II Samuẹl 13 - Edo Bible (E Baibol Ẹdo) Version 1996

Amnọn Kevbe Tama

¹ Absalọm ne ovbi e Devid kegha mwẹ ovbiye okhuo ọkpa ne ọ mose ẹsẹse, a kegha tie ẹre Tama. Ọkpa ne a tie eni ẹnrẹn Amnọn vbe ivbi e Devid keghi gha ho ẹmwẹ ọnrẹn.

² Ọ ho ẹmwẹ ọmọ okhuo na sẹrriọ wẹ rẹn keghi gha khuọnmwi. Rẹn na roro ẹe wẹ obọ irẹn i ra vba ẹre ẹdẹ rhunmwuda uvbi ne ọ ma he rẹn okpia nọ, a i vbe kue ne ọ gu ikpia gha mu obọ.

³ Sokpan, rẹn kegha mwẹ ọse ọkpa ne a tie ẹre Jonadab, ovbi ọtẹn Devid nokpia ne a tie ẹre Siama, ọ kegha re ọmwa ne ọ wan ẹwaẹn egui.

⁴ E Jonadab keghi tama rẹn wẹẹ, “We ne ovbi ọba, ẹdẹgbegbe ọ re I ya miẹn wẹ aro ruẹ i ma vbe uhunmwu. Tama mwẹ, emwi ne o sii ẹe.” Rẹn keghi wanniẹn wẹẹ, “Ẹmwẹ Tama ne ovbi iye Absalọm ne ovbi erha mwẹ wa yẹ mwẹ.”

⁵ E Jonadab keghi tama rẹn wẹẹ, “Ba kha ighẹ u khuọnmwi ne u ya lovbiẹ. Erha a gha rre do miẹn uẹn u ghi tama rẹn wẹẹ, ‘Lahọ gie Tama ne ọtẹn mwẹ do rhie evbare mẹ, I ho ne ọ mu nene evbare ye eke ne I gha na gha dẹghe irẹn tobọ ẹre vbe emwa, ọ ghi vbe tobọ ẹre gha rhie nene evbare mẹ.’ ”

⁶ Amnọn keghi gele ba ru vbene ọ khuọnmwi, ọ na ya lovbiẹ, e Devid ne ọba keghi ya miẹn ọẹn, Amnọn keghi tama rẹn wẹẹ, “Lahọ, gie Tama do fian omwa eka kherhe vbe emwa na, ehe ne I gha na sẹtin gha bẹghe ẹre, ne ọ vbe tobọ ẹre gha rhie nene evbare mẹ.”

⁷ Ẹre Devid na gie gha rrie ẹguae ya khama e Tama wẹẹ, “Gha rrie owa Amnọn ne u ya le evbare ne ẹẹn.”

⁸ Rẹn keghi gele gha khian, ọ ghi do vba, ọ lovbiẹ. Rẹn keghi mu irhuarhua kherhe, ọ na gbe ẹe, ọ na fian eka eso vbe evba, ehe ne ọ na gha dẹghe ẹre. Ẹre ọ na do fian eka nii.

⁹ Ọ na rhurhẹ ọe ke uwu ọkpan ladian ne ẹẹn ne ọ gha re, sokpan, ọ ma re, ọ keghi khama rẹn wẹẹ, “Wẹ ne emwa hia ladian,” iran keghi gele ladian.

¹⁰ Rẹn keghi tama rẹn wẹẹ, “Mu eka ni gha die ukpo mwẹ vbe emwa ne u tobọ ruẹ gha rhie ẹre mẹ.” Rẹn keghi gele mu eka ne ọ da fian nii, ọ na bu ẹre gha khian.

¹¹ Ugbẹn vbe ọ ghi rhie ẹre ne ẹẹn nii, ọ keghi gba ẹe ginna egbe, ọ tama rẹn wẹẹ, “Gie ima gba lovbiẹ.”

