II Samuẹl 19 - Edo Bible (E Baibol Ẹdo) Version 1996

E Joab Gu E Devid Gui

¹ Iran keghi do tama e Joab wẹ e Devid gha viẹ, ọ vbe khiẹ ovbi ẹre ighẹ Absalọm.

² A keghi miẹn wẹ, akhọnmiotọ keghi khian akhiẹ ne ivbiyokuo e Devid, rhunmwuda iran họẹn wẹ, e Devid gha khiẹ ovbi ẹre.

³ Iran keghi ba la ẹvbo huẹẹ, zẹ vbe ivbiyokuo ne ekhue mu, rhunmwuda ighẹ te iran lẹkua vbe okuo.

⁴ Ọba keghi mu emwi gue aro, ọ na kakabọ gha viẹ wẹẹ, “Ẹta ovbi mwẹ! Absalọm ne ovbi mwẹ! Absalọm ne ovbi mwẹ!”

⁵ E Joab keghi bu ọba gha rrie owa ẹre, ọ keghi tama rẹn wẹẹ, “Te uwa mu emwa ruẹn gbe otọ ẹrẹna, avbe emwa ni zẹe ighẹ u ma wu kevbe avbe ivbi uẹ ni ikpia avbe amwọọn kevbe avbe egbakhian ruẹn.

⁶ Iran ni ho ẹmwẹ ruẹn ọ re u gu khọn, u ghi gha yi iran ni khuiwu ruẹ ike. U wa rhie ma nian wẹ avbe ekhaẹmwẹ kevbe emwa ruẹn ma sẹ emwi rhọkpa vbe aro ruẹ. I miẹn ọẹn nian wẹ, akpawẹ te ima hia wulo sokpan Absalọm na gha rre agbọn, ọyẹnmwẹ gha sẹ ue.

⁷ Banbanna nian, ya dọlegbe rhie ẹtin ye emwa ruẹn iwu. Ne I tama ruẹn, a deghẹ u ma ru vberriọ, I ye eni e Nọyaẹnmwa vẹn ihẹn wẹ, vbe owiẹ ne a khuẹ, u i ghi ra miẹn orhiọnkpa ne ọ gha ye gha rre esa ọwuẹ. Ọnii ọ khian gha re emwi ne ọ wegbe sẹ vbe emwi ne u he miẹn vbe ẹdẹ agbọn ruẹn.”

⁸ Ẹre ọba na guakpao, ọ na ya tota ye onurho ne a la la ore ẹvbo. Emwa rẹn keghi họn wẹ, ọ rre evba, iran keghi bu ẹre gha khian ya gbe ẹbu ye ehe ne ọ ye. Vbe ẹghẹ ne a ghi kha na nian, ivbi Izrẹl hia lẹkua nẹ, dọmwadẹ ọghe ọe ghe owa ẹre.

E Devid Dọlegbe Gha Rrie Jerusalẹm

⁹ Emwa hia kegha gui vbe ore ẹvbo ni hia wẹẹ, “E Devid ọ re ọ miẹn ima fan hin obọ avbe oghian mwa rre. Rẹn ọ re ọ fan mwa vbe obọ avbe Filistin, banbanna nian, ọ lẹ ne Absalọm, ọ kpao vbe ẹvbo rre.

¹⁰ Ma ọ re ọ ma Absalọm ọba, sokpan, iran gbe ẹe rua vbe okuo. Vbọzẹ khekherriọ ne a ma na miẹn ọmwa ne ọ gha hia ne a rhie Devid ne ọba dọlegbe rre?”

¹¹ E Devid ne Ọba keghi họn ẹmwẹ ne avbe ivbi Izrẹl ta. Ọ keghi rhunmwuda ọnii gie Zadọk kevbe Abiata ne ohẹn, ne iran ya tama avbe ọkaolotu e Juda wẹẹ, “Vbe a na miẹn hẹ yi wẹ wa ọ re ọ ghi ra gha re okiekie vbe uwu ehia ne ọ gha ru iyobọ ne a ya dọlegbe rhie ọba gha die ẹguae ẹre.

¹² Wa ọrọre etẹn mwẹ, esagiẹn ọkpa, kevbe efun mwẹ, vbe uwa ghi na re emwa okiekie hẹ ne ọ gha dọlegbe rhie mwẹ gha di owa.”

¹³ E Devid kevbe wẹ ne iran tama Amasa wẹẹ, “Ọtẹn mwẹ ọ re u khin. Ke ẹghẹ na kpao, I ya ru ọkaolotu ivbiyokuo ye ihe e Joab. Te Osanobua gha gbe mwẹ uan, a deghẹ I ma ru vberriọ.”

