II Samuẹl 22 - Edo Bible (E Baibol Ẹdo) Version 1996

Ihuan Akhọnmiotọ Ne Devid So

¹ Ọnọna ọrọre ihuan ne Devid so ghe e Nọyaẹnmwa, vbe Nọyaẹnmwa miẹn rẹn fan vbe obọ e Sọl kevbe eghian rẹn nekpa:

² E Nọyaẹnmwa ọ re ọ re ne ọ degue mwẹ, rẹn ọ re owa ọkhẹ mwẹ nọ wegbe.

³ Osanobua mwẹ ọrọre ugue mwẹ, I gha rre ehe ne ọ ye, ẹbe fo. Ọ degue mwẹ zẹ vbe asa. Ọ gbinna mẹ rhie mwẹ mwẹ, vbe a i mwẹ ẹbe. Rẹn ọrọre Ọmiọnmwafan mwẹ; ọ degue mwẹ, ọ fan mwẹ hin epiankhanrhan rre.

⁴ I datie Nọyaẹnmwa. Ọ keghi fan mwẹ vbe obọ avbe eghian mwẹ. Wa rho e Nọyaẹnmwa!

⁵ Ogbigbi amẹ uwu te lẹga mwẹ, ogbigbi amẹ ọfuan lẹ rhu mwẹ;

⁶ uwu si irri ẹre tua khinkhian mwẹ, idin keghi rhuẹ ifi ẹre khẹ mwẹ.

⁷ I datie Nọyaẹnmwa vbe ẹghẹ ọlọghọmwa mwẹ, I datie Nọyaẹnmwa wẹ ne ọ yọmwẹ obọ ọ họn urhu mwẹ vbe uwu ọgua Osa ẹre ọ họẹn vbe I kpe tie ẹre ne ọ yọ mwẹ obọ.

⁸ Agbọn mu rueghe, ọ guọ ọe zẹzẹzẹ, ẹyotọ iso vbọ uhe, ọ kegha guẹ, rhunmwuda ohu mu Osanobua.

⁹ Ighogho kpe ke uvun ihue ẹre ladian, erhẹn ne ọ baa kevbe erhẹn ẹyin nọ giẹn, ke unu ẹnrẹn ladian.

¹⁰ Ọ guọghọ iso, ọ kevbe tuorre okuku nekhui kegha rre ototọ owẹ ọre.

¹¹ Ọ hin yan iyeke avbe kerubu, ọ tin tuorre, ọ keghi la ifuẹn ẹhoho khian okhian ne ọ kẹre.

¹² Ọ ya ebiebi hin egbe. Okuku ne ọ mwẹ imi, ne ọ vuọn ne amẹ, keghi lẹga ẹre.

¹³ Ogiọnmwẹ erhẹn keghi mu vẹn ke uwu ayan rre, vbe odaro ẹre.

¹⁴ Ẹkpo nii ọ re Nọyaẹnmwa na davan ke iso rre a keghi họn urhu e Ne ọ yo sẹẹ Ehia.

¹⁵ Ọ fi ifẹnmwẹ, ọ keghi zagha eghian rẹn kua, ọ na ye awanwan ayan zẹ ulẹ ye iran egbe.

¹⁶ Ọ gie a miotọ emwi ni rre ototọ okun, a keghi we ẹyotọ agbọn rua ne emwa miẹn, ẹghẹ ne Nọyaẹnmwa na gu eghian rẹn gui, ọ keghi vannọ okan mu iran vbe ohu ẹre.

¹⁷ E Nọyaẹnmwa niẹn obọ ke ẹrinmwi rre, ọ na da mwẹ yi, ọ keghi si mwẹ ladian hin uwu odin amẹ rre.

¹⁸ Ọ wọlọ mwẹ hin obọ enikhuiwu mwẹ rre, hin obọ avbe eghian mwẹ, ni wegbe sẹ mwẹ gbe.

¹⁹ Ẹghẹ vbe I rre uwu ọlọghọmwa, iran kegha gun mwẹ khọn, sokpan, e Nọyaẹnmwa keghi degue mwẹ.

²⁰ Ọ yọ mwẹ obọ hin uwu ẹbe rre. Ọ miẹn mwẹ fan rhunmwuda, ẹko ẹre rhiẹnrhiẹn ghe mwẹ.

²¹ E Nọyaẹnmwa san mwẹ ẹse, rhunmwuda, I ru emwi nọ kere ọ fiangbe mwẹ, rhunmwuda, I ma rria abe.

²² Mẹ mu uhi e Nọyaẹnmwa sẹ, I ma sọtẹ Osanobua mwẹ.

²³ I mu uhi ẹre hia sẹ, I ma he uhunmwu ye ọre obọ.

²⁴ Rẹn rẹnrẹn wẹ, I i mwẹ ozan, rhunmwuda, I bi egbe hin emwi dan rre.

²⁵ Rhunmwuda ọnii, ọ san mwẹ ẹse, rhunmwuda emwi nọ kere ọre I ru rhunmwuda rẹn, rẹnrẹn wẹ, I ma rri abe.

