II Samuẹl 18 - Edo Bible (E Baibol Ẹdo) Version 1996

Obọ Vba Absalọm, A Gbe Ẹe Rua

¹ E Devid ne ọba keghi viọ emwa rẹn hia ladian, ọ na gha iran ye otu, eso arriaisẹn, eso iyisẹn, ọ na viọ ọkaolotu ne ọ gbearoghe iran lelẹe.

² Ọ keghi wa iran ye ihe eha, ọ na mu obọkpa ne Joab, obọkpa ne Abisiai ne ọtẹn Joab kevbe obọkpa ne Itai ne ovbi ẹvbo ne a tie ẹre Gat, ọba keghi tama emwa rẹn wẹẹ, “Me tobọ mwẹ gha lele uwa gha khian.”

³ Iran wanniẹn tama rẹn wẹẹ, “Ghẹ lele ima yo hiehiere. A deghẹ ma hia werrie urhuawẹ ma na lẹ avbe eghian ima i ra vbe zẹ yọ, erriọ vbe nọ a deghẹ obọ ọkpa vbe a gha wa ima hia ye ihe eva vbe wulo. Sokpan, wẹ sẹ arriaisẹn igbe (10,000) vbe uwu ima. Emwi ne ọ gha kei sẹ ọrọre ne uwẹ mudia vbe ore ẹvbo vbe emwana ne u gha gie iyobọ gie ima.”

⁴ Ọba keghi wanniẹn wẹẹ, “Ne uwa rhirhi ro ighẹ ọ maa sẹẹ vbe ehia, ọ re I gha ru.” Ẹre ọ na ya mudia ye onurho ẹvbo nii vbe emwa ye arriaisẹn kevbe iyisẹn ladian otu otu.

⁵ Ọ keghi yi iyi ne Joab Abisiai kevbe Itai wẹẹ, “Rhunmwuda mwẹ, wa ghẹ kuan ọmọ nii ighẹ Absalọm?” Ivbiyokuo hia keghi họn vbe Devid yi iyi na ne avbe ọkaokuo hia.

⁶ Ivbiyokuo e Devid keghi mu okuo bu ivbi Izrẹl vbe uwu oha, iran keghi gu iran gbinna vbe uwu ẹgbo Ifreim.

⁷ Obọ emwa e Devid keghi ke odukhunmwu ne ọghe ivbi Izrẹl, iran keghi gbele iran ugbemwẹ oya, vbene emwa ni wulo ẹdẹrriọ na gha re arriaisẹn ugie (20,000).

⁸ Okuo ni na tughu gba oha nii hia, emwa ni wulo ye uwu ẹgbo keghi bun sẹ ne okuo gbele.

⁹ Absalọm keghi khian dekun emwa e Devid eso vbe udomwurri. Absalọm keghi hin ekẹtẹkẹtẹ khian, ugbẹn vbe ọ ghi la ototọ erhan ọwegbe khian, uhunmwu Absalọm keghi khuakhua ye abọ ẹre. Ekẹtẹkẹtẹ nii kegha rhulẹ khian vbene Absalọm na gha rre ideghedeghe vbe evba.

¹⁰ Ọkpa vbe uwu emwa e Devid ghi miẹn ọẹn, ọ keghi ya tama Joab wẹẹ, “I miẹn Absalọm vbe ọ de rrọ ye erhan ọwegbe, enọwanrẹn.”

¹¹ E Joab keghi wanniẹn wẹẹ. “U gele miẹn ọẹn, vbọzẹ ne u ma na gbe ẹe rua ye evba?” Me tobọ mwẹ gha viọ igho esiliva igbe ne uẹn deba ugbẹkun.

¹² Sokpan, okpia nii keghi wanniẹn wẹẹ, “Ọ gha khọn ruẹn ne u viọ igho esiliva arriaisẹn mẹ, mẹ i ra kpa ikpi-nhianbọ mwẹ ya fi ovbi ọba emwi. Ma hia họẹn ẹghẹ ne ọba na gha yi iyi ne uwẹ kevbe Abisiai kevbe Itai wẹẹ, ‘Rhunmwuda mwẹ, wa ghẹ kuan ọmọ nii egbe.’

¹³ Sokpan akpawẹ te I ya iyin ehọ gbe Absalọm rua, ọba gha họn ẹmwẹ na, a i miẹn ẹmwẹ nẹ i họn, wẹ i ghẹ sẹtin fan mwẹ vbọ.”

¹⁴ E Joab keghi wanniẹn wẹẹ, “I i ghi sẹtin guẹ rhọ eghẹrẹ vbe emwa na.” Ọ keghi viọ asoro eha, ọ na halọe ye Absalọm ẹwẹe, vbe ọ ma he ye wu vbe ehe ne ọ na khuakhua ye erhan nii.

¹⁵ Ẹre iran igbe vbe ivbiyokuo e Joab na sikẹ Absalọm, iran na gbe ẹe rua fo.

¹⁶ E Joab na wẹ ne iran kpe okpe ne emwa da obọ igbinna yi, ivbi iyokuo ẹre keghi werriegbe vbe ehe ne iran na te khu ivbi Izrẹl khian.

¹⁷ Iran keghi mu ikun Absalọm, iran na mu ẹẹn fi uwu uvun ne ọ dinmwi vbe uwu ẹgbo, iran na silo okuta ọrhẹnrhẹn ranrẹn. Ivbi Izrẹl hia keghi lẹ kua, dọmwadẹ ọghọe ghe owa ẹre.

