II Samuẹl 20 - Edo Bible (E Baibol Ẹdo) Version 1996

Isọtẹ E Siẹba

¹ A keghi vbe miẹn wẹ ọmwa oya ọkpa ne a tie ẹre Siẹba kegha rre evba, ovbi e Bikri ne ovbi ẹwae ẹ Bẹnjamin. Ọ keghi si urhu, ọ na kha wẹẹ, “Wa sẹ e Devid rae, ma i lele ẹe. Ivbi Izrẹl, wa gia gha rrie.”

² Ẹre ivbi Izrẹl na fi iyeke gbe Devid, iran na lele Siẹba. Sokpan ivbi e Juda ma fi ekhọe werriẹ, iran keghi lele Devid ke Jọdan gha dee do sẹ e Jerusalẹm.

³ Ẹre Devid na la ẹguae ẹre vbe Jerusalẹm, ọ keghi viọ avbe egbakhian igbe ne ọ sẹrae ne ọ gha gbe aro ghe ẹguae, ọ na viọ ye igbedia. Ọ kegha koko iran, sokpan, ọ ma gu iran ru emwi ọdọ vbe amwẹ. Ọ keghi wa mu iran ye igbedia vbe ẹdẹ agbọn iran, zẹ vbe ikhuo ni dẹgbẹ.

⁴ Ẹre ọba na tama Amasa wẹẹ, “Tie ivbi e Juda kugbe ne uwa vbe iran gba sẹ emwa na irakhuẹ.”

⁵ Amasa keghi gele ya tie iran, sokpan, ọ ma dọlegbe rre vbe ẹghẹ ne ọba rhie ne ẹẹn.

⁶ Ẹre ọba na tama Abisiai wẹẹ, “Ukpokpo ne Siẹba gha rhie ne ima gha kpọlọ sẹ ọghe Absalọm. Viọ emwa mwẹ ne u khu ẹe ne a ghẹ miẹn wẹ ọ ya la ẹvbo ne a gbe odin gaa, ọ ghi la evba lẹ fua hin obọ mwa rre.”

⁷ Rhunmwuda ọnii emwa Joab ighẹ avbe emwa ne ọba viọ ya khẹ egbe kevbe ivbiyokuo ni de ke ẹe hia, keghi lele Abisiai. Iran na kpao vbe Jerusalẹm rre, iran na khu e Siẹba.

⁸ Iran ghi sẹ okuta nọkhua ne ọ rre Gibiọn, Amasa keghi vba iran. Te Joab mu egbe okuo vbe ne ọ na mu umozo ne ọ rre ako ọre gba ye ẹkun, ọ ghi wa dee ni, umozo ni keghi yuo defua.

⁹ E Joab keghi tama Amasa wẹẹ, “Vbọ ye hẹ ọse mwẹ.” Ọ na ya obọ erha ọmwa mu ẹre ẹtu ne ọ miẹn ehe na mu ẹre unu hiẹnhiẹn.

¹⁰ Amasa ma vbe bẹghe umozo ne Joab mu mwẹ, e Joab keghi bi umozo ye ọ re ẹko, ibiẹ ọre hia keghi silo ku otọ. Ọ ke wa wu vbe ọwarọkpa nii. E Joab ma ghi vbe fi ẹre emwi ọvbehe. Ẹre Joab kevbe Abisiai ne ọtiọnrẹn na khu e Siẹba.

¹¹ Ọkpa vbe uwu emwa e Joab keghi mudia ke ikun Amasa, ọ na gha kha wẹẹ, “Ọmwa ne ọ ghi rre asa ọghe Joab kevbe Devid, wẹ ne ọ lele Joab!”

¹² Ikun Amasa ne esagiẹn wa gba kegha rre adesẹ odẹ. Ọmwa e Joab nii ke miẹn wẹ emwa hia wa yakọ vbe evba, rhunmwuda ọnii, ọ keghi hiọrọ ikun ẹnrẹn ni hin adesẹ odẹ rre la uwu oha, ọ na mu ukpọn rhu ẹe, rhunmwuda emwa ni ghi bẹghe ẹre hia ọ re ọ wa mudia.

