II Krọnikol 8 - Edo Bible (E Baibol Ẹdo) Version 1996

Emwi Ne Solomọn Ye Obọ Ru

¹ Ikpugie ọ re Solomọn ya bọ Ọgua Osa kevbe ẹguae ẹre.

² Ọ keghi vbe dọlegbe bọlọ avbe ẹvbo ne Hiram ne ọba viọ nẹẹn, ọ na gie ivbi Izrẹl eso ne iran ya yin odọ.

³ Ọ keghi khọn mu otọe Hamat kevbe Zọba.

⁴ Ọ na gbe odin ga ẹvbo ne a tie ẹre Palmira ne ọ rre ato. Ọ keghi dọlegbe bọlọ avbe ẹvbo ne a si evbare koko yi, ni rre Hamat hia.

⁵ E Solomọn keghi dọlegbe bọlọ avbe ẹvbo na hia. Bẹt Horọn ne ọ ke, odọ Bẹt Horọn ne ọ ke otọ, (ena kegha re ẹvbo ne a gbe odin gaa, ne ọ vbe mwẹ urho ne a khui.)

⁶ Ẹvbo ne a tie ẹre Baalat, ẹvbo hia ne ọ viọ emwi ne a hẹ giee yi, kevbe avbe ẹvbo ne ọ viọ avbe ẹsin ẹnrẹn yi. vbene ọ mwamwa ẹn wẹ rẹn gha bọ e Jerusalẹm, erriọ ọ re ọ wa ruẹe, ke Lebanọn kevbe otọe ne ọ khaemwisẹ yan hia.

^7-8 E Solomọn keghi viọ ivbi e Kenan ni ke ẹe vbọ, ne ivbi Izrẹl ma gbele ua ẹghẹ ne iran na khọn ẹvbo nii, ọ keghi ya iran gha winna vbe ne ẹ i na ha osa ne iran. Ena kegha re ivbi e Hiti, Amọri, e Pẹriz, e Hivi kevbe Jebus, ivbi uniẹn iran na hia, eviẹn iran ye khin do sẹ ẹdẹnẹrẹ na.

⁹ A ma ya ivbi Izrẹl winna iwinna ne a i ha osa yi sokpan, iran kegha re ivbiyokuo, ewọe iwinna, iran ni dia ikẹkẹ okuọ ye odẹ, kevbe iran ni hin ẹsin.

¹⁰ Arhin ekigbe siyeha yan uri (250) ọ re a viọ yọ ni gha gbearoghe iwinna ne a ya ẹtin vbe iwegbe mu ọmwa winna nii, iran ke gha winna vbe dọmwadẹ ihẹ owa ne a bọlọ khian.

¹¹ E Solomọn keghi rhie amwẹ ọnrẹn ne ovbi ọba Igipt hin ẹvbo e Devid rre gha rrie owa ne ọ bọ ne ẹẹn. Rẹn keghi kha wẹẹ, “Ọ ma ke ne okhuo ni gha rre ẹguae e Devid ne ọba Izrẹl, rhunmwuda, eheikehe ne Ẹkpẹti Ile rhirhi gha ye, ehe ne ọ huanrẹn ọre nọ.”

¹² E Solomọn keghi zọ ese ghe Nọyaẹnmwa vbe aka ne ọ bọ ye odaro Ọgua Osa.

¹³ Ọ keghi zọ ese ne a tọẹn zẹ vbene Uhi e Mosis mu ẹẹn ye otọ ne dọmwadẹ ẹdẹ ne ọ huanrẹn. Ẹdẹ Ikẹtin, Emwiukpo Uki Ọgbọn, kevbe emwiukpo eha ne a ru ukpukpo, ena ọre Emwiukpo Ebrẹd Nọmahue, Emwiorhọ kevbe Emwiukpo Irhu.

¹⁴ Zẹ vbene Devid ne erha ẹe mwamwa ẹn ye otọ, ọ keghi mwamwa iwinna ẹdẹ ọkpọkpa ọghe avbe ohẹn kevbe avbe Livai ni ru iyobọ ne avbe ohẹn vbe ihuan ne a so kevbe iwinna iran. Ọ keghi vbe mwamwa avbe iran ni khẹ Ọgua Osa ye dọmwadẹ oka ne iran gha ya gha winna iwinna iran vbe dọmwadẹ onurho, zẹ vbene Devid ne ọmwa Osanobua tae.

¹⁵ Emwamwa ne Devid mu ye avbe ohẹn kevbe avbe Livai otọ vbe ekpa avbe aza kevbe avbe emwi ọvbehe, a keghi mu ẹẹn sẹ fẹẹrẹ.

¹⁶ Vbe ẹghẹ ne a kha na, iwinna ne Solomọn viọ obọ yi hia fẹẹrẹ, a winnaẹn fo nẹ. Ke egbe ẹyotọ Ọgua Osa e Nọyaẹnmwa ne a gbe ya sẹ ufomwẹ ubọmwẹ ọnrẹn, iwinna ni hia keghi dunna.

¹⁷ Ẹre Solomọn na gha rrie Eziọngeba kevbe Ẹlat ni rre eghute ni rre ehe ne Ukpẹ oke Akaba ye vbe otọe Idọm.

¹⁸ E Hiram ne ọba keghi viọ okọ la obọ ewọe iwinna rẹn giẹe, ọ na viọ avbe oziguẹ ni guẹ iwinna yọ. Iran keghi gua okọ, iran kevbe ewọe iwinna e Solomọn, iran na gha rrie otọ Ọfa, iran keghi ke odọ viọ igoru ni gberra etọni igoru enẹirrọvbugie gie Solomọn.