II Krọnikol 7 - Edo Bible (E Baibol Ẹdo) Version 1996

A Ya Ọgua Osa Fi Ohan

¹ E Solomọn ne ọba ghi na erhunmwu fo nẹ, erhẹn keghi ke ẹrinmwi rre ọ na giẹn emwi ne a ya zọ ese nii, ẹre awanwan ne ẹ i gie a ghe, ne ọ rhie maa ighẹ e Nọyaẹnmwa rre evba, na vuọn Ọgua Osa.

² Rhunmwuda ne a wanwan ne ẹ i gia ghe na vuọn Ọgua Osa nii, avbe ohẹn ma sẹtin la rọ.

³ Ugbẹn vbe ivbi Izrẹl ghi miẹn erhẹn ne ọ ke ẹrinmwi rre kevbe awanwan ne ọ vuọn Ọgua Osa, iran keghi dele viọ aro rhu otọ vbe ibare, iran ga Osanobua, iran keghi rho ẹre ye umamwẹ ọnrẹn kevbe aho ẹmwẹ ọmwa etẹbitẹ ne ọ mwẹ.

⁴ Ẹre Solomọn kevbe emwa nii hia na zọ ese ghe Nọyaẹnmwa.

⁵ Ọ keghi ya ẹmila arriaisẹn eva yan ugie (22,000) zọ ese, kevbe ohuan arriaisẹn iyehan (120,000), erriọ ọ re rẹn kevbe emwa nii na do ya Ọgua Osa nii fi ohan.

⁶ Avbe ohẹn keghi mudia ye ehe ne a mwamwa ye otọ khẹ iran, avbe Livai keghi mudia viọ aro da iran, iran kegha ye emwi iku kevbe ihuan ne Devid viọ ye otọ gha rho e Nọyaẹnmwa, Iran kevbe gha so ihuan na, “Itohan rẹn i mwẹ ọfo!” zẹ vbe ne Devid ma iran re. Avbe ohẹn kegha kpe okpe vbene emwa nekpa hia na mudia.

⁷ E Solomọn keghi vbe ya ẹghodo adesẹ ne ọ rrọọ fi ohan, ehe ne ọ wa rre odaro Ọgua Osa, ọ na vbe ya emwi ne a wa giẹn ọnrẹn ohoho zọ ese vbe evba, deba ọghe ọka kevbe ẹvbi ne a viọ rre kevbe avbe emwi ne a ya si isara rre. Emwi ne ọ ya ẹe ru vberriọ wẹ Ogiukpo oze ne ọ ru ma kpọlọ sẹ ne ọ gha gua emwi izọ ese na hia.

⁸ E Solomọn kevbe ivbi Izrẹl hia keghi ya ikpẹdẹ ihinrọn ru emwiukpo Irhu, ẹvbo ọrhẹnrhẹn keghi rre, uhin ya sẹ Ada e Hamat ne ọ wa rrei ẹsẹse vbe odẹ okuọ, ke odẹ ekẹn ọghe uwu Igipt.

⁹ Iran keghi ya ikpẹdẹ ihinrọn do ugie ne a ya ye Ọgua Osa fi ohan, iran keghi vbe ya ikpẹdẹ ihinrọn ọvbehe do ugie nii. Vbe ikpẹdẹ ne okiekie, iran keghi do ugie ne a ya khui ẹre uhunmwu.

¹⁰ Vbe ikpẹdẹ ne ọ ghi lele ẹe, ne ọ re ikpẹdẹ ne ogieha yan ugie ọghe uki ne ogihinrọn, e Solomọn keghi zẹ emwa ni urrie. Ọyẹnmwẹ keghi sẹ iran ye afiangbe ne Osanobua rhie ne Izrẹl ne emwa rẹn, e Devid kevbe Solomọn.

Osanobua Dọlegbe Rhie Egbe Maa E Solomọn

¹¹ Ugbẹn vbe Solomọn ghi bọ Ọgua Osa fo nẹ, ke ẹe kevbe ẹguae vbene ọ na wa winna ehia gba sẹ vbene ọ mwamwa ehia.

¹² E Nọyaẹnmwa keghi rhie egbe maa rẹn vbe asọn, ọ keghi tama rẹn wẹẹ, “I Họn erhunmwu ruẹn nẹ, I vbe rhan obọ miẹn Ọgua Osa na, zẹ vbe ehe ne a gha na gha zọ ese ghe mwẹ.

¹³ Ẹghẹ ke ẹghẹ ne I ya wẹ ne amẹ ghẹ rhọ, ra te I gie irhiso do rri emwiokọ, ra te I gie egboghogbogho la uwu ẹbu emwa mwẹ.

¹⁴ Adeghẹ iran na erhunmwu ghe mwẹ, iran na fi uyinmwẹ werriẹ, iran zobọ vbe emwi dan ne iran te ka ru, I gha họn urhu iran vbe ẹrinmwi I ghi ya orukhọ iran bọ iran I ghi dọlegbe ye otọ iran khian ne ọ maa.

¹⁵ I ghi gbe aro ghe Ọgua Osa na, I ghi vbe mu egbe ne I ya họn erhunmwu ne iran na vbe emwa,

¹⁶ rhunmwuda ighẹ mẹ hannọ ẹẹn zẹ nẹ, I na vbe ya ẹe khian ne ọ huanrẹn zẹ vbe ehe ne a gha na gha ga mwẹ ẹdẹdẹmwẹdẹ, I gha gbe aro ghe ẹre, I ghi vbe degue ẹre ẹdẹdẹmwẹdẹ.

¹⁷ U gha ya ẹkoata ga mwẹ zẹ vbene Devid ne erha a ru, u na ya uhi mwẹ ru emwi u na gha ru emwi hia ne I tama ruẹn ne u ru.

¹⁸ I gha mu eyan ne I yan ma erha a sẹ vbene I na tama rẹn wẹ usun uniẹn ivbi ẹre ọ re a gha na gha miẹn ne ọ khaemwisẹ yan Izrẹl ẹdẹdẹmwẹdẹ.

¹⁹ Sokpan adeghẹ a na miẹn vbe ẹghẹ ke ẹghẹ wẹ, wẹ vbe emwa ruẹn rra uhi mwẹ kevbe iyi mwẹ ne I yi ma uwa, wa na ya gha ga ẹbọ ọvbehe.

²⁰ Ẹghẹ nii, I ghi viọ uwa hin otọ ne I te mu ne uwa rre, I ghi lahin Ọgua Osa na rre, ehe ne I mẹ te ya khian ne ọ huanrẹn wẹ evba ni ọ re a gha na gha ga mwẹ. Emwa ghi gha ya ẹe gbogiẹ vbe ehe hia, iran ghi gha zan rẹn.

²¹ “Banbanna nian, emwa hia ọ re ọ ya ọghọ ne Ọgua Osa na, sokpan, ọ gha sẹ ẹghẹ nii, unu ghi yan emwa hia ni rhirhi lae gberra, iran ghi nọ wẹẹ, ‘Vbọzẹ ne Nọyaẹnmwa na ru otọe na kevbe Ọgua Osa rẹn vbenian yi?’

²² Emwa ghi wanniẹn wẹẹ, ‘Rhunmwuda ighẹ iran fi iyeke gbe Nọyaẹnmwa ne Osanobua iran, ne ọ viọ avbe erha iran odede ke Igipt ladian gha dee, iran keghi kpe iku gie ẹbọ ọvbehe, iran na gha ga iran. Ọnii ọ sii ẹe ne Nọyaẹnmwa na gie emwi dan na rruan iran.’ ”