II Samuẹl 17 - Edo Bible (E Baibol Ẹdo) Version 1996

E Husiai Bu Absalọm Ude Dan

¹ Ahitofẹl keghi tama Absalọm wẹẹ, “Gun mwẹ viọ arhin arriaisẹn iweva (12,000) ba egbe ne I khu e Devid asọn na.

² I ghi dekun ẹnrẹn vbe ẹghẹ ne egbe na wọ ẹre na, ekhọe ẹre vbe lighi. Ọ gha runran, emwa rẹn hia ghi lẹ kua, ọba ọkpa ọre I gha gbe.

³ I ghi viọ emwa nekpa bu ruẹ gha dee vbene a rhie ọha werriegbe gie ọdọ ẹre. Orhiọnkpa kẹkan ọre a ho ẹre uhunmwu vbọ, emwi i ra vbe ru iran ni dekẹe hiehiere.”

⁴ Ọna keghi wa ye vbe iro esiesi vbe aro Absalọm kevbe avbe ọkaolotu ivbi Izrẹl hia.

⁵ Absalọm keghi kha wẹẹ, “Wa tie Husiai rre ne a vbe họn vbe ne irẹn kha hẹ.”

⁶ E Husiai ghi rre, Absalọm tama rẹn wẹẹ, “Ghe iro ne Ahitofẹl zẹ rre, ne ima ru ẹe vberriọ ra? A deghẹ ẹ i re vberriọ, wẹ vbe tama ima emwi ne a gha ru.”

⁷ E Husiai keghi wanniẹn wẹẹ, “Iro ne Ahitofẹl zẹ rre ẹghẹ na, ẹ i maa,

⁸ wẹ rẹnrẹn wẹ erhaa kevbe emwa rẹn, ekpakpasusu iran khin vbe igbinna kevbe wẹ iran khọ sẹ akpakomiza ne a munọ ẹre emọ vbe uwu oha. Erhaa, ovbiyokuo ne ọ kpe agbọn nọ, ẹ i vbe di ehe ne emwa rẹn ye ya vbe asọn.

⁹ Vbene a wa guan na nian, u ghaghe ọ lẹre ye uwu uvun okuta ra ehe ọvbehe. Ọwarọkpa vbe Devid a dekun emwa ruẹn nẹ, emwa ni họn ẹn ghi gha ta ẹe khian ighẹ obọ ke okhunmwu ne emwa ruẹn.

¹⁰ Ẹghẹ nii, uhin ghẹ te ohan ghẹ ghi mu iran ni te din vbe oduma vbe uwu emwa ruẹn, rhunmwuda emwa Izrẹl hia rẹn erha ye ovbiyokuo ne ẹkpẹn, kevbe wẹ ekpakpasusu emwa rẹn khin vbe igbinna.

¹¹ Iro ne imẹ zẹe ọrọre wẹ ne u si ivbi Izrẹl hia koko, ke ehe ne ẹvbo sẹe vbe obọ na, ya sẹ obọ nọkpa, iran ni ye vbe ekhae ni rre ọkpẹn okun vbe ubunmwẹ, wẹ ghi tobọ viọ iran gha rrie okuo.

¹² Ehe ne Devid a rhirhi gha ye, ma gha miẹn ọẹn, ma ghi dekun ẹnrẹn ọ te do rẹn enaye. Ke irẹn kevbe emwa rẹn, ọkpa ne ọ ra miẹn uhunmwu, ẹ i rrọọ.

¹³ A deghẹ te ọ ghi lẹ la ore ẹvbo, emwa ima ghi viọ irri rre, a ghi si ẹvbo nii sẹ otọ, a i vbe sẹ okuta ọkpa rae ye uhunmwu oke nii.”

¹⁴ Absalọm kevbe emwa rẹn keghi kha wẹẹ, “Iro ne Husiai zẹe ọ re ọ maa sẹ ọghe Ahitofẹl.” E Nọyaẹnmwa ta ẹe nẹ wẹ a i rhie iro esi ne Ahitofẹl zẹ rhunmwuda ne ọkhọ miẹn ehe na rruan Absalọm.

A Gie Uhunmwu Gie Devid, Ọ Keghi Lẹ Fe

¹⁵ E Husiai keghi do tama avbe ohẹn ighẹ Zadọk kevbe Abiata, ude ne irẹn bu Absalọm re ke ẹe kevbe avbe ọkaolotu Izrẹl kevbe vbene Ahitofẹl vbe bu ude hẹ.

