan yevbe igban ne a hẹ kua, ọmwa rhọkpa i sẹtin ya obọ kan rẹn,

⁷ u ma ghi rhie ematọn, u ghi rhie asoro, te a khian giẹn ehia fẹẹrẹ.

Avbe Ivbiyokuo E Devid Ni Hin Usi

⁸ Eni avbe ivbiyokuo e Devid ni hin ukhuaẹn ọ re ena khin: e Josiẹb Basiẹbet, ovbi ẹvbo ne a tie ẹre Takimon, rẹn ọ gha re ọkaolotu, “Iran ne Eha.” Ọ keghi ya asoro ẹre gu arhunmwu uri enẹ (800) gbinna, ọ na gbele ehia a vbe okuo ọkpa kẹkan.

⁹ Ne ọ ghi vbe lele ẹe ọvbehe ọkpa vbe rrọọ vbe uwu “Iran ne eha” ni hin usi nii, ọnii ọ re Eliaza ne ovbi e Dodo kevbe eyẹ Ahoo. Vbe ẹghẹ ọkpa, rẹn kevbe Devid ke duẹ iran an ighẹ ivbi e Filistin ni te si koko khẹ okuo. Ivbi Izrẹl keghi te lẹ kua.

¹⁰ Sokpan, rẹn ma vbọ owẹ, ọ gu ivbi e Filistin gbinna sẹ vberriọ wẹ te obọ ẹre ghi sigba vbene umozo ẹre ma na ghi gie ẹe rhie hin obọ rre. E Nọyaẹnmwa keghi khọnmiotọ ẹsẹse ẹdẹ nẹdẹrriọ. Okuo fo nẹ, ivbi Izrẹl keghi werriegbe gha die ehe ne Eliaza ye, ne iran do kie ẹwu igbinna vbe egbe emwa ni wulo.

¹¹ Ne ogieha vbe “Iran eha ni hin usi” kegha re Siama ne ovbi Agii ne ọ ke Hara rre. Avbe ivbi e Filistin keghi si koko vbe Lẹhi, ehe ne ugbo ikpakpalọ ye, Ivbi Izrẹl keghi lẹ ne ivbi e Filistin.

¹² Sokpan Siama ma vbọ owẹ vbe ugbo nii, ọ keghi degbe odẹ ugbo nii, ọ na gbele ivbi e Filistin. E Nọyaẹnmwa keghi khọnmiotọ ẹsẹse, ẹdẹ nẹdẹrriọ.

¹³ Ọ ghi bu ẹghẹ ne a ya rhọ emwiorhọ, eha vbe uwu “Iran ne ọgban” keghi bu e Devid gha rrie uvun okuta Adulam, vbe oka ivbi e Filistin eso gha rre ọkhẹ vbe Iya Rẹfem.

¹⁴ Vbe ẹghẹ ne a kha na, e Devid keghi rre uwu ako ikhẹgbe, ivbi e Filistin eso kegha rre Bẹtlẹhẹm.

¹⁵ Owa keghi wa gha khọn e Devid ẹsẹse, rhunmwuda ọnii, rẹn keghi kha wẹẹ, “Akpawẹ a miẹn ọmwa ne ọ gha ya sa amẹ gun mwẹ nian vbe uhae ne ọ rre ọkpẹn onurho e Bẹtlẹhẹm.”

¹⁶ Ivbiyokuo ni hin usi eha nii na wa ya uhunmwu zẹ odẹ la uwu agọ ivbi e Filistin gberra, iran na ya sa amẹ vbe uhae nii, iran na mu gie Devid sokpan, ọ ma wọn ẹẹn, ọ keghi hi hiẹ ọe kua zẹ vbe emwi ne a ya zọ ese ghe Nọyaẹnmwa.

