II Samuẹl 1 - Edo Bible (E Baibol Ẹdo) Version 1996

E Devid Họẹn Wẹ E Sọl Wu

¹ E Sọl ghi wu nẹ, e Devid keghi ke ehe ne ọ na khọnmiotọ vbe uhunmwu ivbi Amalẹk gha dee, ọ keghi do gbe ikpẹdẹ eva vbe Ziklag.

² Vbe ikpẹdẹ ne ọ lele ẹe, igbama ọkpa keghi ke agọ e Sọl rre. Ọ keghi sọ ukpọn ye ẹkun ẹnrẹn, ọ na zẹ iku yan uhunmwu zẹ vbe ama ọghe akhiẹ. Ọ keghi bu e Devid gha khian, ọ keghi vbe rre ye uhunmwu kan otọ ne ẹẹn zẹ vbe otuẹ ọghọ.

³ E Devid keghi nọ rẹn wẹẹ, “Vbe u a ke dee?” Rẹn keghi wanniẹn wẹẹ, “Agọ ivbi Izrẹl ọ re I ke lẹ dee.”

⁴ E Devid keghi tama rẹn wẹẹ, “Tama mwẹ emwi ne ọ sunu.” Rẹn keghi wanniẹn wẹẹ, “Ọmwa ne ọ lẹ fua vbe okuo imẹ khin. Iran vbe gbele ni bun vbe emwa ima. Iran vbe gbele Sọl kevbe Jonatan ne ovbi ẹre.”

⁵ E Devid keghi nọ rẹn wẹẹ, “Vbe u a ya rẹn he yi ighẹ e Sọl kevbe Jonatan wulo?”

⁶ Rẹn keghi wanniẹn wẹẹ, “Te I wa gheghe sẹ uhunmwu oke Gilboa. I keghi do miẹn e Sọl vbe ọ ya egbe gọ yan asoro ẹre, ikẹkẹ okuo kevbe iran ni hin ẹsin avbe eghian ghi ra wa vba ẹre fo.

⁷ Ọ ghi gbe aro ghe iyeke, ọ keghi bẹghe mwẹ, ọ na da tie mwẹ. Mẹ kevbe wanniẹn wẹẹ, ‘Dọmọ ọ.’

⁸ Rẹn keghi nọ mwẹ ọmwa ne I khin, I keghi tama rẹn wẹ ovbi Amalẹk ọre I khin.

⁹ Rẹn keghi tama mwẹ wẹẹ, ‘Obọ wa vba mwẹ ẹsẹse, te I ghi ra wu na. Larre ne u do gbe mwẹ uan.’

¹⁰ Mẹ keghi gele bu ẹre gha khian, I na gbe ẹe rua, rhunmwuda, mẹ rẹnrẹn wẹ, ọ gha de gbe otọ, te ọ ra wu ọwarọkpa nii. I keghi mu ẹde hin ẹre uhunmwu rre kevbe ẹguẹn obọ vbe obọ ẹre I keghi viọ ehia guẹ enọwanrẹn.”

¹¹ E Devid keghi ye akhiẹ sọ ukpọn rẹn uan, emwa rẹn hia keghi vbe sọ ọghe iran an.

¹² Iran keghi viẹ, iran na vbe khiẹ, iran ma rri evbare rhinrin ya sẹ ota rhunmwuda e Sọl kevbe Jonatan kevbe ivbi Izrẹl, emwa Nọyaẹnmwa rhunmwuda, iran gbele ni bun vbe uwu iran an vbe okuo.

¹³ E Devid keghi nọ igbama ne ọ do na iyẹn ma rẹn nii wẹẹ, “De ovbi ẹvbo ne uwẹ khin yi?” Rẹn kevbe wanniẹn wẹẹ, “Ovbi Amalẹk ọre I khin, sokpan, ẹvbo ruẹ ọ re I yinrin.”

¹⁴ E Devid keghi nọ rẹn wẹẹ, “Vbọ si ẹe ne ohan na gie uwẹ gbe ọba ne Nọyaẹnmwa tobọ ẹre zẹ?”

¹⁵ Ẹre Devid ghi na tie ọkpa vbe uwu avbe emwa rẹn, ọ keghi tama rẹn wẹẹ, “Gbe ẹe rua!” Okpia nii keghi fi ovbi Amalẹk nii emwi, ọ na gbẹe rua.

¹⁶ E Devid keghi tama ovbi Amalẹk nii wẹẹ, “Obọ ruẹ ọ re u ya si emwi ne ọ rruan ruẹn, ẹghẹ ne u na ya unu ruẹn miẹnkue ighẹ u gbe ọba ne Nọyaẹnmwa tobọ ẹre zẹ ne ọ gha re ọba rua, ọ re u na bu ohiẹn uwu gbe egbe uẹ.”

E Devid Viẹ E Sọl Kevbe Jonatan

¹⁷ E Devid keghi so ihuan na ya viẹ e Sọl kevbe Jonatan ne ovbi ẹre.

¹⁸ Ọ na vbe wẹ ne a ma ivbi e Juda re. (Ebe Jasia ọ re a gbẹn ọẹn yi).

¹⁹ “Avbe ọkaolotu mwa wulo vbe Oke Izrẹl. Iran ni din sẹ vbe ivbiyokuo mwa dele!

²⁰ Wa ghẹ ta ẹe sẹ Gat, ra idunmwu Askẹlọn. Wa ghẹ gie ikhuo e Filistia ya gha ghọghọ, wa ghẹ gie emọ ikhuo enimayayi ya gha gbe wee.

²¹ “Amẹ i ghẹ dọlegbe rhọ, ra ne evbu tuo vbe oke Gilboa, te otọ ẹre hia gha de ihoi rua. Rhunmwuda, evba asa iran ni din ne a fara ye. Ọtọn ma rhu asa ọghe Sọl.

²² Ugbemwi ọ re uhanbọ e Jonatan te khin. Umozo e Sọl i te mwẹ erọkhọrọkhọ, ọ solo iran ni wegbe gọọ, ọ gbele iran ne eghian kua.

²³ “E Sọl kevbe Jonatan, ọsughe kevbe eghẹnghẹn ọ re iran te khin, kevbe ẹfe kevbe uwu, te iran sikan mu egbe, okhian kẹ iran sẹ oghohọn, iran wegbe sẹ oduma.

²⁴ Ikhuo ni rre Izrẹl, wa khiẹ e Sọl. Rẹn ọ re ọ rhuan uwa ukpọn ododo esiesi, ọ keghi ya ikpẹrọnmwọ kevbe igoru mu uwa egbe.

²⁵ A vbe iyokuo ni zẹ udu gbee dele nẹ, a gbele iran vbe okuo, e Jonatan lovbiẹ, orinmwi ghi nọ vbe uhunmwu oke.

²⁶ “I kakabọ khiẹ ruẹ, e Jonatan ne ọtẹn mwẹ, u miẹn vbe ẹmwẹ ruẹn te ye mwẹ hẹẹ! Ọyunnuan ọ re aho ẹmwẹ ọmwa ne u mwẹ ghe mwẹ te khin, ọ te sẹ aho ẹmwẹ ọmwa okhuo.

²⁷ Avbe iyokuo ni zẹ udu gbe dele nẹ, emwi igbinna iran la ọrhiae rrie.”