II Pita 2 - Edo Bible (E Baibol Ẹdo) Version 1996

Avbe Emamwaemwi Ohoghe

¹ Vbe ẹghẹ ne ọ gberra, a miẹn avbe emamwaemwi ohoghe ni bun vbe uwu ẹbu iran, erriọ wa vbe nọ, a gha vbe miẹn avbe emamwaemwi ohoghe vbe uwu uwa. Iran gha ma emwa iruẹmwi omurhia kevbe ohoghe, iran ghi vbe siẹn Arowa iran ne ọ miẹn iran fan, iran ghi la ekpa ọnii si ọfuan udomwurri mu rhu egbe iran uhunmwu.

² Ọ rhe ye vberriọ ni bun gha ye gha yin uyinmwẹ alama iran khian, a ghi do miẹn wẹ, rhunmwuda emwi ne iran ru, emwa ghi do gha ye ukpẹ sakan Odẹ ẹmwata nii.

³ Vbe uwu uzuanmwẹ iran, avbe emamwaemwi ohoghe na ghi gha ya okha ne iran tobọ iran ya rre, miẹn uwa emwi. Ọ kpẹre ne Ne ọ bu ohiẹn iran ghi mu egbe ye otọ. Ne ọ ra fuẹn iran uan i vbe vbiẹ hiehiere.

⁴ Rhunmwuda Osanobua ma ya bọ avbe odibo ni ru orukhọ, sokpan te ọ filo iran ku uwu ẹrinmwi erhẹn, ehe ne a na khui iran ye uwu ebiebi hin re khẹ Ẹdẹ Ibuohiẹn.

⁵ Osanobua ma yabọ agbọn nẹdẹ, sokpan, te ọ hihiẹ Okpamẹ ne ọ lẹ rhu agbọn emwa dan, emwa ni miẹn uhunmwu vbọ ma gberra Noa ne ọ gha kpe orhu ẹmwata, deba arhin ihinrọn ọvbehe.

⁶ Osanobua bu ohiẹn gbe avbe ẹvbo Sọdom kevbe Gomorra, ọ keghi ye erhẹn fuẹn iran uan, ọ keghi ya iran khian igiemwi ne emwa dan, vbe ekpa emwi ne ọ gha sunu vbe egbe iran.

⁷ Ọ keghi miẹn Lọt ne ọmwata fan, ọmwa ne iran ya uyinmwẹ alama iran gha kpokpo ighẹ emwa ne ẹ i lele uhi rhọkpa ruemwi.

⁸ Rhunmwuda, ọmwa esi na ne ọ gha rre uwu ẹbu iran, ẹdẹgbegbe ọ re ọ ya họn, ne ọ na vbe gha miẹn, avbe emwi nii, ni mu ẹre orhiọn rueghe vbe avbe emwi dan ne iran ru.

⁹ Erriọ vbe nọ, Nọyaẹnmwa rẹn vbene ọ ya yuo emwa esi hin uwu edanmwẹ iran re hẹẹ, kevbe vbene ọ ya da emwa dan ne a gha rri ọre oya yi khẹ Ẹdẹ Ibuohiẹn hẹ.

¹⁰ Ibiba avbe emwa ni lele orriarria emwi ohọhọ egbe iran, iran na vbe yagha ẹtin Osanobua. Avbe emamwaemwi ohoghe na keghi re emwa itengbemu, ni vbe ze vbe udu. Iran i ya ọghọ ne emwi ni rrọ ni mwẹ uyi, ni rre odukhunmwu, sokpan, iran ghi gha ya ukpẹ sakan iran.

¹¹ Vbene iran ghi vbe sẹ ighẹ avbe odibosa ne a miẹn wẹ iran kpọlọ, iran keghi vbe wegbe sẹ avbe emamwaemwi ohoghe na, iran i ya ukpẹ sakan iran vbe iran a khian ba iran ifi ẹzọ vbe odaro Nọyaẹnmwa.

¹² Egbe ne ọ ma ọmwa emwi, ọre iran na lele ru emwi zẹ vbene iran wa ye ighẹ avbe aranmwẹ oha ne a biẹlẹ ne a miẹn gha mu gbele re. Iran ghi gha ya ukpẹ sakan emwi ne iran ma rẹn otọ ẹre. Te a ra fuẹn iran hia, zẹ vbe aranmwẹ oha.

