II Samuẹl 14 - Edo Bible (E Baibol Ẹdo) Version 1996

E Joab Mwamwa Urremwẹ Absalọm

¹ E Joab ne ovbi Zeruaia rẹnrẹn wẹ ẹmwẹ Absalọm wa da e Devid ẹsẹse.

² Rhunmwuda ọnii, e Joab keghi gie ne a tie okhuo ne umẹwaẹn ọkpa ne ọ rre Tẹkoa wẹ ne ọ bu irẹn gha dee. Ọ keghi tama okhuo nii wẹẹ, “Ba ru vbene a miẹn wẹ akhiẹ ọ re u ye, viọ ukpọn akhiẹ ye egbe, ghẹ vbe salọ eto ruẹ. U ghi ru zẹ vbe okhuo ne ọ kpẹre ne ọ kegha khiẹ.

³ U ghi bu ọba gha khian ya tama rẹn emwi ne I wẹ ne u tama rẹn.” Ẹre Joab na tama rẹn ẹmwẹ ne ọ gha ta.

⁴ Okhuo nii keghi bu ọba gha khian, ọ vbokho egbe rriotọ vbe ọghọ ọ keghi kha wẹẹ, “Yọ mwẹ obọ, Umogun!”

⁵ Ọ na nọ rẹn wẹẹ, “Vbe u a ho ne I ru nuẹn yi?” Rẹn keghi wanniẹn wẹẹ, “Okhuo ne ọ de ẹgbẹe ọre I khin, enọwanrẹn. Ọdafẹn mwẹ wu nẹ.

⁶ Enọwanrẹn, emọ ikpia eva ọre I mwẹ. Ọ ghi sẹ ẹdẹ ọkpa, ẹzọ keghi sunu ne iran vbe oha, ehe ne a ma na miẹn ọmwa ne ọ mu iran igbinna, ọkpa keghi gbe nọkpa a.

⁷ Ne a ghi ye na nian enọwanrẹn, etẹn mwẹ hia wa hẹ aro da mwẹ, iran wẹ ne I rhie ovbi mwẹ ne iran, ne iran gbe ẹe rua ba ẹmwẹ ne ọ na gbe ọtiọnrẹn uan. Iran gha ru emwi na, mẹ ghi wa do khian ne ẹ i ghi mwẹ ọmọ okpia. Iran gha wa rhu mwẹ ukparo ọkpa ne I te mwẹ, iran ghi do ya ọdọ mwẹ khian ne ẹ i ghi mwẹ ọmọ okpia ne ọ gha ya eni ẹnrẹn khian ne ọ ma gbe ẹro.”

⁸ Ọba keghi wanniẹn wẹẹ, “Gha rrie owa, I gha guan ye ẹmwẹ na.”

⁹ Okhuo nii keghi wanniẹn wẹẹ, “Umogun, emwi ne u rhirhi ru ye ẹmwẹ na, uhunmwu imẹ kevbe ẹgbẹe mwẹ ọ re ọ ye, wẹ vbe ẹgbẹe ọba ruẹ ma rẹn ọkpa, ọ ma rẹn eva.”

¹⁰ Ọba keghi wanniẹn wẹẹ, “A deghẹ ọmwaikọmwa ye obọ sekhae ne uẹn, si ẹe bu mwẹ gha dee, ẹ i ghi guẹ guan ẹdẹ.”

¹¹ Okhuo nii keghi kha wẹẹ, “Umogun, lahọ, na erhunmwu ghe e Nọyaẹnmwa Osanobua ruẹ wẹ ne avbe etẹn mwẹ, ni wẹ iran ra rria ikhi ye uwu ovbi mwẹ, ghẹ vbe ya ru orukhọ ne ọ ghi sẹẹ, vbe ne iran gha na gbe ovbi mwẹ ne ọ ghi ke ẹe.” E Devid keghi kha wẹẹ, “Eni Osanobua nọ rrọọ ọre I ya yan wẹ emwi ọkpa ne ọ ra ru ovbi uẹ, ẹ i rrọọ.”

¹² Okhuo nii keghi kha wẹẹ, “Umogun, ọ ye kẹ ẹmwẹ ọkpa ne I ghi gie ue ta.” Rẹn keghi wanniẹn wẹẹ, “Ọ maa.”

¹³ Okhuo nii keghi kha wẹẹ, “Vbe u a na ru emwi a baku ru vberriọ ghe emwa Osanobua hẹ yi? U ma kue ne ovbi uẹ ke iwe gha die owa, ẹmwẹ ne u tae wan nian, ọ re u ya bu ohiẹn ghe egbe uẹ.

¹⁴ Te ima gha he wulo, te ima yevbe amẹ ne a rhurhẹe ku otọ ne ẹ i ghi gia dọlegbe si koko. Emwa gha wulo, uhin ighẹ Osanobua ighi vbe dọlegbe viọ iran gha die agbọn. Sokpan ọba sẹtin gualọ odẹ la rhie ọmwa ke iwe rre.

¹⁵ Banbanna nian, Umogun, emwi ne ọ si ẹe ne I na do guẹ guan ọrọre wẹ emwa ni, ya obọ sekhae mẹ, ẹre I na tobọ mwẹ ta ẹe wẹ I gha do guẹ guan vbe idaehọ wẹ, u gha ru vbene I nọ rẹn.