¹⁷ Ọ keghi kha wẹẹ, “E Nọyaẹnmwa, mẹ i wọn ọna! Te ọ khian yevbe ne a wọn esagiẹn emwa na, ni rhie uhunmwu iran mwẹ atataobọ.” Rhunmwuda ọnii, ọ ma wọn ẹẹn. Enena ọrọre emwi udinmwẹ ne iran ne ivbiyokuo eha ni hin usi na ru.

¹⁸ Ọtẹn e Joab ighẹ Abisiai (ne ovbi Zeruaia) kegha re ọkaolotu iran ọgban ni hin usi nii. Ọ keghi ye asoro ẹre gu arhin iyisẹn yan uri (300) gbinna, ọ keghi gbele iran an, ọ keghi do khian ne ọ hin usi vbe uwu avbe iran ọgban nii.

¹⁹ Rẹn ọ gha re ne ọ hin usi sẹẹ vbe uwu iran ne ọgban nii, ọ kegha re ọkaolotu iran, sokpan ọ ma hin usi vba “Iran ne Eha” nii.

²⁰ E Benaia, ne ovbi e Jehoaida ne ọ ke Kabzil rre kegha re ovbiyokuo ne ọ hin usi, ọ winna iwinna ni hin okhuaẹn eva ne ivbi e Moab. Ọ kevbe la uwu uvun vbe ẹdẹ ne esia wa de, ọ na ya gbe oduma.

²¹ Ọ kevbe gbe ovbi Igipt ọkpa ọmwa ne ọ ye higboo, ne ọ ye asoro ya khẹ egbe. E Benaia keghi ya orhokhua guẹe gbinna, ọ na gua asoro rhie vbe obọ ovbi Igipt nii, ọ na ya ẹe gbe ẹe rua.

²² Enena ọrọre emwi udinmwẹ ne Benaia ru.

²³ Te irẹn wa lughaẹn hin usi vbe uwu “Iran Ọgban” nii. Sokpan, ọ ma hin usi vba “Iran ne Eha.” E Devid keghi ya ẹe ru ọkaolotu avbe ọkpọmwa rẹn.

^24-39 Emwa ọvbehe ni gha rre “Iran Ọgban” ni ọre ena khin: Asahẹl, ọtẹn e Joab nokpia, Elhana ne ovbi e Dodo ne ọ ke Bẹtlẹhẹm rre, E Saama kevbe Elika, ni ke Harọd rre, E Helẹz, ne ọ ke Pẹlẹt rre Iran ne ovbi Ikẹs, ne ọ ke Tẹkoa rre Abiẹza ne ọ ke Anatọt rre, Mebunia ne ọ ke Husai rre, E Zalmọn ne ọ ke Ahoo rre, E Maharai ne o ke Nẹtofa rre, E Helẹb ne ovbi e Baana ne ọ ke Nẹtofa rre, Itai ne ovbi e Ribai, ne ọ ke Gibea vbe Bẹnjamin rre E Benaia, ne ọ ke Piratọn rre Hidai, ne ọ ke avbe iya ni rre ọkpẹn Gaas rre, Abiabon ne ọ ke Araba rre, Azmavẹt ne ọ ke Bahurim rre, Eliaba ne ọ ke Siabọn rre, Avbe ivbi e Josẹf, E Jonatan, E Siama ne ọ ke Hara rre. Ahiam ne ovbi e Siara, ne ọ ke Hara rre Ẹlifẹlẹt ne ovbi Ahasbi, ne ọ ke Maaka rre Eliam ne ovbi Ahitofẹl ne ọ ke Gilo rre, Hẹzrọn ne ọ ke Kamẹl rre E Paarai ne ọ ke Arab rre Igal ne ovbi e Natan ne ọ ke Zọba rre E Bani ne ọ ke Gad rre E Zelek ne ọ ke Amọn rre Naharai, ne ọ ke Beẹrọt rre ne ọ mu ẹwu igbinna Joab lele ẹe. Ira kevbe Garẹb, ni ke Jatẹ rre Uraia, ne ọ ke Hiti rre. Ehia kegha re ivbiyokuo ihinrọn yan ọgban ni hin usi.