II Krọnikol 9 - Edo Bible (E Baibol Ẹdo) Version 1996

Otuẹ Ne Ọba Nokhuo E Siẹba Mu Rre

¹ Otiti e Solomọn keghi do gha sẹ ehe ne Ọba Nokhuo e Siẹba ye, rẹn kegha rrie Jerusalẹm ne ọ ya mu ibo ne ẹẹn san. Ọ keghi viọ eguọmwadia ni bun ba egbe gha dee, ke ẹe kevbe ekẹtẹkẹtẹ ni bun ne a ya kun emwi ni winhin, ikpẹrọnmwọ kevbe igoru ọrhẹnrhẹn. Rẹn vbe Solomọn ghi miẹn egbe, ọ kevbe nọ rẹn ọta hia ni ghi rre ọre ekhọe.

² Rẹn keghi wa rhie ewanniẹn ye ehia. Emwi rhọkpa ne ọ lọghọ gbe ne a rhie ewanniẹn yi ma vbe zẹdẹ gha rrọ ne ẹẹn.

³ Ọba Nokhuo e Siẹba keghi ya ehọ họn ẹwaẹn Solomọn, ọ keghi vbe miẹn ẹguae ne ọ bọe.

⁴ Ọ keghi miẹn evbare ne a viọ ye ọ re uhunmwu e eteburu, owa ne avbe ewọe iwinna rẹn ye, vbene a mwamwa emwa ni winna nẹẹn vbe uwu ẹguae hẹ, kevbe ẹwu ne iran yọ, ẹwu ne avbe emwa ni ghae evbare vbe eghọ emwiukpo yọ, kevbe ese ne ọ zọ vbe uwu Ọgua Osa, ọ yan rẹn unu uan, egbe keghi wọ ẹre ye otọ.

⁵ Ọ keghi tama ọba wẹẹ, “Emwata wa nọ vbene I họn ẹmwẹ ruẹn vbe ẹvbo mwẹ, vbe ekpa ruẹ kevbe ẹwaẹn ruẹn, ẹmwata nọ.

⁶ I ma te ya ẹmwẹ ne a tama mwẹ yi rhinrin i te do ye aro mwẹ miẹn ọẹn. I ma he te họn obọkpa fo vbe a gha wa ẹwaẹn ruẹn ye ihẹ eva. U wan sẹ vbene emwa tae vbe ekpa ruẹ.

⁷ Ọ ma kin iran ne eguọmwadia ruẹ, emwa ni wa rre ehe ne u ye vbe ẹghẹ hia, a na vbe gie uhunmwu iran ma sẹ vberriọ ne iran gha họn ẹmwẹ ẹwaẹn ruẹn, vbe ẹghẹ hia.

⁸ Rhie urhomwẹ ne Nọyaẹnmwa ne Osanobua ruẹ. Ọ rhie maa nẹ vbe ne irẹn ho ẹmwẹ ruẹn sẹ hẹ, vbene ọ na ya uwẹ rriọba ne u gha khaemwisẹ vbe eni irẹn. Rhunmwuda ighẹ ọ ho ẹmwẹ Izrẹl ne emwa rẹn, ọ vbe ho ne ọ gie iran gha rrọ rhinrin ẹdẹ, ọ keghi ya a rriọba, ne u sẹtin gha da uhi kevbe ibuohiẹn ẹmwata yi.”

⁹ Okhuo nii keghi viọ emwi izẹọhẹ ne ọ hẹ rre ne Solomọn. Ọ te ra wa sẹ etọni igoru isẹn deba emwi ni winhin kevbe ikpẹrọnmwọ ọrhẹnrhẹn. A ma he miẹn emwi ni winhin ni mose vbe egbe ne ọba nokhuo e Siẹba viọ ne Solomọn.

¹⁰ (Emwa e Hiram ne Ọba kevbe emwa e Solomọn ne ọba, ni kun igoru ke Ọfa rre keghi viọ erhan umẹ kevbe ikpẹrọnmwọ rre.

¹¹ E Solomọn keghi ya erhan nii ru ikpa owẹ ye Ọgua Osa ẹguae ẹre. Ọ keghi vbe ya ẹe ru akpata kevbe ukusẹ ne avbe ikpemaba. A ma hẹ ka miẹn egbe emwi vberriọ yi vbe otọ e Juda.)

¹² E Solomọn ne ọba keghi viọ emwi hia ne ọba nokhuo e Siẹba nọ rẹn ne ẹẹn, ya deba emwi ne ọ ya ru ẹse werriegbe ne ẹẹn vbe okhuo nii ha okọ gie ẹe nẹ. Ẹre okhuo nii kevbe iran ni lelẹe khian na werriegbe gha rrie otọ e Siẹba.