¹⁶ I roro ẹe wẹ, u gha rhie ehọ mẹ ta yi, ne u fan mwẹ vbe obọ ọmwa ne ọ ho ne ọ gbe mwẹ gbe mwẹ ọmọ, ọ ghi vbe yuolo ima kua hin otọ ne Osanobua mu ne emwa rẹn rre.

¹⁷ I keghi tama egbe mwẹ wẹ, eyan ne uwẹ yan rẹn gha degue mwẹ, enọwanrẹn, rhunmwuda te ọba ye vbe odibo Osanobua, ọ vbe rẹn emwi ne ọ maa, hin ne ẹ i maa rre. Te Nọyaẹnmwa ne Osanobua ruẹ gha yaba ruẹ!”

¹⁸ Ọba keghi wanniẹn wẹẹ, “I khian nọ ruẹn ọta ọkpa, u ghi ta ẹmwata ne ọ rrọọ hia ma mwẹ.” Okhuo nii keghi wanniẹn wẹẹ, “Nọ mwẹ ọta ne ọ rhirhi khọn ruẹn, Umogun.”

¹⁹ Ọ na nọ rẹn wẹẹ, “E Joab ọ re ọ kun ẹmwẹ na mu ye uẹ obọ ra?” Okhuo ni wanniẹn wẹẹ, “I ya emwi ni ghi re ni huanrẹn vẹn ihẹn Umogun, we a i miẹn ehe gọgọ ẹmwẹ ruẹn na la, ne a ghẹ rhie ewanniẹn yọ. E Joab ne ọka iwinna ruẹn ọ re ọ tama mwẹ emwi ne I gha ru kevbe ẹmwẹ ne I gha ta.

²⁰ Sokpan te ọ ru ẹe ne ọ ya dọlọ ẹmwẹ na hia yi. Te u ye vbe odibo Osanobua Umogun, u kevbe rẹn otọ emwi hia, ni sunu.”

²¹ Vbe okiekie, ọba keghi tama e Joab wẹẹ, “I ta ẹe nẹ ne I ru emwi ne u ho. Ya rhie ọvbokhan nii rre ighẹ Absalọm.”

²² E Joab keghi ya ọghọ mu ẹko rhu otọ ne Devid, ọ wẹẹ, “Te Osanobua gha fiangbe uẹ, Umogun, wanwanna nian, I rẹnrẹn wẹ ẹko mwẹ ma ruẹn, rhunmwuda, u ru emwi ne I nọ rẹn mẹ.”

²³ Ẹre irẹn na ghi kpaegbe, ọ na gha rrie Gẹsiọ, ọ na ya rhie Absalọm dọlegbe gha die Jerusalẹm.

²⁴ Sokpan, ọba keghi kha wẹ ne Absalọm ghẹ yo uwu ẹguae, ọ na kha wẹẹ, “I i ho ne I bẹghe ẹre.” Rhunmwuda ọnii, Absalọm kegha rre owa obọ ẹre, ọ ma vbe ya egbe ne ọba miẹn.

A Dọlọ Absalọm Kevbe Devid Kugbe

²⁵ A ma vbe miẹn orhiọnkpa vbe Izrẹl ne a gha ya gie Absalọm vbe ose, wa ke uhunmwu ya sẹ ikpihianwẹ, okan rhọkpa i vbe rrọ ọre egbe.

²⁶ Ọ kegha mwẹ eto ne o mu ma, uhukpa vbe ukpo ọre ọ gbe ẹe vbe ọ gha ghi tan gbe, ọ na gha khua. Ọ wa si uwan isẹn vbe ọmwa ne a ya mwa emwi ne ọba.

²⁷ Absalọm kegha mwẹ emọ ikpia eha kevbe ọmọ okhuo ọkpa ne a tie ẹre Tama, ọ keghi wa gha re okhuo ne ọ mose ẹsẹse.

²⁸ Absalọm keghi gbe ukpo eva vbe Jerusalẹm vbe ne ọ ma na miẹn ọba aro.

²⁹ Ọ keghi gie ne a tie Joab rre wẹ ne ọ tuẹ ye irẹn vbe ọghe ọba, sokpan e Joab ma yo. Ọ na dọlegbe gie ne a tie ẹre, sokpan e Joab ma ye yo.

³⁰ Rhunmwuda ọnii, ọ keghi tama avbe eguọmwadia ẹre wẹẹ, “Ghe, ugbo e Joab ọre ọ diake ọghomwẹ, ọka wa vbe zọ vbọ. Wa ya mu erhẹn yọ.” Iran na gele ya mu erhẹn ye ugbo nii.

³¹ E Joab kegha rrie owa Absalọm, ọ keghi nọ wẹẹ, “Vbọzẹ ne eguọmwadia ruẹ na mu erhẹn yọmwẹ ugbo yi.”

³² Absalọm keghi wanniẹn wẹẹ, “I gie ne a tie ruẹ wẹ ne u gha de ne I giọ ne u ya tuẹ yi mwẹ vbe ọghe ọba. Vbe i a ghi kpao vbe Gẹsiọ gha die edinran baa. I ma rẹn ne I wa tota vbe odọọ.” Absalọm keghi rhie te ẹe wẹẹ, “I ho ne u mwamwa ẹẹn ne I miẹn ọba aro. A deghẹ I rri abe wẹ ne ọ gbe mwẹ uan.”

³³ Ẹre Joab na bu ọba Devid gha khian ya tama rẹn vbene Absalọm kha hẹẹ. Ọba keghi gie ne a tie Absalọm ọ keghi bu ẹre gha khian, ọ na mu ẹko rhu otọ ne ẹẹn.