II Samuẹl 10 - Edo Bible (E Baibol Ẹdo) Version 1996

Obọ E Devid Gba Ivbi Amọn Kevbe Siria

¹ Ọ ghi kpẹe kherhe, e Nahas ne ọba Amọn keghi wu, e Hanun ne ovbi ẹre keghi rriọba.

² E Devid keghi kha wẹẹ, “I gha gu e Hanun ku, I ghi vbe gha tohan rẹn zẹ vbene erhae ighẹ Nahas ru ghe mwẹ.” E Devid keghi rhunmwuda ọnii gie uhunmwu ọ da mwẹ gie ẹe. Sokpan, iran ghi sẹ evba.

³ Avbe ọkaolotu ivbi Amọn keghi tama ọba iran wẹẹ, “Te uwẹ ro ighẹ te Devid gie emwa na uhunmwu ọdamwẹ guẹ ne ọ gele ya rhie ọghọ ne erhaa? Hiehiere, te ọ gie iran rre zẹ vbe ọrhẹ, ne iran do ba otọe na ghe, ne iran miẹn ehe na sẹtin khọn ima muotọ.”

⁴ E Hanun keghi munọ eguọmwadia e Devid, ọ na zẹlẹ iran obọ ọkpọkpa kua vbe ẹtu iran, ọ keghi giagia iran ukpọn ke ẹkun gha die otọ, ọ na wẹ ne iran gha rrie.

⁵ E Devid ghi họn ẹmwẹ na, ọ keghi gie ẹvbo ya vba iran, rhunmwuda, ekhue ma gie iran bu ẹre gha dee. Ọ keghi gie ne a khama iran ne iran ya kọ vbe Jẹriko ẹtu iran te sọn sẹ ihe, iran keghi werriegbe gha dee.

⁶ Ivbi Amọn wa rẹn wẹ te iran ho e Devid ẹmwẹ, iran na ya viọ ivbiyokuo arriaisẹn ugie (20,000) vbe Siria kevbe Betrehob kevbe Zọba, arriaisẹn iweva (12,000) vbe Tob deba ọba Maaka ke ẹe kevbe ivbiyokuo arriaisẹn (1,000).

⁷ E Devid ghi họn, ọ keghi gie Joab kevbe ivbiyokuo hia bu iran.

⁸ Ivbi Amọn keghi ladian, iran na ya ghae ye onurho Raba ne igiogbe ẹvbo nii, vbene iran ni dekẹe, avbe ivbi e Siria kevbe Tob kevbe Maaka na ya ghae ye ehe ni vbẹ aro lẹga ẹvbo nii.

⁹ E Joab ghi miẹn wẹ avbe eghian gha la odaro kevbe iyeke rre do gu iran gbinna, ọ keghi hannọ e ni maa sẹẹ vbe avbe ivbiyokuo Izrẹl, ọ na gha iran ye ehe ne iran gha na mu aro da ivbi e Siria.

¹⁰ Ọ keghi viọ ivbiyokuo nekpa ne ọtiọnrẹn ighẹ Abisiai, rẹn na gha iran ye ehe ne iran na mu aro da ivbi Amọn.

¹¹ E Joab keghi tama rẹn wẹẹ, “U gha miẹn ighẹ obọ ivbi e Siria ra ke odukhunmwu mẹ, u ghi gha dee do yọmwẹ obọ. A deghẹ obọ ivbi Amọn ra ke odukhunmwu ne ọwuẹ, I gha do yọ uẹ obọ.

¹² U ghi din! Gia gbinna ẹsẹse ne emwa ima, kevbe ne ẹvbo Osanobua mwa. E Nọyaẹnmwa ne ọ ru enọ ye ọre sẹẹ.”

¹³ E Joab kevbe emwa rẹn ghi guọ sikẹ odaro ne iran fi emwi, ivbi e Siria keghi lẹ.

¹⁴ Ivbi Amọn ghi miẹn wẹ ivbi e Siria lẹre, iran keghi vbe lẹ hin ehe ne Abisiai ye rre, iran na la adesẹ ore ẹvbo. Ẹre Joab ghi na werriegbe ke okuo ne ọ te gu ivbi Amọn khọn, ọ na gha die Jerusalẹm.

¹⁵ Ivbi e Siria ghi miẹn wẹ obọ ivbi Izrẹl ke odukhunmwu ne iran, iran keghi si ivbiyokuo iran koko.

¹⁶ E Hadadezẹ ne ọba keghi gie ne a ya tie ivbi e Siria ni rre iyeke Ẹzẹ Yufretes nọkpa rre. E Siobak ne ọkaokuo e Hadadezẹ keghi viọ iran gha die Helam.

¹⁷ E Devid ghi họn, ọ keghi si ivbiyokuo Izrẹl koko, ọ na fian Ẹzẹ Jọdan rra, ọ na gha rrie Helam ne ivbi e Siria na ghae mu aro do ẹre. Ẹre igbinna na saa.

¹⁸ Ivbi e Siria keghi lẹ hin odaro ivbi Izrẹl rre. E Devid kevbe emwa rẹn keghi gbele arhin iyihi-nrọn (700) vbe ivbi Siria ni gua ikẹkẹ okuo, iran ni hin ẹsin arriaisẹn iyeva (40,000) iran kevbe kuan Siobak ne ọkaokuo avbe eghian, ọ keghi ye vbe wu ye ehe ne iran na gbinna.

¹⁹ Avbe ọba ni rre ototọ Hadadezẹ ghi miẹn wẹ obọ ivbi Izrẹl ke okhunmwu ne ẹẹn, iran keghi do rinmwian, iran na gha ga gie iran. Ohan ma ghi gie ivbi e Siria dọlegbe ru iyobọ ne ivbi Amọn ọvbehe.