²⁶ E Nọyaẹnmwa, ọmwa ne a mu ẹtin yan wẹ khin vbe obọ emwa ni gia mu ẹtin yan. Ne ọ maa fo vbe obọ iran ne ọ gba na.

²⁷ Ne ọ huanrẹn wẹ khin vbobọ, iran ni huanrẹn, sokpan u ghi gha khọ mu avbe emwa dan.

²⁸ Wẹ miẹn iran ni mu egbe rriotọ fan, u keghi si iran ni tọn egbe mu kẹ otọ.

²⁹ Nọyaẹnmwa, wẹ ọrọre uwanmwẹ mwẹ, u zagha ebiebi mwẹ kua.

³⁰ U rhie ẹtin mẹ ya gu eghian mwẹ gbinna, kevbe ẹtin ne I ya deyan emwi ikhẹgbe iran.

³¹ U miẹn vbe emwi ne Osanobua na ru gba ẹe hẹ. U miẹn vbe ẹmwẹ ọnrẹn gia mu ẹtin yan hẹ! Te irẹn yevbe asa, ne iran ne ọ wẹ ne ọ degue iran.

³² E Nọyaẹnmwa ọkpa ọrọre Osanobua, Osanobua ọkpa ọrọre ugue mwa.

³³ Osanobua na ọrọre ugue mwẹ ne ọ wegbe, ọ ye odẹ mwẹ khian ne ẹbe i ye.

³⁴ Ọ ru owẹ mwẹ ne ọ wo yọ zẹ vbe ọghe ẹrhuẹ, ọ keghi rhie mwẹ ye uhunmwu oke vbe a i mwẹ ẹbe!

³⁵ Ọ ma mwẹ okuo ne a khọn, vbene I gha na sẹtin lo uhanbọ ne ọ wegbe sẹe.

³⁶ Nọyaẹnmwa, wẹ ọ re ọ rhie mwẹ lẹre, miẹn mwẹ fan. Iyobọ ruẹ ọ re ọ ya mwẹ khian enọkpọlọ.

³⁷ Wẹ ọ re ọ ma gia mu mwẹ oghunmwu. I ma he vbe de ẹdẹ.

³⁸ I zẹ avbe eghian mwẹ khu, i keghi fuẹn iran an. I ma dobọyi I te do khọn miẹn iran otọ.

³⁹ I gbele iran fio otọe, iran i ghi sẹtin kpao, iran lovbiẹ yọ mwẹ akharha zẹ vbe oghunmwu.

⁴⁰ Wẹ rhie ẹtin mẹ ne I ya khọn okuo nii, kevbe akhọnmiotọ vbe uhunmwu eghian mwẹ.

⁴¹ U ya iran ne eghian mwẹ lẹ mẹ, I fuẹn iran ni khuiwu mwẹ uan.

⁴² Iran gualọ iyobọ, ne ọ gha miẹn iran fan i rrọọ, iran tu tie Nọyaẹnmwa, sokpan ọ ma khuẹn niẹn iran.

⁴³ I dunmwu iran an, iran keghi yevbe ebubẹ, I ya owẹ rrilo iran muotọ, zẹ vbe ekẹn vbe orere.

⁴⁴ U miẹn mwẹ fan vbe obọ emwa mwẹ ni sọtẹ, u keghi ya mwẹ ru enọkhaemwisẹ yan avbe agbọn ẹvbo. Avbe emwa ne I ma rẹn khian ni ga gun mwẹ.

⁴⁵ Avbe orhunmwuyẹn hia gha ghughẹrre mẹ, iran gha họn vbe I guan, iran ghi ru emwi ne i ta ẹe,

⁴⁶ iran ghi gha guọ ke ogba ikhẹ igbinna iran dee.

⁴⁷ E Nọyaẹnmwa rrọọ, wa rho nọ gbinna mẹ, Osanobua ọ re ọmiọnmwafan mwẹ nọ wegbe. Wa mu ukpọlọmwẹ ọnrẹn goo.

⁴⁸ Ọ rhie akhọnmiotọ mẹ vbe uhunmwu eghian mwẹ, ọ hie emwa ni uhunmwu rre vbe ototọ mwẹ.

⁴⁹ Ọ keghi fan mwẹ vbe obọ avbe eghian mwẹ. Nọyaẹnmwa, u gun mwẹ khọn avbe eghian mwẹ muotọ, u keghi degue mwẹ hin obọ emwa ọkpankpan.

⁵⁰ Rhunmwuda ọnii, I gha rho ruẹ vbe uwu agbọn ẹvbo, I gha so ihuan urhomwẹ ghe ruẹ.

⁵¹ Osanobua, rhie akhọnmiotọ nọkhua ne ọba ẹre, ọ rhie ahoẹmwọmwa ne ọ gbae maa, ghe ọmwa ne ọ zẹe, ghe Devid kevbe uniẹn ọnrẹn ẹdẹdẹmwẹdẹ.