¹⁴ Ẹmwẹ ne Devid ta ẹe keghi wa mu ekhọe emwa e Juda hia, iran keghi gie ne a tama rẹn wẹ ne ọ werriegbe gha dee irẹn kevbe ekhaẹmwẹ ọnrẹn hia.

¹⁵ Ọ ghi dọlegbe dee, emwa e Juda hia keghi do vba e Devid vbe Ẹzẹ Jọdan vbe ehe ne iran na gha die Gilgal ne iran su ẹe fian ẹzẹ rra.

¹⁶ Vbe ẹghẹ ọkpa nii, a Simẹi ne ovbi ẹvbo e Bẹnjamin, ovbi e Gera ne Bahurim, keghi rhulẹ sẹ Jọdan ne ọ do vba e Devid ne ọba.

¹⁷ Ọ keghi viọ arhin arriaisẹn (1,000) vbe ẹwae e Bẹnjamin ba egbe. E Ziba ne ọguọmwadia ẹgbẹe e Sọl, kevbe viọ ivbi ẹre ni ikpia ekesugie kevbe eguọmwadia ugie, iran keghi ka sẹ e Jọdan khẹ ọba.

¹⁸ Iran keghi fian ẹzẹ rra ne iran ya su ọba fian ẹzẹ rra, kevbe ne iran vbe gha ru emwi ne ọba rhirhi gha ho. Ọba ghi ra wa fian ẹzẹ rra, e Simẹi keghi mu ẹko rhu otọ vbe odaro ẹre.

E Devid Tohan E Simẹi

¹⁹ Ọ wẹẹ, “U gha tọ u kpẹre Umogun, lahọ, rhie ekhọe hin a baku ru ne I ru vbe ẹdẹ ne u kpa vbe Jerusalẹm rre. Ghẹ ka ẹe yọ mwẹ owẹ ra ne u ye vbe rhie ẹre ye ekhọe.

²⁰ I rẹnrẹn ighẹ I rra iyi nẹ, ọre a na miẹn wẹ, mẹ ọre ọmwa ne okaro ne ọ ke avbe ẹwae ni rre odẹ okuo rre gha dee ẹrẹna ne I do vba Umogun.”

²¹ Ẹre Abisiai ne ovbi e Zeruaia na ni urhu ladian wẹẹ, “Ọmwa ne a gbe ua ọre Simẹi khin rhunmwuda, ọ kpa unu ghe ọmwa ne Nọyaẹnmwa hannọ ne ọ gha re ọba.”

²² Sokpan e Devid keghi khama Abisiai kevbe Joab ne ọtiọnrẹn wẹẹ, “Gha ọ wẹ ne u guan yọ yi? Te u ra si ẹti yọ mwẹ urhu ra? Banbanna nian, mẹ ọ re ọba Izrẹl, ovbi Izrẹl ne a gha gbe ua ẹrẹna, ẹ i rrọọ.”

²³ Ẹre irẹn na tama Simẹi wẹẹ, “Mẹ ọ re ọ tama ruẹn nian wẹẹ, a i ra gbe ua.”

E Devid Tohan Mẹfibosiẹt

²⁴ Ẹre Mẹfibosiẹt ne eyẹ e Sọl na do khian vba ọba. Ọ ma he sa amẹ ya kpe owẹ, ra ne ọ zẹ ẹtu, ra ne ọ họ ukpọn rẹn, ke ẹghẹ ne ọba ya kpao vbe Jerusalẹm do sẹ ẹghẹ ne ọ na werriegbe rre ke irẹn kevbe akhọnmiotọ.

²⁵ E Mẹfibosiẹt ghi ke Jerusalẹm rre do khian vba ọba, ọba keghi nọ rẹn wẹẹ, “Mẹfibosiẹt, vbọzẹ ne u ma na lele mwẹ kpao yi?”

²⁶ Rẹn keghi wanniẹn wẹẹ, “U rẹnrẹn Umogun ighẹ arọe ẹre I khin. I tama ọguọmwadia mwẹ wẹ ne ọ rro ẹsin ye otọ mẹ ne I miẹn ehe na leluẹ gha khian, sokpan, ọ ke rẹrẹ mwẹ.

²⁷ Ọ keghi do ba mwẹ ohoghe ma ruẹn, Umogun, sokpan, te u wẹ yevbe odibosa, rhunmwuda ọnii, emwi ne ọ ghi kei vbe aro ruẹ, ru mwẹ re.

²⁸ Te ọ te khẹke nu u gbele ẹgbẹe erha mwẹ hia, Umogun sokpan, u keghi ye ru mwẹ ẹse wẹ ne I do gha rri evbare vbe eteburu ruẹ. Ọ ma ghi khẹke mwẹ ne I ye vbu emwi vbe obọ ruẹ Umogun.”