¹³ A gha vbe ye oya ne a re ha iran osa ye oya ne iran si ye emwa ọvbehe egbe. Emwi ne Ọ ya ẹko iran rhiẹnrhiẹn ọrọre ne iran gha ru avbe emwi nii, ni gha vuọn iran ẹko oregbe nii, vbe ogiavan, emwi ekhue kevbe ne ọ mu ọmwa eni rhia, ọre iran khin vbe iran a deba uwa gha rri evbare, sevba, iran ghi ye gha gbọgọlọbọ vbe odẹ erẹrẹ iran.

¹⁴ Iran i ho ne iran bẹghe emwi ọvbehe gberra ikhuo ni ku ogboi, ẹko i sẹtin vuọn ohanmwẹ orukhọ iran ẹdẹ. Iran ghi gha sua ọmwa ne ọ ma wo vbe egbe fi ifi. Te a wa ma ekhọe iran ẹre ne iran gha zuan. Te Osanobua fi iran unu.

¹⁵ Iran kpao hin odẹ ne ọ diae rre nẹ, iran keghi bibi odẹ. Iran la odẹ ne Balam ne ovbi Bọsọ lae, ọmwa ne igho ne ọ gha sẹ ọre obọ vbe ọ gha ruemwi dan nẹ, viẹn ye ọre aro.

¹⁶ A keghi guẹe gui ye abakuru ẹre. Rhunmwuda ekẹtẹkẹtẹ ne odin keghi rhan unu guan, zẹ vbe ọmwa ne agbọn, ọ na da akhasẹ ni obọ uyinmwẹ ọmwẹmwẹ ne ọ te ra yin yi.

¹⁷ Iran na yevbe ẹzẹ ne ọ kae, iran ye vbe ubimwẹ amẹ ne ẹhoho hoho khian. Osanobua rhie otọ khẹ iran nẹ vbe uwu ebiebi ne ọ dinmwi sẹẹ ehia.

¹⁸ Iran ghi gha ya unu ta ẹmwẹ itengbemu akpa, iran ghi gha ya emwi orriarria egbe alama, khuẹn ifi munọ avbe emwa ni he da lẹfe hin uwu ẹbu emwa ni rre uwu abakuru rre.

¹⁹ Iran ghi gha tama iran wẹ iran gha khian enọyan egbe iran, vberriọ iran tobọ iran, eviẹn emwi ne egbe guẹe ne ọ fuẹn emwa uan, ọre iran khin, rhunmwuda, ọviẹn emwi ni ne obọ ẹre ghi gba ọmwa nẹ, ọre ọmwa khin.

²⁰ Rhunmwuda, deghẹ ọmwa sẹtin lẹ fe nẹ vbe obọ avbe ẹtin ne ọ sẹtin gbe ọmwa ruan, vbe agbọn na, vbe ekpa ne ọ na rẹn Nọyaẹnmwa kevbe Ọmiọnmwafan mwa Jesu Kristi, a na miẹn wẹ obọ iran vbe dọlegbe vba ẹre, obọ iran na vbe gba ẹre egbe ihe ne ọmwa nii ghi ye keghi re ne ọ rhia sẹẹ ne ọ te ka gha ye vbe omuhẹn.

²¹ Ọ te wa ma ne iran, ne iran ghẹ i zẹdẹ rẹn odẹ ẹmwata, sẹẹ ne a miẹn wẹ ugbẹn vbe iran ghi vbe rẹn ọnrẹn nẹ, ne iran fi iyeke gbe avbe iyi ne ọ huanrẹn ne a yi ma iran.

²² Emwi ne ọ sunu vbe egbe iran, keghi rhie maa wẹ ẹmwata ọ re itan ni khin ne ọ kha re wẹ, “Ekita dọlegbe gha rri ekpa ne ọ kpae,” kevbe wẹ, “Esiebo dọlegbe ya ye egbe fuẹn ọrho vbe a khuẹ ọre nẹ.”