II Krọnikol 6 - Edo Bible (E Baibol Ẹdo) Version 1996

Ẹmwẹ Ne Solomọn Tama Emwa Ni

¹ Ẹre Solomọn ne Ọba na na erhunmwu wẹẹ, “E Nọyaẹnmwa, wẹ ọ re ọ tobọ ruẹ kha wẹ uwu okuku ke ebiebi ọ re u ra gha dia.

² Banbanna, I bọ ọgua osa ọrhẹnrhẹn ne uẹn nẹ, ehe ne u khian gha dia ẹdẹdẹmwẹdẹ.”

³ Emwa Izrẹl hia keghi mudia vbe evba. Ọba keghi fi egbe werriẹ, ọ na nọ erhunmwu afiangbe Osanobua ne iran.

⁴ Ọ wẹẹ, “Wa rho e Nọyaẹnmwa ne Osanobua ọghe Izrẹl! Ọ mu eyan ne ọ yan ma e Devid ne erha mwẹ sẹ, ne ọ na khama rẹn wẹẹ,

⁵ ‘Ke ẹghẹ ne I ya viọ emwa mwẹ ke otọe Igipt ladian do sẹ ebanbanna, I ma hannọ ẹvbo ke ẹvbo zẹ ne I gha bọ ọgua osa mwẹ yi vbe Izrẹl, ehe ne a gha na gha ga mwẹ. I ma vbe zẹ ọmwarhọkpa ne ọ gha re ọkaolotu Izrẹl ne emwa mwẹ.

⁶ Sokpan banbanna nian, I zẹ e Jerusalẹm zẹ vbe ehe ne a gha na gha ga mwẹ kevbe uwẹ ne Devid ne u gha khaemwisẹ yan emwa mwẹ!’ ”

⁷ E Solomọn keghi rhie te ẹe wẹẹ, “E Devid ne erha mwẹ keghi zẹe vbe iro ne irẹn bọ ọgua osa ne a gha na gha ga e Nọyaẹnmwa ne Osanobua ọghe Izrẹl.

⁸ Sokpan, e Nọyaẹnmwa tama rẹn wẹẹ, ‘Iro esi ọ re u zẹe ne u na wẹ u ra bọ ọgua osa mẹ.

⁹ U i ra bọe, sokpan ovbi uẹ, ovbi uẹ vbe ẹko, ọ re ọ gha bọ ọgua osa mwẹ.’

¹⁰ “Banbanna nian, e Nọyaẹnmwa mu eyan rẹn sẹ nẹ, mẹ rriọba Izrẹl lele erha mwẹ, I vbe bọ ọgua osa ne a na gha ga e Nọyaẹnmwa ne Osanobua Izrẹl.

¹¹ I mu Ẹkpẹti Ile nii ye Ọgua Osa nẹ emwi ni rre uwu ẹre ọrọre avbe uhanhan okuta ọghe Ile ne Nọyaẹnmwa gu emwa Izrẹl ta.”

Erhunmwu E Solomọn

¹² E Solomọn keghi sirra emwa ni hia gha rrie odaro Ogiukpo, ọ keghi mudia viọ obọ da odukhunmwu ne ọ na erhunmwu.

¹³ (E Solomọn vbe ya oze ru eteburu ne a mudia yan ọ keghi mu ẹẹn ye adesẹ ẹghodo, ukpọlọmwẹ ọnrẹn kegha re omwa ibata erẹnrẹn vbe igie enenẹ vbe ne ọ na vbe re omwa ibata isẹn vbe uyomwẹ, ọ keghi hin eteburu nii, ọ na diguẹ yọ vbe ehe ne emwa hia gha na gha bẹghe ẹre, ọ keghi viọ obọ da odukhunmwu ne ọ na erhunmwu.)

¹⁴ Ọ keghi na erhunmwu wẹẹ, “E Nọyaẹnmwa ne Osanobua Izrẹl, ẹbọ ne ọ ye vbe ruẹ ẹ i rrọ vbe ẹrinmwi ra vbe agbọn. U mu Ile ne u gu emwa ruẹn ta sẹ, u keghi ho ẹmwẹ iran vbe iran a ye ekhọe iran hia gha họn ẹmwẹ ne uẹn.