²⁹ Ọba keghi wanniẹn wẹẹ, “Ghẹ ghi gbe agbanmwẹ, I ta ẹe nẹ wẹ ne uwẹ vbe Ziba gba ghae emwi e Sọl.”

³⁰ E Mẹfibosiẹt keghi wanniẹn wẹẹ, “Gie Ziba kue wa viọ ehia, ẹko e ne uwẹ na werriegbe rri owa vbe ọfumwegbe na vuọn mwẹ Umogun.”

E Devid Tohan E Bazilai

³¹ E Bazilai ne ovbi e Giliad keghi vbe ke Rogelim gha dee ne ọ do su ọba fian Ẹzẹ Jọdan rra.

³² E Bazilai keghi re ọmwa ne ọ khian ọmaẹn ẹsẹse. Ukpo iyenẹ ọ re ọ gha ye, ọ vbe fe ẹsẹse. Ọ kegha viọ evbare gie ọba ẹghẹ ne ọ na gha rre Mahanem.

³³ Ọba keghi tama rẹn wẹẹ, “Lele mwẹ gha rrie Jerusalẹm, I gha gbe aro ghe ruẹ.”

³⁴ Sokpan, e Bazilai keghi wanniẹn, “Odẹ ehe ne I rrie ọ re ọ ghi ke ẹe sẹ, vbọzẹ ne I gha na lele uẹ gha rrie Jerusalẹm, Umogun?

³⁵ Ukpo iyenẹ ọ re I ye na, emwi ọkpa ne ọ ghi gbe mwẹ otiti, ẹ i ghi rrọọ kevbe emwi ne I re kevbe ne I da, ne I ghi rẹn emwi ne ọ khọe vbe unu ẹ ghi rrọ, I i ghi vbe họn vbe otu ni so ihuan a gha so ihuan. Ihẹ kẹkan ọ re I khian gha khin nuẹn Umogun.

³⁶ Ẹse ne a san ọmwa ẹre vberriọ, ma khẹ ke mwẹ. Rhunmwuda ọnii, I gha sẹ uẹ gberra e Jọdan kherhe.

³⁷ U ghi gun mwẹ dọlegbe gha rrie owa ne I ya wu vbe ehe ne ọ diake idin avbe evbibiẹ mwẹ. Ghe ovbi mwẹ ighẹ Kimham rhie ẹre mwẹ obọ gha khian Umogun, ne ọ gha ga a, u ghi ru emwi ne ọ ghi yẹ ruẹ ne ẹẹn.”

³⁸ Ọba keghi wanniẹn wẹ, “I gha rhie ẹre gha khian, I ghi vbe ru emwi ne uwẹ rhirhi gha ho ne ẹẹn. I gha ru emwi ne uwẹ rhirhi nọ ne uẹn.”

³⁹ Ẹre Devid vbe emwa rẹn hia na do fian e Jọdan rra. Ọ keghi mu e Bazilai unu hiẹnhiẹn, ọ na na erhunmwu ne ẹẹn, ẹre Bazilai na dọlegbe gha rrie owa.

E Juda Kevbe Izrẹl Muan Egbe Ẹmwẹ Ye Ẹmwẹ Ọba

⁴⁰ Ivbi e Juda kevbe obọkpa vbe ivbi Izrẹl ghi su ọba gberra Ẹzẹ Jọdan nẹ, ọ kegha rrie Gilgal, e Kimham keghi lele ẹe gha khian.

⁴¹ Ẹre ivbi Izrẹl hia na bu ọba gha khian, iran tama rẹn wẹẹ, “U gha tọ u kpẹre Umogun, vbọzẹ ne etẹn ima ighẹ ivbi e Juda na rhie ruẹ kpao, iran na su uwẹ kevbe ẹgbẹe ruẹ kevbe emwa ruẹ fian e Jọdan rra?”

⁴² Ivbi e Juda wanniẹn wẹẹ, “Ma ru ẹe rhunmwuda, ovbi ima ọ re ọba khin. De ne uwa ghi mu ohu yi vbọ yi? Ọ ghọ ima yọ ra, ra ọ rhie emwi rhọkpa ne ima?”

⁴³ Ivbi Izrẹl keghi wanniẹn wẹẹ, “Ukhukhu igbe ọ re ọ ya kan ima ighẹ vbene ẹmwẹ e Devid ne ọba ya kan uwa, ọ gha rhe gha re ovbi uwa. Vbe uwa a ghi na kpe amẹ isikan ku ima hẹ? A deghẹ erriọ nọ khekherriọ, ma ọ re ọ ka ziro wẹ ne a ya rhie ọba werriegbe rre!” Sokpan ivbi e Juda ọ re ukpẹ ọre tua sẹ ọghe ivbi Izrẹl vbe ẹzọ ima ọ yan rẹn ne iran gha gui.