II Samuẹl 12 - Edo Bible (E Baibol Ẹdo) Version 1996

Ẹmwẹ E Natan Kevbe Afiwerriẹ E Devid

¹ E Nọyaẹnmwa keghi gie Natan ne akhasẹ gie Devid. E Natan keghi bu ẹre gha khian, ọ tama rẹn wẹẹ, “Ikpia eva keghi gha rre ẹvbo ọkpa, ọkpa vbọ fe, sokpan, nọkpa kegha re ovbiogue.

² Enọfe ne ọ rrọọ kegha mwẹ ẹmila kevbe ohuan ni bun ẹsẹse.

³ Vbene ovbiogue ne ọ rrọọ na gha mwẹ oteghe ohuan ọkpa kẹkan ne ọ dẹe. Ọ kegha koko ẹe, uwowa ẹre ọ re ọ na wan rre deba avbe ivbi ẹre. Evbare ne irẹn re ọ re ọ na vbe ya koko ẹe, ọ ghi vbe gie ẹe gha wọn amẹ vbe uwu ukpu ẹre, ọ ghi vbe gha mu ẹẹn yan ekuawẹ ọre. Oteghe ohuan nii keghi ye vbe ọmọ okhuo ne ẹẹn.

⁴ Ọ ghi sẹ ẹdẹ ọkpa, orhunmwuyẹn keghi do tuẹ ọmwa nọ fe nii, ọmwa nọ fe na ma ho ne ọ gbe vbe emwirri ẹre ya le evbare ne orhunmwuyẹn nii, sokpan ọ keghi mu oteghe ohuan ovbiogue nii ya le evbare ne orhunmwuyẹn ọnrẹn.”

⁵ Ohu ọmwa nọ fe nii keghi kakabọ mu e Devid, ọ na kha wẹẹ, “I ya Osanobua ne ọ rrọọ vẹn ihẹn wẹ ọmwa ne ọ ru emwi na, te ọ kere ne ọ wu!

⁶ Ọ ghi vbe ha ẹre werriegbe igba enẹ ighẹ emwi ne ọ rhiere rhunmwuda emwi dan ne ọ ru na.”

⁷ E Natan keghi tama e Devid wẹẹ, “Wẹ ọ re nene ọmwa. Vbene e Nọyaẹnmwa Osanobua ọghe Izrẹl khare ọ re ọna khin: ‘Mẹ ọ re ọ maa ọba Izrẹl, I keghi miẹn ruẹn fan hin obọ e Sọl rre.

⁸ I rhie arriọba ẹre nuẹn kevbe avbe amwẹ ọnrẹn. I ya a ma ọba Izrẹl kevbe Juda. Akpawẹ ọ na ma vbe sẹ, I gha vbe viọ ukhukhu eva ba ruẹ re.

⁹ Vbọzẹ ne u na rra uhi mwẹ? Vbọzẹ ne u na ru emwi dan na. U wẹ ne iran gbe Uraia rua vbe okuo, u gie iran ne ivbi Amọn gbe ẹe rua. Iyeke ọnii, u keghi rhie amwẹ ọnrẹn.

¹⁰ Banbanna nian, te a gha miẹn ivbi uẹ eso ne ọ gha wu uwu ikpanikpan vbe orre hia, rhunmwuda, u rra uhi mwẹ, u keghi rhie amwẹ Uraia.

¹¹ I vbe yan ma ruẹn nian wẹ I gha ru ẹe ne ovbi uwowa ruẹ gha si ọlọghọmwa ye uẹ egbe. U gha ye aro miẹn uẹn vbe I gha viọ avbe amwẹ ọẹn ne okpia ọvbehe, ọ ghi gha gu iran ru emwi ọdọ vbe amwẹ vbe ogiavan ogioghogho.

¹² Ẹkhokho wẹ na rukhọ sokpan, ogiavan ogioghogho mẹ re ya gie ọna sunu, ne Izrẹl hia bẹghe ẹre.’ ”

¹³ E Devid keghi kha wẹẹ, “I ru orukhọ ghe Nọyaẹnmwa nẹ.” E Natan keghi wanniẹn wẹẹ, “E Nọyaẹnmwa ya bọọ, u i ghi ra wu.

¹⁴ Sokpan rhunmwuda otilua ne u mwẹ ghe Nọyaẹnmwa, ọmọ na gha wu.”

¹⁵ Ẹre Natan na gha rrie. E Nọyaẹnmwa keghi gie ọmọ ne Uraia biẹ ne Devid kakabọ gha khuọnmwi.

Ovbi E Devid Wu

¹⁶ E Devid keghi na erhunmwu ghe Nọyaẹnmwa wẹ ne egbe rran ọmọ nii. E Devid ma ghi rri evbare. Asọn hia, ọ ghi la ughugha ẹre, ọ ghi ya lovbiẹ ye otọ owa.

¹⁷ Avbe ekhaẹmwẹ ọnrẹn ghi bu ẹre ya gha tama rẹn wẹ ne ọ kpao vbe otọ, sokpan, ọ hee, ọ ma vbe rri emwi rhọkpa.

