II Samuẹl 15 - Edo Bible (E Baibol Ẹdo) Version 1996

Absalọm Mu Egbe Ye Isọtẹ

¹ Vbe iyeke ọnọna, Absalọm keghi ya viọ ẹsin kevbe ikẹkẹ okuo, deba ivbiyokuo ekigbesiyeha ne ọ gha rhulẹ ke odaro ne irẹn.

² Ọ gha rhiọrre vbe owiẹ vbirrivbirri, ọ ghi ya mudia ye odẹ vbe ehe ne a la la ore ẹvbo. Ọmwaikọmwa gha dee ne ọ do gu ọba guan vbe ekpa ẹmwẹ ne ọ ho ne ọba guan yi, Absalọm ghi tie ẹre rrie egbe, ọ ghi nọ ehe ne ọ ke rre. Ọmwa nii gha kha wẹẹ, “Enọwanrẹn ẹgbẹe vbenian vbe Izrẹl ọ re I ke rre.”

³ Absalọm ghi kha wẹẹ, “Uma miẹn nian, u te wa rri ase, sokpan, ọmwa ne ọba zẹe ye otọ i rrọọ ne ọ gha guan yọ ne uẹn.”

⁴ Absalọm ghi vbe rhie te ẹe wẹẹ, “Vbọrrọ nian akpawẹ ọmwa ne ọ bu ohiẹn ọ re I khin! Ọmwaikọmwa ne ọ mwẹ ẹzọ sẹtin gha bu mwẹ rre, I ghi bu ohiẹn ẹmwata ne ẹẹn.”

⁵ Ọmwa ni ghẹ ghi sikẹ Absalọm ne ọ diguẹ tuẹ ọe, Absalọm ghi mu ẹẹn, ọ ghi si ẹe ke ẹe gbe, ọ ghi mu unu soso ẹre unu.

⁶ Erriọ ọ re Absalọm wa gha ru emwa hia ni bu ọba rre ne ọ bu ohiẹn iran. Erriọ ọ ya silo ehia ba egbe.

⁷ Ukpo enẹ ghi gberra nẹ, Absalọm keghi tama e Devid ne ọba wẹẹ, “Evbavba, gun mwẹ gha rrie Hibrọn ne I ya ha eyan ne I ru ma e Nọyaẹnmwa ẹghẹ ne I na rre Gẹsiọ.

⁸ Ẹghẹ ne I na gha rre Gẹsiọ vbe Aram, I yan ma e Nọyaẹnmwa wẹ, ọ gha rhie mwẹ dọlegbe sẹ Jerusalẹm, I gha do ga ẹe vbe Hibrọn.”

⁹ Ọba keghi khama rẹn wẹẹ, “Gha khian vbe ọfumwegbe.” Ẹre Absalọm na gha rrie Hibrọn.

¹⁰ Sokpan, ọ keghi gie ya tama ẹwae ni rre Izrẹl hia wẹẹ, “Wa gha họn vbe a kpe okpe, wa ghi kha wẹẹ, ‘Absalọm rriọba nẹ vbe Hibrọn!’ ”

¹¹ Arhin uri keghi lele Absalọm kpao vbe Jerusalẹm, vbe uwu avbe emwa ne ọ tie re; iran na ma rẹn isọtẹ ne ọ ghae yi, okhian ẹmwata ọre iran gha rrie.

¹² Ẹghẹ ne ọ ghi na gha zọ ese, Absalọm keghi gie ya tie Ahitofẹl ke Gilo rre, ọkpa vbe iran ni gu e Devid ne ọba zẹ iro ọre irẹn khin. Ekhuan isọtẹ ne iran khuan khọ ọba kegha muotọ yọ, iran ni lele Absalọm khian kegha bun yọ.

E Devid Lẹ Hin E Jerusalẹm Rre

¹³ Orhunmwu ọkpa keghi do do tama e Devid wẹẹ, “Ivbi Izrẹl wa ya gha niẹn obọ ne Absalọm.”

¹⁴ Ẹre Devid na tama ekhaẹmwẹ ọnrẹn ni gue ẹe rre Jerusalẹm wẹẹ, “Te ima gha zẹgiẹgiẹ ladian ne a miẹn ehe na miẹn uhunmwu vbe obọ Absalọm. Ẹgiẹgiẹ, ne ọ ghẹ ya rre banbanna, obọ ẹre ghi ke ukhunmwu ne ima, ọ ghi gbele emwa hia ni rre ore ẹvbo ua.”

¹⁵ Iran keghi wanniẹn wẹẹ, “Umogun, ma mu egbe ne a ru vbene u rhirhi a kha hẹ.”

¹⁶ Ẹre ọba na kpao, ke ẹe kevbe ẹgbẹe ọre hia kevbe avbe ekhaẹmwẹ ọnrẹn, sokpan ama wẹ egbakhian igbe ne ọ sẹ rae ne iran gha gbe aro ghe owa.

¹⁷ Ọba vbe emwa rẹn ghi ra kpao vbe ore ẹvbo rre, iran keghi yakọ vbe owa ne okiekie.

