II Samuẹl 11 - Edo Bible (E Baibol Ẹdo) Version 1996

E Devid Ke Batsiẹba

¹ Amẹ ghi da suẹn gha rhọ vbe ukpo ne ọ lele ẹe, vbe ẹghẹ ne avbe ọba ya yo okuo, e Devid keghi gie Joab kevbe emwa rẹn ni rre asẹ kevbe ivbiyokuo Izrẹl ladian, iran keghi hẹ rhu ivbi Amọn, iran na dunmwu ẹvbo ne a tie ẹre Raba muotọ. Sokpan, e Devid kegha rre Jerusalẹm.

² Ẹdẹ ọkpa, vbe ẹdẹ ghi ye egbe rrie odẹ ẹdogbota nẹ, e Devid keghi kpaegbe vbe ovbe avan ne ọ vbiẹre, ọ keghi hin egedege ẹguae. Ọ kegha hẹko khian lẹga vbe odukhunmwu nii, evba ọ re ọ na ya bẹghe okhuo ne ọ khuẹ. Okhuo na keghi wa mose ẹsẹse.

³ Rẹn keghi gie orhiọnkpa ne ọ ya gualọ otọ ọmwa ne ọ khin, ọ keghi miẹn wẹ Batsiẹba ne ovbi Eliam nọ, ọ keghi re amwẹ Uraia ne ovbi e Hiti.

⁴ E Devid keghi gie uhunmwu ya rhie ẹre rre, ọ keghi gu ẹe ru emwi ọdọ vbe amwẹ. (Te ọ da khuẹ vbe ehe ẹghẹ ne a kha na.) Ẹ re ọ na gha rrie owa.

⁵ Ọ ghi ghe, rẹn hanmwa, ọ na gie ne a tama e Devid.

⁶ Ẹre Devid na gie emwa bu e Joab gha khian wẹẹ, “Tie Uraia ne ovbi a Hiti gun mwẹ.” Ẹre e Joab na tie ẹre gie e Devid.

⁷ Uraia ghi rre, e Devid keghi nọ rẹn deghẹ ọ ye Joab kevbe ivbiyokuo ẹse, kevbe vbene igbinna ghi ye hẹẹ.

⁸ Ọ keghi tama Uraia wẹẹ, “Sua owẹ sẹ owa ne u ya hẹwẹ kherhe.” Uraia keghi kpao, e Devid na viọ emwi ihaoko gha rrie ọ re owa.

⁹ Sokpan, Uraia ma yo owa, ọ keghi gu iran ni khẹ onurho ẹguae vbiẹ evba.

¹⁰ E Devid ghi họn wẹẹ, Uraia ma ye owa, ọ keghi nọ rẹn wẹẹ, “Ke ne u ghi kpao vbe ẹghẹ ne ọ kpẹre gha dee, te u vbe khian rre na, vbọzẹ ne u ma na gha rrie owa yi?”

¹¹ Uraia keghi wanniẹn wẹẹ, “Ikpia hia ni rre Izrẹl kevbe Juda kpao vbe owa gha rrie okuo, Ẹkpẹti Ile vbe deba iran gha rre evba, e Joab ne ọkaokuo imẹ kevbe avbe emwa ni rre asẹ vbe ototọ ẹre hia rre oha. Vbe imẹ ghi ra gha rrie owa hẹ, ne I ya gha re, ne I ya gha da, kevbe ne I ya gha tie ọvbokhan mwẹ ovbe. A rrie agbọn, a rrie ẹrinmwi, I i danmwẹ emwi vberriọ.”

¹² Ẹre Devid ghi na kha wẹẹ, “Ọ maa, mudia vbe emwa na ẹrẹna, akhuẹ, I gha wẹ ne u werriegbe gha khian.” Ẹre Uraia ghi na mudia vbe Jerusalẹm ẹdẹ ne ẹdọ kevbe ẹdẹ ne ọ lele ẹe.

¹³ E Devid keghi tie ẹre ne ọ do gu ẹe rri evbare ota, ọ na ya ayọn ne ẹẹn da. Sokpan Uraia ma yo owa vbe asọn nii, ọ ya ukpọn hin egbe, ọ na vbiẹ ọgua abodẹ ọghe ẹguae.