Ẹfe Solomọn Ne Ọba

¹³ Ukpukpo, igoru ne ọ sẹ Solomọn obọ gberra omwa etọni isẹn yan ugie,

¹⁴ deba igho uhunmwu ne avbe obaghẹn kevbe ekpatẹ hae. Avbe ọba Arebia kevbe avbe enikhaemwisẹ vbe Izrẹl keghi vbe gha viọ esiliva kevbe igoru gie ẹe.

¹⁵ E Solomọn keghi ru asa nekhua uri (200) ne a ya omwa uwan ekesugie ọghe igoru ne a dunmwu rhu,

¹⁶ deba asa negiẹrẹ iyisẹn yan uri (300) ne a ya omwa uwan igoru erẹnrẹn ne a dunmwu rhu. Ọ keghi wẹ ne a viọ ehia ye Ugha Ẹgbo e Lebanọn.

¹⁷ Ọba na wẹ ne iran vbe ru ẹkete nọkhua ọkpa. A keghi ye akọn eni gue ihẹ eso vbọ, a keghi ya igoru ne a ma gua rhu obọ ni dekẹe.

¹⁸ Ikpa owẹ ehan ọ re ọ rre nene ẹkete. A keghi vbe mu ukhuerhe ne a viọ owẹ yan ke ẹe, igoru ọ re a ya rhu ẹe. Ehe ne a viọ obọ yan kegha rre nene ẹkete obọ eveva. Ama oduma keghi vbe gha rre obọ eveva.

¹⁹ Ama oduma iweva ọre ọ gha rre ikpa owẹ nii, ọkpa vbe obọ ọkpọkpa zẹẹ. A ma he miẹn egbe ẹkete vberriọ vbe arriọba rhọkpa vbe ehe ne ọ rhirhi gha khin.

²⁰ Igoru ọre a ya ru ukpu e Solomọn hia, avbe emwi ulemwi ra ọkpan hia ni rre Ugha Ẹgbo e Lebanọn, igoru ne ma gua ọ re a ya ru ehia. Vbe ẹghẹ e Solomọn, a i vbe ka esiliva ye emwi rhọkpa.

²¹ Ọ kegha mwẹ ọgbagba okọ ni yo okun, ne iran vbe ọgbagba okọ ọghe Hiram gba yo okun. Ukpo eha ọre okọ ẹre ya werriegbe rri owa iran ghi vuọn ne igoru, esiliva, akọn eni, ọsa kevbe emẹ ne iran viọ gha dee.

²² E Solomọn ne ọba keghi fe, ọ keghi vbe wan sẹ avbe ọba hia ni rre uhunmwu otọ agbọn.

²³ Te iran hia mu iro bu ẹre rre, ne iran do gha họn ẹwaẹn ne Osanobua ya wee ẹe.

²⁴ Dọmwadẹ ọghọe vbe uwu iran ghi vbe gha ya emwi ha okọ gie Solomọn, avbe emwi esiliva kevbe igoru, ẹwu, emwi igbinna, emwi ni winhin ẹsin kevbe ẹmila. Erriọ ọ re a wa gha ru ẹe ukpukpo.

²⁵ E Solomọn ne ọba keghi vbe gha mwẹ owa ne a viọ ẹsin yi arriaisẹn enẹ (4,000), ne ọ viọ avbe ikẹkẹ okuọ kevbe ẹsin yi, ọ kevbe gha mwẹ ẹsin igbinna arriaisẹn iweva (12,000). Ọ keghi viọ eso vbọ ye Jerusalẹm, ọ na viọ eni dekẹe lele avbe ẹvbo ọvbehe.

²⁶ Rẹn ọ re ọ gha re ọba nọkhua yan avbe ọba ni rre otọe nii hia, ke Ẹzẹ Yufretes kpao kevbe Filistia kevbe ehe ne otọe Igipt lae.

²⁷ Vbe ẹghẹ ọ re, esiliva keghi kpọkua vbe Jerusalẹm zẹ vbene okuta ye, sida keghi gba ehe hia vbene sikamọ ye vbe ototọ oke Juda.

²⁸ E Solomọn kegha viọ ẹsin ke Musri kevbe avbe ẹvbo ọvbehe rre.

A Ta Vbene Solomọn Rriọba Hẹ Ifiẹmwe Okpa

²⁹ Ni ghi dekẹe vbe okha e Solomọn ke omuhẹn ya sẹ ufomwẹ, a tae ye ebe okha e Natan ne Akhasẹ, ye ẹmwẹ akhasẹ ọghe Ahija ne ọ rre Silo kevbe umian ne Iddo ne Akhasẹ miẹn, ne ọ vbe guan yan ẹghẹ arriọba e Jeroboam ne ọba Izrẹl.

³⁰ Ukpo iyeva ọ re Solomọn ya rriọba yan Izrẹl hia vbe Jerusalẹm.

³¹ Ọ keghi wu a na re ẹre ye Ẹvbo e Devid, e Rehoboam ne ovbi ẹre keghi rriọba lele ẹe.