¹⁶ E Husiai keghi rhie te ẹe wẹẹ, “Zẹgiẹgiẹ nian, ya tama e Devid wẹ ne ọ ghẹ gbe asọn na vbe ehe ne a na fian ẹzẹ rra vbe uwu ẹgbo, sokpan ne ọ fian e Jọdan rra ẹgiẹgiẹ ne iran ghẹ mu ẹẹn ke ẹe kevbe emwa rẹn hia ya gbelua.”

¹⁷ E Jonatan kevbe Ahimaz keghi mudia vbe Ẹnrogẹl rhunmwuda ne emwa ghẹ ya bẹghe iran vbe iran a la ore ẹvbo. Ọvbokhan okhuo ọkpa ẹre ọ wa ya gha na iyẹn emwi ne ọ sunu ma iran, iran ghi vbe ya tama e Devid ne ọba.

¹⁸ Sokpan, vbe ẹghẹ na nian, ọvbokhan ọkpa keghi bẹghe iran, ọ na ya tama Absalọm; iran keghi rhunmwuda ọnii zẹgiẹgiẹ gha rrie owa okpia ọkpa vbe Bẹhurim. Uhae ọkpa rre ọkpẹn owa ẹre iran keghi la uwu ẹre.

¹⁹ Amwẹ okpia nii keghi mu ewa, ọ na wa ẹre yan unu ẹnrẹn, ọ na tan ọ ka yọ, vbene ọmwa i ghi na bẹghe emwirhọkpa vbe evba.

²⁰ Irogho Absalọm kegha die owa nii, iran keghi nọ okhuo nii wẹẹ, “Ahimaz kevbe Jonatan vbo?” Rẹn keghi wanniẹn wẹẹ, “Iran fian ẹzẹ rra.” Emwa nii keghi gualọ iran, sokpan, ugbẹn vbe iran ma miẹn iran, iran keghi werriegbe gha rrie Jerusalẹm.

²¹ Ugbẹn vbe iran ghi kpao nẹ, Ahimaz kevbe Jonatan keghi ladian, vbe uwu uhae nii, iran na gha khian ya na iyẹn ma e Devid ne ọba. Iran keghi tama rẹn vbene Ahitofẹl te kun emwi ne ọ gha ru ẹre re hẹ, iran na tama rẹn wẹẹ, “Zẹgiẹgiẹ, fian ẹzẹ rra.”

²² Rhunmwuda ọnii, e Devid kevbe emwa rẹn keghi suẹn gha fian ẹzẹ rra, vbe ẹdẹ ghi te gbe, iran hia fian ẹn rra fo nẹ.

²³ Ahitofẹl ghi miẹn wẹ, a ma rhie iro ne irẹn zẹẹ, ọ na rhunmwuda ọnii gbalọ ekẹtẹkẹtẹ ọre, ọ na gha rrie ẹvbo ẹre. Ọ ghi mwamwa emwi hia ye ihe nẹ, ọ na ya zẹgbẹle. Iran keghi re ẹre ye idin ẹgbẹe ọre.

²⁴ Ẹghẹ ne Absalọm kevbe emwa rẹn ghi na fian ẹzẹ Jọdan rra, e Devid sẹ ẹvbo ne a tie ẹre Mahanem nẹ.

²⁵ (Absalọm keghi rhie Amasa ye ihe Joab zẹ vbe ọkaokuo. Amasa na kegha re ovbi e Jetẹ ne ọmwa Ismal. A kegha tie iye ẹe Abigẹl ne ovbi e Nahas ne ovbiye Zeruaia ne iye Joab.)

²⁶ Absalọm kevbe emwa Izrẹl keghi bu agọ ye Giliad.

²⁷ Ugbẹn vbe Devid ghi sẹ Mahanem, Siobi ne ovbi e Nahas ne ovbi ẹvbo ne a tie ẹre Raba vbe Amọn, kevbe Makiẹ ne ovbi Amiẹl ne ovbi ẹvbo ne a tie ẹre Lodeba, kevbe Bazilai ne ovbi ẹvbo ne a tie ẹre Rogelim vbe Giliad, keghi bu ẹre rre.

^28-29 Iran na viọ ekpamaku ni vbẹe rre, akhe kevbe emwi ne a wa ye ukpo ne a vbiẹ. Iran kevbe viọ evbare gie Devid kevbe emwa rẹn: avbe ọka ẹsin, oka irhuarhua, evbare ne a lee, ọmọ erhan ne a tọẹn, ikpakpalọ, ere, amẹ owọn, ewẹn ẹmila ne ọ zeze, kevbe ewẹn ẹmila ne ọ kiri kevbe avbe ohuan. Iran rẹnrẹn wẹ egbe gha wọ e Devid kevbe emwa rẹn, ovbamẹ kevbe ohanmwẹ gha vbe gbe iran vbe uwu ẹgbo.