¹⁸ Avbe ekhaẹmwẹ ọnrẹn keghi mudia ke ẹe, avbe emwa Kerẹt kevbe Pẹlẹt keghi ke odaro gberra gha khian. Avbe iyokuo uri eha (600) ni lele ẹe ke Gat rre, kevbe gberra,

¹⁹ ọba keghi tama Itai ne ọkaolotu iran wẹẹ, vbọzẹ ne u na lele ima khian yi. Werriegbe ne u ya tota ke ọba ne ọ ghi vbe rre ẹkete na. Orhunmwuyẹn wẹ khin, ọmwa ne ọlọghọmwa khu hin ẹvbo ẹre rre.

²⁰ Ọ ma he kpee. ne u sẹ edinran, vbe i a ghẹ ghi na vbe guẹ gha zozo lele mwẹ khian hẹ. Mẹ ma rẹn ehe ne I rrie. Viọ ivbi ẹvbo ruẹ, ne u werriegbe. Te Nọyaẹnmwa gha tohan uwa ne ọ mudia ke uwa.

²¹ Sokpan, Itai wanniẹn wẹẹ, “I ya eni Nọyaẹnmwa vẹn ihẹn, Umogun, wẹ ehe ne u rhirhi la ọ re I ra lele uẹ la, ọ gha khọnrẹn ne ọ gha re ọghe uwu.”

²² E Devid keghi wanniẹn wẹẹ, “Ọ ma an khekherriọ, khianmwu.” Ẹre Itai na gha khian vbe odaro, irẹn kevbe emwa rẹn deba emwa iran hia.

²³ Emwa ni lele Devid khian ghi gberra khian, emwa nii hia keghi wee eve. Ọba keghi fian ẹzẹ Kidrọn rra, emwa rẹn keghi vbe fian ẹẹn rra, iran keghi la odẹ ẹgbo.

²⁴ E Zadọk kegha rre evba deba ivbi e Livai ni mu Ẹkpẹti Ile ne ọ huanrẹn. Iran keghi mu ẹẹn ye otọ, emwa hia te do kpao hin ore ẹvbo rre. Abiata keghi vbe gha rre evba.

²⁵ Ẹre ọba na khama e Zadọk wẹẹ, “Mu Ẹkpẹti Ile werriegbe gha rrie ore ẹvbo. A deghẹ Nọyaẹnmwa ho ẹmwẹ mwẹ, ọ gha rhie mwẹ werriegbe rre ẹdẹ ọkpa, ne I do bẹghe ẹre ke ẹe kevbe ehe ne a mu ẹẹn yi.

²⁶ Sokpan, adeghẹ ẹmwẹ mwẹ ma ghi ye ọre, ọ maa, wẹ ne ọ ru mwẹ emwi ne ọ rre irẹn ekhọe.”

²⁷ Ọ keghi bu Zadọk gha khian, ọ tama rẹn wẹẹ, “Rhie ovbi uẹ ighẹ Ahimaz kevbe Jonatan ne ovbi Abiata, ne uwa werriegbe gha rrie ore ẹvbo vbe ọfumwegbe.

²⁸ Vbe banbanna nian, I gha yakọ vbe ehe ne a na fian ẹzẹ rra vbe uwu ẹgbo vbe u te gie uhunmwu gun mwẹ!”

²⁹ Ẹre Zadọk kevbe Abiata na mu Ẹkpẹti Ile werriegbe gha rrie Jerusalẹm iran na ya gha rre evba.

³⁰ E Devid keghi mu Oke Ọliv hin, ọ kegha viẹ khian, ọ ma viọ ibata ye owẹ, sokpan ọ keghi mu ukpọn rhu uhunmwu gha khiẹ. Iran ni lelẹe khian hia keghi vbe viọ ukpọn rhu uhunmwu, iran na gha viẹ.

³¹ E Devid ghi họn ighẹ Ahitofẹl vbe deba isọtẹ Absalọm, ọ keghi kha wẹẹ, “Nọyaẹnmwa, lahọ, fi ibude Ahitofẹl werriẹ khian ukọnmwẹ.”

³² E Devid ghi sẹ uhunmwu oke, ehe ne ihọkpa ne a na ru ugamwẹ ye, ọsiọre ne ọ mu ẹtin yan ighẹ Husiai ne ovbi Akit keghi do vba ẹre ke ẹe kevbe ukpọn nẹ a yanghaẹn kevbe iku vbe uhunmwu.

³³ E Devid keghi tama rẹn wẹẹ, “Ihẹ u khian gha khin mwẹ re, a deghẹ u lele mwẹ gha khian.

³⁴ Sokpan, u gha sẹtin yọmwẹ obọ vbe ekpa ne u gha na gha ghe odan ye ude ne Ahitofẹl bu, u ghi werriegbe gha rrie ore ẹvbo, u ghi ya tama Absalọm wẹẹ, ‘Umogun, I gha vbe gha ga uwẹ nian vbene I te vbe gha ga erhaa.’

³⁵ Avbe ohẹn ighẹ Zadọk kevbe Abiata gha rre evba, u ghi ta ẹmwẹ ne u họẹn vbe ẹguae ọba ma iran.

³⁶ Ivbi Livai ighẹ Ahimaz kevbe Jonatan rre ehe ne iran ye, wa ghi gie iran do gha na iyẹn ẹmwẹ ne u họẹn ma mwẹ.”

³⁷ Ẹre Husiai ne ọ re ọse Devid na wa dọlegbe sẹ ore ẹvbo vbe ẹghẹ ne Absalọm wa vbe ya rre zẹẹ.