¹³ Iran ghi mu ikun ẹnrẹn hin odẹ rre, emwa hia keghi lele Joab gha khu Siẹba khian.

¹⁴ E Siẹba keghi lẹ le otọ ẹwae ni rre Izrẹl hia, ọ keghi do sẹ ẹvbo Ebel Bẹt Maaka, ẹgbẹe Bikri kevbe lele ẹe la adesẹ ore ẹvbo.

¹⁵ Emwa e Joab keghi rre, iran na ye igbinna yan e Siẹba vbe ore ẹvbo, iran keghi ye ekẹn ru utete ne a la hin ekẹn nii ye ihe eso vbe ore. Iran kevbe tọn ekẹn nii ẹzi ne ọ miẹn ehe na de.

¹⁶ Edede ọkpa ne umẹwaẹn keghi rre ẹvbo nii, ọ keghi niẹn urhu davan ke ekẹn nii rre wẹẹ, “Wa danmwehọ! Wa tama e Joab ne ọ larre edinran ighẹ I ra gu ẹe guan.”

¹⁷ E Joab kegha khian, okhuo nii ke nọ wẹẹ, “E Joab, wẹ nọ ra?” Rẹn na wanniẹn wẹẹ, “Mẹ nọ.” Okhuo nii keghi kha wẹ, “U ghi danmwehọ mwẹ enọwanrẹn.” Rẹn keghi wanniẹn wẹẹ, “I danmwehọ.”

¹⁸ Okhuo nii na kha wẹẹ, “Vbe ẹghẹ ne ọ kpẹe fua, te a te ta ẹe wẹẹ, ‘Ya gualọ otọ egbe ruẹ miẹn vbe Ebẹl.’ Erriọ ọ re iran gele gha ru ẹe.

¹⁹ Okpẹvbo ọ re ẹvbo ima khin, ọkpa vbe uwu ẹvbo ne ọfumwegbe ye sẹ kevbe ne ọ ye ekhọe ga vbe Izrẹl. Vbọzẹ ne u na ho ne u fuẹn ọnrẹn yi? Te u ho ne u mu emwi ne ọ re ọghe Osanobua rhia ra?”

²⁰ E Joab keghi wanniẹn wẹẹ, “Ẹn o, I i ra guọghọ ra ne I vbe mu ẹvbo uwa rhia.

²¹ Ọnii i re iro ne ima zẹe. Okpia ọkpa ne a tie ẹre Siẹba ne ovbi Bikri ne ọ ke Ifreim ne ẹvbo oke rre ọ re ọ sọtẹ e Devid ne ọba. Wa rhie okpia na ọkpa kẹkan ladian, I ghi kpao hin ẹvbo na rre.” Okhuo nii keghi kha wẹẹ, “Ma gha fi uhunmwu ẹnrẹn la uhunmwu ekẹn guẹ.”

²² Okhuo nii keghi mu iro nii gie ẹvbo. Iran na fian Siẹba uhunmwu, iran na fiẹe la uhunmwu ekẹn gie Joab, rẹn keghi kpe okpe, emwa rẹn hia keghi kpao vbe ẹvbo nii rre, iran na gha rrie. Ẹre Joab na dọlegbe bu ọba gha rrie Jerusalẹm.

Avbe Ekhaẹmwẹ E Devid

²³ E Joab keghi re ọkaokuo ivbiyokuo Izrẹl, e Benaia ne ovbi e Jehoaida kegha gbearoghe ivbi ọkpọmwa e Devid.

²⁴ Adoniram kegha gbearoghe iwinna ne a munọ emwa ya winna; e Jehosiafat ne ovbi e Ahilud kegha re isienmwiẹro ne ọ gbearoghe emwi ne a gbẹnnẹ ye otọ.

²⁵ E Siova kegha re ọgbenbe iko ibuohiẹn; e Zadọk kevbe Abiata keghi re avbe ohẹn.

²⁶ Ira ne ovbi ẹvbo ne a tie ẹre Jaẹl kevbe gha re ọkpa vbe avbe ohẹn e Devid.