II Samuẹl 16 - Edo Bible (E Baibol Ẹdo) Version 1996

¹ Ugbẹn vbe Devid ghi ya ekherhe gberra ehe ne oke nii na yo sẹ nẹ, e Ziba ne ọguọmwadia e Mẹfibosiẹt keghi do vba ẹre vbe udomwurri, ọ keghi ya ẹsin eva mu ududu ebrẹd uri gha dee ke ẹe kevbe ititi ọmọ erhan ne a kare iyisẹn, ititi ọmọ erhan ne a ma ka iyisẹn, kevbe ọgọ ayọn ohian ọkpa.

² E Devid ne ọba keghi nọ rẹn wẹẹ, “Vbe u a a ya ena hia ru yi?” E Ziba keghi wanniẹn wẹẹ, “Avbe ẹsin ni rrọọ keghi re ne ẹgbẹe ọba ra gha hin, ebrẹd kevbe avbe ọmọ erhan ni rrọọ kegha re ne avbe emwa nii gha re, ayọn nọ rrọọ keghi re ne iran gha wọn vbe egbe a wọ iran vbe uwu ẹgbo.”

³ Ọba keghi kha wẹẹ, “E Mẹfibosiẹt ne eyẹ e Sọl ne arowa a vbo yi?” E Ziba keghi wanniẹn wẹẹ, “Ọ rre Jerusalẹm, rhunmwuda aro ẹre wa dae nẹ wẹ ivbi Izrẹl gha mu arriọba e Sọl ne erha ẹe odede ne ẹẹn.”

⁴ Ọba keghi khama Ziba wẹẹ, “Emwi ne Mẹfibosiẹt mwẹ hia khian ọwuẹ.” E Ziba ke wanniẹn wẹẹ, “Ọguọmwadia ruẹ ọre I khin. I i gha tẹ vbe obọ ruẹ Umogun.”

E Devid Kevbe Simẹi

⁵ Ugbẹn vbe Devid ne ọba ghi sẹ Bahurim, ọtẹn e Sọl ọkpa ne a tie ẹre Simẹi ne ovbi e Gera, keghi bu ẹre gha dee, ọ na wa gha rhovbiẹ ọe vbene ọ wa ya dee nii.

⁶ E Simẹi keghi suẹn gha filo okuta gbe Devid kevbe avbe ekhaẹmwẹ ọnrẹn, egbe ne a rhe ya miẹn wẹ emwa e Devid hia kevbe ivbi ọkpọmwa ẹnrẹn wa do lẹga ẹre.

⁷ E Simẹi keghi ya ihẹn yan rẹn, ọ wẹẹ, “Ladian mwa! Ladian mwa! Izigha! Ọrhiaẹvbo!

⁸ U mu arriọba e Sọl, te Nọyaẹnmwa ghi rria ruẹ ikhi na ba ẹmwẹ emwa ẹgbẹe e Sọl ne u gbele ua. Banbanna nian, e Nọyaẹnmwa vbe mu arriọba nii ne Absalọm ne ovbi uẹ nẹ, ọwuẹ fo nẹ vbe agbọn, wẹ ne izigha!”

⁹ Ẹre Abisiai ne ovbi e Zeruaia na tama ọba wẹẹ, “Umogun, vbọzẹ ne u na rhie ẹghẹ ne ovbiakota na ya gha rhovbiọ yi? Gun mwẹ bu ẹre ne I ya fian ẹre uhunmwu fua!”

¹⁰ Ọba keghi khama Abisiai kevbe Joab ne ọtiọnrẹn wẹẹ, “Ọ ma zẹdẹ kan uwa, adeghẹ ọ rhovbiẹ mwẹ rhunmwuda wẹ e Nọyaẹnmwa ọ re ọ wẹ ne ọ rhovbiẹ mwẹ, gha ọ ghi ra rri ọre unu ẹnrẹn?”

¹¹ Ẹre Devid na tama Abisiai kevbe avbe ekhaẹmwẹ ọnrẹn hia wẹẹ, “Ovbi imẹ wẹ rẹn ra gbe mwẹ uan, vbọzẹ ne ẹmwẹ ovbi e Bẹnjamin na, na yan uwa unuan yi? Wa sẹ ọe rae ne uwa gie ẹe gha rhovbiẹ mwẹ, rhunmwuda, e Nọyaẹnmwa ọ re ọ gie ẹe.

¹² U gha ghe, e Nọyaẹnmwa gha zẹ ye usẹ ẹmwẹ agbọn ne I miẹn, ọ ghi ya ihẹn ne ọ tie na khian afiangbe mẹ.”

¹³ Ẹre Devid kevbe emwa rẹn na lele odẹ. E Simẹi na kpe lele iran, ọ na gha zẹ ebubẹ ku iran vbe ne ọ khian nii.

¹⁴ Ugbẹn vbe ọba kevbe emwa rẹn ghi sẹ e Jọdan, egbe keghi wọ iran, ọ re iran ghi na yakọ vbe evba.

Absalọm Vbe Jerusalẹm

¹⁵ Absalọm kevbe ivbi Izrẹl ni lele ẹe keghi la ore Jerusalẹm, Ahitofẹl kevbe gha rre evba.

¹⁶ Ugbẹn vbe Husiai ne ọse Devid ne ọ mu ẹtin yan ghi miẹn Absalọm, ọ tama rẹn wẹẹ, “Ọba gha tọ, ọ kpẹre! Ọba gha tọ, ọ kpẹre!”

¹⁷ Absalọm keghi nọ rẹn wẹẹ, “Aho ẹmwẹ ọmwa ne u mwẹ ghe ọsiọ ghi vbo yi? Vbọzẹ ne u ma na lele ẹe gha khian yi?”

¹⁸ E Husiai keghi wanniẹn wẹẹ, “Vbe i a ghi lele ẹe hẹ? Otu ọmwa ne Nọyaẹnmwa, kevbe emwa na, kevbe Izrẹl zẹe, ọ re I ye. I gha tota ke uwẹ.

¹⁹ A deghẹ erriọ nọ khekherriọ, de ọmwa ne ọ kere ne imẹ gha ga, a deghẹ ẹ i re ovbi ọse mwẹ? Zẹ vbene I ga erhaa, erriọ ọ re I ghi ra vbe ga uwẹ.”

²⁰ Ẹre Absalọm na mu aro da Ahitofẹl, ọ wẹẹ, “Wan rre. De emwi ne ima ghẹ ghi ru yi vbene ima ghi na sẹ emwana nẹ?”

²¹ Ahitofẹl keghi wanniẹn wẹẹ, “Bu avbe egbakhian erhaa, ne ọ sẹrae ye otọ ne iran gha gbearoghe ẹguae ne u ya gu iran ru emwi ọdọ vbe amwẹ. Ivbi Izrẹl hia ghi do họn wẹ u sọtẹ erhaa nẹ, orhiọn ghi kakabọ la irogho ruẹ iwu.”

²² Ẹre iran na ya ukpọn kuẹ iwowo ye odukhunmwu egedege ẹguae. Absalọm keghi wa la uwu ẹre ya gha gu avbe egbakhian erhae ru emwi ọdọ vbe amwẹ vbe sirra emwa hia.

²³ Ude ne Ahitofẹl bu ẹghẹ nii, te emwa wa rhie ẹre vbene a miẹn wẹ ẹmwẹ ne Osanobua ta ẹe wa nọ, erriọ ọ re Devid kevbe Absalọm ya ẹe gha ru emwi.