¹² Rẹn keghi wanniẹn wẹẹ, “Ẹn o, ghẹ ru mwẹ vberriọ! Ẹ i zẹdẹ maa hiehiere, ghẹ zẹ iba dan na.

¹³ Mẹ gha ye sẹtin guan vbe uwu ẹbu ẹdẹ ra? Kevbe uwẹ tobọ ruẹ, u ghi do fa egbe ua vbe Izrẹl. Lahọ, gu ọba guan, mẹ yayi wẹ, ọ gha ya mwẹ nuẹn.”

¹⁴ Sokpan, ọ ma zẹ ye ọre re, rhunmwuda ne irẹn na wegbe sẹ ọre nii, ọ keghi ya ẹtin vbe iwegbe gu ẹe ru emwi ọdọ vbe amwẹ.

¹⁵ Vbe iyeke ọnii, ohu ẹre keghi gha mu Amnọn sọsọsọ. Ohu ẹre ne ọ mu ẹẹn nian, keghi kpọlọ sẹẹ vbene ọ te ho ẹmwẹ ọnrẹn. Ọ keghi tama rẹn wẹẹ, “Ladian mwa!”

¹⁶ Rẹn keghi wanniẹn wẹẹ, “Ẹn o, u gha sua mwẹ uhunmwu ladian vbe nian, ọnii wa vbe khọrhiọn sẹ emwi ne u ka ru ban.” Sokpan, Amnọn ma zẹ ye ọre re,

¹⁷ ọ keghi tie ovbi odibo ẹre la owa, ọ tama rẹn wẹẹ, “Rhie okhuo na hin odaro mwẹ rre. Sua ẹre ladian ne u khui urho.”

¹⁸ Odibo nii keghi rrua ẹre ladian, ọ na khui urho. Ẹwu ne ọ sẹ otọ ne ọ gue obọ, ẹre Tama yọe, egbe ẹwu ne avbe uvbi ne ivbi ọba ni ma he yo owa ọdọ yọ vbe ẹghẹ nii.

¹⁹ Ọ keghi khakha emuẹn ye egbe ẹre uhunmwu, ọ yanghan ẹwu nii uan, ọ keghi viọ obọ gue aro, ọ na viẹ gha rrie.

²⁰ Absalọm ne ọtiọnrẹn keghi nọ rẹn wẹẹ, “Te Amnọn yagha a ra? Ọtẹn mwẹ ghẹ gie ọmwa rhọkpa họn. Ẹre ovbi erha wa gba khin yi. Ghẹ vbe khiẹkhiẹ egbe yọ gbe.” Ẹre Tama na gha rre owa Absalọm, rẹn ọkpa vbe ẹhi ẹre, vbene ẹko ma na ghi rhiẹnrhiẹn ọẹn.

²¹ E Devid ne ọba ghi họn emwi ne ọ sunu, ohu keghi kakabọ mu ẹẹn.

²² Absalọm ma vbe rhan unu ta ẹmwẹ ọkpa ma Amnọn. Ohu ẹre kegha mu Absalọm rhunmwuda, ọ ya ẹtin vbe iwegbe gu e Tama ne ovbiye ẹe ru emwi ọdọ vbe amwẹ.

Absalọm Rria Ikhi

²³ A ghi tie ẹre ukpo eha ghi nọ, Absalọm kegha gbe eto ohuan rẹn vbe Baal Hazọ vbe ọkpẹn Ifreim, ọ keghi tie ivbi ọba hia gha di evba.

²⁴ Ọ bu e Devid ne ọba, ọ tama rẹn wẹẹ, “Umogun, I gha gbe eto avbe ohuan mwẹ, wẹ kevbe avbe ekhaẹmwẹ ruẹn gha rrie emwiukpo ẹre ra?”