¹⁸ Ọ ghi rre uzọla ọkpa, ọmọ nii keghi wu, ohan ma gie ekhaẹmwẹ e Devid na iyẹn na ma rẹn. Iran wẹẹ, “Ẹghẹ ne ọmọ na rre agbọn, e Devid ma zẹ mwẹ wanniẹn mwa vbe ima gu ẹe guan. Vbe ima ghi ra tama rẹn hẹ wẹ ovbi ẹre wu? Ọ sẹtin ru egbe ẹre emwi nọ wegbe!”

¹⁹ E Devid ghi miẹn wẹ iran gha mu unu ye egbe ehọ guan, ọ keghi rẹn wẹ ọmọ nii wu nẹ. Rhunmwuda ọnii, ọ keghi nọ iran wẹẹ, “Te ọmọ nii ghi wu nẹ ra?” Iran wanniẹn wẹẹ, “Ọ wu nẹ.”

²⁰ E Devid keghi kpaegbe vbe otọ, ọ keghi ya khuẹ, ọ salọ eto, ọ na fi ukpọn werriẹ. Ọ kegha rrie uwu owa e Nọyaẹnmwa, ọ na ya ga ẹe. Ọ ghi dọlegbe sẹ ẹguae, ọ keghi nọ evbare, ọ na wa rri ọe ọwarọkpa vbe a mu ne ẹẹn nẹ.

²¹ Avbe ekhaẹmwẹ ọnrẹn keghi tama rẹn wẹẹ, “Ma ma rẹn otọ ọna. Ẹghẹ ne ọmọ nii na gha rre agbọn, u kegha viẹ, u ma rri evbare, sokpan, ọ ghi wu nẹ nian, u guakpaọ, u keghi rri evbare!”

²² E Devid keghi wanniẹn wẹẹ, “Erriọ nọ, ẹghẹ ne ọmọ nii na rre agbọn, I viẹe, I ma vbe rrie evbare. I te gha ro wẹ e Nọyaẹnmwa gha tohan mwẹ, ẹ i ra vbe gie ọmọ nii wu.

²³ Sokpan, ugbẹn vbe a ghi miẹn wẹ ọ wu nian, de emwi ne I gha he evbare ba? I gha sẹtin rhie ọmọ nii ke ẹrinmwi rre ra? Ẹdẹ ọkpa, mẹ gha bu ẹre gha rrie ehe ne irẹn ye, sokpan rẹn i ghi sẹtin dọlegbe bu imẹ gha de ọvbehe.”

A Biẹ E Solomọn

²⁴ E Devid keghi fu e Batsiẹba ne amwẹ ọnrẹn ẹko rre. Iran kevbe miẹn egbe, rẹn keghi biẹ ọmọ okpia ọkpa, e Devid na he ẹre Solomọn. E Nọyaẹnmwa keghi ho ẹmwẹ ọmọ nii.

²⁵ Ọ na wẹ ne Natan he ẹre Jedidaia rhunmwuda, e Nọyaẹnmwa ho ẹmwẹ ọnrẹn.

E Devid Khọn Mu E Raba

²⁶ Vbe uwu ẹghẹ ne a kha na, e Joab keghi ye gha khọn e Raba ne igiogbẹ Amọn khian, te ọ ghi ra khọn mu ẹẹn fo.

²⁷ Ọ keghi gie emwa ya tama e Devid wẹẹ, “I dekun e Raba nẹ, I vbe khọn mu ehe ne iran na sa amẹ wọn nẹ.

²⁸ Banbanna nian, si emwa ruẹn ni dekẹe koko ne u tobọ ruẹ ya khọn rẹn fo. I ma ho ne a gha tian mwẹ wẹ mẹ ọ re ọ khọn rẹn miotọ.”

²⁹ Ẹre Devid na gele si emwa rẹn koko, ọ na gha rrie Raba, ọ na dekun ẹnrẹn, ọ na khọn rẹn miotọ.

³⁰ Ẹbọ ne iran gho ne a tie ẹre Molẹk keghi mwẹ ẹde igoru ne ukhuamwẹ ọnrẹn re uwan isẹn irrọ vbe iyenẹ, ikpẹrọnmwọ ighobioye keghi vbe rre uwu ẹre. E Devid keghi mu ẹde nii hin ẹre uhunmwu rre, ọ na mu ye ọghe irẹn. Ọ keghi fu emwi ni bun vbe ẹvbo nii viọ gha rrie

³¹ ọ viọ emwa ni rrọ, ọ na viọ ọsara ye iran obọ ne iran ya gha winna, ẹguẹ ematọn, kevbe ughanmwa, ọ na ya iran gha mannọ ibiriki. Erriọ ọ re ọ wa vbe ru emwa ẹvbo ni rre Amọn hia. Iyeke ọnii, rẹn kevbe emwa rẹn kegha die Jerusalẹm.