¹⁸ Vbe ẹghẹ ne ọ na rre agbọn, Absalọm keghi ma ibiriki ayere ọkpa ne egbe ẹre vbe Iya Ọba, rhunmwuda ẹ i mwẹ ọmọ okpia ne ọ gha mu ẹgbẹe ọghe ọe gbọ. Ọ keghi he ẹre eni egbe ẹre. Do sẹ ẹdẹnẹrẹ, Ibiriki Ayere Absalọm ọ re a ye tie ẹre.

¹⁹ Ẹre Ahimaz ne ovbi e Zadọk na khama e Joab wẹẹ, “Gun mwẹ rhulẹ ya na iyẹn oghọghọ na ma ọba wẹ, e Nọyaẹnmwa miẹn rẹn fan vbe obọ eghian rẹn nẹ.”

²⁰ E Joab keghi khama rẹn wẹẹ, “Ẹn o, ẹ i re ẹrẹ u gha ya na iyẹn oghọghọ. U sẹtin ru vberriọ ẹdẹ ọvbehe, sokpan ẹ i re ẹrẹna, rhunmwuda ovbi ọba wu.”

²¹ Ẹre ọ na tama ọviẹn ne ovbi Sudan ne ọ gue ẹe wẹẹ, “Ya na iyẹn emwi ne u miẹn ma ọba.” Ọviẹn keghi ghughẹ rre tue ọe, ọ na zẹ ulẹ ua.

²² Ahimaz keghi ye rhiegba yọ, “Emwi ne ọ rhirhi khọn rẹn wẹ ne ọ sunu, lahọ, gie imẹ vbe ya na iyẹn.” E Joab keghi khama rẹn wẹ “Vbọzẹ yi ne u na ho ne u gha khian ovbi mwẹ, ere ọkpa ne u ra re vbọ i rrọọ.”

²³ Ahimaz keghi dọlegbe kha wẹẹ, “Emwi ne ọ khọn rẹn, ọ sunu, I ho ne I gha khian.” E Joab keghi khama rẹn wẹẹ, “Gha khian khekherriọ.” Ahimaz na rhulẹ la odẹ Iya e Jọdan, ọ na gberra ọviẹn nii.

²⁴ E Devid keghi tota ye ihọkpa vbe ẹkpo onurho ne ọ ke owa kevbe onurho ne ọ ke ore. Ọbodẹ keghi hin odukhunmwu ekẹn, ọ keghi mudia ye ẹrhunrhun owa ne a bọ yan onurho. Ọ ghi tọn aro mu, ọ keghi ya bẹghe okpia ọkpa ne ọ rhulẹ dee, rẹn ọkpa vbe ẹhi ẹre.

²⁵ Ọ kegbi niẹn urhu tama ọba. Ọba keghi kha wẹẹ, “Deghẹ rẹn ọkpa nọ, iyẹn oghọghọ ọ re ọ dee do na.” Ọ re ne ọ rhulẹ dee nii na hẹko gha ye egbe dee.

²⁶ Ọbodẹ nii kevbe bẹghe ọvbehe vbe rhulẹ dee, rẹn ọkpa vbe ẹhi ẹre, ọ tama ne ọbodẹ vbe onurho wẹẹ, “Ye ghe vbe ọmwa ọvbehe vbe rhulẹ dee.” Ọba keghi vbe wanniẹn wẹẹ, “Iyẹn esi ọ re ọna vbe dee do na.”

²⁷ Ọbodẹ nii keghi kha wẹẹ, “I miẹn nian wẹ ọmwa ne okaro rhulẹ vbe Ahimaz.” Ọba keghi kha wẹẹ, “Ọmwa esi nọ, iyẹn oghọghọ ọ re ọ dee do na.”

²⁸ Ahimaz keghi da tuẹ ọba, ọ na mu ẹko rhu otọ vbe odaro ẹre, ọ na kha wẹẹ, “Rhie urhomwẹ ne Nọyaẹnmwa Osanobua ruẹ, ọmwa ne ọ gie obọ ruẹ ke ukhunmwu ne emwa ni sọtẹ ghe ruẹ, Umogun!”

²⁹ Ọba keghi ka kha wẹẹ, “Deghẹ ọ ye ọvbokhan nii ẹse ighẹ Absalọm?” Ahimaz na wanniẹn wẹẹ, “Dọmọ o, ẹghẹ ne Joab na gie mwẹ, I miẹn vbe emwa hu yo hu rre, sokpan I ma rẹn vbe ọ ya de.”

³⁰ Ọba keghi tama rẹn wẹẹ, “Mudia vbe odọọ.” Ẹre ọ na gele gberra ghe odọọ ya mudia.

³¹ Ẹre ovbi Sudan ne ọviẹn nii na rre, ọ keghi tama ọba wẹẹ, “Iyẹn oghọghọ ọ re I rhie rre Umogun. Ẹdẹnẹrẹ na, e Nọyaẹnmwa gie obọ ruẹ ke okhunmwu ne iran ni sọtẹ ghe ruẹ!”

³² Ọba keghi kha wẹẹ, “Adeghẹ ọ ye ọvbokhan nii ighẹ Absalọm ẹse.” Ọviẹn nii keghi wanniẹn wẹẹ, “Emwi ne ọ rruan rẹn ọ re ọ gha rruan avbe eghian ruẹn hia kevbe iran ni sọtẹ ghe ruẹ.”

³³ Akhiẹ keghi gba ọba ẹko ọ keghi la ughugha ne ọ rre iyeke onurho, ọ na viẹ. Vbene ọ khian nii, ọ kegha viẹ wẹẹ, “Ovbi mwẹ o, ovbi mwẹ, Absalọm, Absalọm ne ovbi mwẹ, mẹ ọ re uwu ne ọ gbuẹ gha te gbe, ovbi mwẹ, Absalọm ne ovbi mwẹ!”