¹⁴ Ẹdẹ ghi gbe, e Devid keghi gbẹn ebe gie Joab, ọ na rhie ne Uraia rhie gie ẹe.

¹⁵ Ọ na gbẹn wẹẹ: “Rhie Uraia ye odaro igbinna vbe ehe ne ọ na yọn sẹẹ, wa ghi he ẹe yọ ne u wa gie obọ vba ẹre.”

¹⁶ Ẹre a na miẹn wẹẹ, ẹghẹ ne Joab na wa suẹn gha khọn la adesẹ ore ẹvbo ni, ọ na wẹ ne Uraia gha rrio ehe ne ọ rẹnrẹn wẹ avbe eghian na wegbe ẹsẹse.

¹⁷ Ivbiyokuo avbe eghian keghi ladian hin adesẹ ore ẹvbo rre, iran keghi gu ivbiyokuo e Joab gbinna, iran keghi gbele eso vbe uwu emwa ni rre asẹ vbe ototọ Joab; iran kevbe gbe Uraia.

¹⁸ Ẹre Joab na gie ya na iyẹn ma e Devid vbene ẹmwẹ okuo ye hẹ.

¹⁹ Ọ keghi tama ọmwa ne ọ gie ẹre uhunmwu wẹẹ, “U ghẹ ghi na iyẹn vbene okuo de hẹ ma ọba nẹ.

²⁰ Ohu sẹtin mu ẹẹn, ọ ghi nọ ruẹn wẹẹ, ‘Vbọzẹ ne uwa na sikẹ adesẹ ẹvbo sẹrriọ yi ya gu iran gbinna? Wa ma rẹn ighẹ iran gha filo ifẹnmwẹ ke uhunmwu ekẹn rre?

²¹ Wa ma ghi yerre vbene iran ya gbe Abimẹlẹk ne ovbi e Gidiọn hẹ. Ẹvbo ne a tie ẹre e Tebẹz ẹre okhuo na mu olọ ke uhunmwu ekẹn gbẹe, ọ na gbe ẹe rua. Vbe uwa ghi na ya sikẹ ekẹn sẹrriọ hẹ? Ọba gha nọ ruẹn vberriọ, u ghi tama rẹn wẹẹ ọmwa ne ọ rre asẹ vbe ototọ ruẹ ighẹ Uraia, iran vbe gbe ẹe rua.’ ”

²² Ẹre ọmwa ne a gie ẹre uhunmwu nii na bu e Devid gha khian, ọ keghi ya na iyẹn ma rẹn zẹ vbene Joab gie.

²³ Ọ keghi kha wẹẹ, “Avbe eghian wegbe sẹẹ ima, iran keghi ladian adesẹ ore ẹvbo rre do gu ima gbinna vbe otọ kẹkan, sokpan ma keghi khulo iran werriegbe gha rrie onurho ẹvbo.

²⁴ Ẹre iran na ke uhunmwu ekẹn gha filo ifẹnmwẹ gie ima, iran keghi gbele eso vbe avbe ọkaokuo ruẹ Umogun, ọkaokuo ruẹ ighẹ Uraia, iran vbe gbe ẹe rua.”

²⁵ E Devid keghi tama ọmwa ne a gie rre nii wẹẹ, “Rhie igiẹdu ne Joab wẹ ne ọ ghẹ gie ẹtin fu ẹe rhunmwuda, a i rẹn ne ọ wu vbe okuo. Tama rẹn ne ọ kakabọ dekun ẹvbo nii ne ọ khọn rẹn.”

²⁶ E Batsiẹba ghi họn ighẹ iran gbe ọdọ ẹre ua, ọ keghi khiẹ ọre.

²⁷ Ẹghẹ akhiẹ ghi gberra nẹ, e Devid keghi ya rhie ẹre gha die ẹguae. Okhuo nii na khian amwẹ ọnrẹn, ọ keghi biẹ ọmọ okpia ọkpa ne ẹẹn, sokpan ẹko e Nọyaẹnmwa ma rhiẹnrhiẹn ye emwi ne Devid ru na.