²⁵ Ọba keghi wanniẹn wẹẹ, “Ẹn o, ovbi mwẹ, ihẹ ọre gha khua sẹ ruẹ gbe a deghẹ ma hia rre.” Absalọm keghi tua unu mu ẹẹn sokpan, ọba ma kue, ọ na gbe ọkhian vba zẹkpẹe ne ẹẹn.

²⁶ Sokpan, Absalọm keghi kha wẹẹ, “A deghẹ erriọ nọ khekherriọ, u gha vbe gie Amnọn ne ọtẹn mwẹ gha khian ra.” Ọba keghi wanniẹn wẹẹ, “Vbọzẹ ne ọ gha na yo yi.”

²⁷ Sokpan, Absalọm na wa ye tua unu mu ẹẹn rhinrin ọba ke do kue ne Amnọn kevbe ivbi ọba nekpa lele Absalọm gha khian. Absalọm keghi le evbare vbene a le ne ọba.

²⁸ Ọ keghi tama avbe eguọmwadia ẹre wẹẹ, “Wa gha baba Amnọn, ọ gha ghi da gbe egbe nẹ, I gha tama uwa, wa ghi gbe ẹe rua. Wa ghẹ gie ohan mu uwa. Uhunmwu imẹ tobọ mwẹ ọ re ọ ye, wa din, wa ghẹ ru ẹe ghẹghẹghẹ!”

²⁹ Avbe eguọmwadia nii keghi gbe Amnọn zẹ vbene Absalọm tama iran. Ivbi e Devid nekpa keghi hin ẹmila iran, iran na lẹ gha rrie.

³⁰ Iran ghi he ye khian vbe odẹ, iyẹn keghi sẹ ehe ne Devid ye wẹẹ, “Absalọm gbele ivbi uẹ hia fẹẹrẹ, ọ ma vbe dekẹe ọkpa kẹkan vbọ.”

³¹ Ọba keghi kpaegbe, ọ sọ ukpọn rẹn uan, ọ na degbe otọ. Eguọmwadia ẹre ni vbe gu ẹe rre evba, keghi vbe sọ ukpọn iran uan.

³² Sokpan, e Jonadab ne ovbi e Siama ne ọtẹn Devid keghi kha wẹẹ, “Umogun, iran ma gbele ivbi uẹ hia a. Amnọn ọkpa ọ re ọ wu. Wẹ rẹnrẹn wẹ ke ne Amnọn ya mu e Tama ne ọtiọnrẹn yagha, ọ re Absalọm kegha mwẹ ọnrẹn vbe ekhọe wẹ rẹn gha ru emwi na.

³³ Rhunmwuda ọnii ghẹ yayi vbene u họẹn wẹ ivbi uẹ hia wulo, Amnọn ọkpa ọre iran gbe ua.”

³⁴ Ẹghẹ ne a kha na, Absalọm lẹ fua nẹ. Vbe ọwarọkpa nii avbe ivbiyokuo ni khọ odẹ keghi ya bẹghe emwa ni bun niwa tuorre ke odẹ Horonaim dee, iran bu ọba gha khian, iran na tama rẹn.

³⁵ E Jonadab keghi tama e Devid wẹẹ, “Ivbi uẹ ọ re ọ dee na zẹ vbene I tama ruẹn wẹ iran gha rre.”

³⁶ Ọ ghi wa ta ẹe fo ọwarọkpa, ivbi e Devid keghi viẹ la owa. E Devid kevbe ekhaẹmwẹ ọnrẹn kevbe viẹ eve orriara.

^37-38 Absalọm na lẹ bu ọba Gẹsiọ ighẹ Talmai ne ovbi e Amihud gha khian. E Devid keghi ya ẹghẹ ne ọ taẹn khiẹ Amnọn ne ovbi ẹre. Absalọm keghi gbe ukpo eha vbe Gẹsiọ.

³⁹ Ẹmwẹ Absalọm keghi kakabọ gha da ọba. Ẹmwẹ uwu Amnọn vbe kpao hin ẹre ekhọe rre nẹ.