¹⁵ U mu eyan ne u yan ma e Devid ne erha mwẹ sẹ, ẹdẹnẹrẹ na nian, ẹmwẹ hia ne a tae vbọ, a mu ẹẹn sẹ nẹ.

¹⁶ Banbanna nian, e Nọyaẹnmwa ne Osanobua Izrẹl, vbe mu eyan nọkpa ne u yan ma erha mwẹ sẹ vbe ne u na tama rẹn wẹ te a gha miẹn wẹ ọkpa vbe uwu ivbi uniẹn ọnrẹn ọ re ọ gha khaemwisẹ yan Izrẹl vbe ẹghẹ hia a dẹghe iran vbe lele uhi ruẹ zẹ vbene irẹn ru.

¹⁷ Rhunmwuda ọnii nian, e Nọyaẹnmwa ne Osanobua Izrẹl, gie emwi hia ne u yan ma e Devid ne ọguọmwadia ruẹ gele sẹ.

¹⁸ “Sokpan, vbene ẹmwata, Osanobua, wẹ gha sẹtin gele yin agbọn na vbe ehe ne ikpia kevbe ikhuo ye ra? Uhin wẹ ẹrinmwi ma kpọlọ sẹ ne ọ gha gua a, vbe Ọgua Osa na ne imẹ bọe gha na gua uwẹ hẹ?

¹⁹ E Nọyaẹnmwa, Osanobua mwẹ, ọguọmwadia ruẹ mẹ khin. Danmwehọ erhunmwu mwẹ ne u vbe ru emwi ne I nọ ruẹn re mẹ.

²⁰ Gha gbe aro ghe Ọgua Osa na asọn kevbe avan. U yan mẹ wẹ emwa na ọ re a gha na gha ga a rhunmwuda ọnii, I gha mu aro da Ọgua Osa na gha na erhunmwu, u ghi họn ọghomwẹ.

²¹ Họn erhunmwu mwẹ kevbe erhunmwu ivbi Izrẹl ne emwa ruẹn vbe iran a mu aro da emwa na na erhunmwu. U ghi họn ọghomwa vbe owa ruẹ vbe ẹrinmwi, ne u yabọ mwa.

²² “A gha ba ọmwa ifi ẹzọ wẹ ọ ru ọmwa ọvbehe emwi ne ọ ma kei, a na mu ẹẹn gha die odaro Ogiukpo vbe Ọgua Osa ruẹ, ne ọ do vẹn ihẹn wẹ rẹn ma rẹn ọkpa, rẹn ma rẹn eva.

²³ E Nọyaẹnmwa, danmwehọ vbe ẹrinmwi, ne u bu ohiẹn eguọmwadia ruẹ. Ru enọ rria abe emwi oya ne ọ maẹn, ne u vbe bu asẹ ne enọ ma rri abe.

²⁴ “A dẹghe obọ eghian ke okhunmwu ne ivbi Izrẹl ne emwa ruẹn vbe okuọ rhunmwuda ighẹ iran rra iyi ruẹ, a dẹghe iran ghi dọlegbe bu ruẹ rre, iran na gha die Ọgua Osa na, iran na ya imuegberriotọ nọ ayabọ vbe obọ ruẹ.

²⁵ Danmwehọ iran vbe ẹrinmwi, ya oru khọ emwa ruẹn bọ iran, ne u vbe dọlegbe viọ iran gha die otọ ne u mu ne iran kevbe avbe erha iran odede.

²⁶ “Deghẹ emwa ruẹn rra iyi ruẹ, u na wẹ ne amẹ ghẹ rhọ, a dẹghe iran ghi fiwerriẹ, iran na mu aro da Ọgua Osa na ya imuegberriotọ na erhunmwu ghe ruẹ.

²⁷ E Nọyaẹnmwa, danmwehọ iran vbe ẹrinmwi, ne u ya orukhọ ivbi Izrẹl ne eguọmwadia ruẹ bọ iran ne u vbe ma iran vbene a ru emwi ne ọ gbae hẹ. Iyeke ọnii, Nọyaẹnmwa, gie amẹ rhọ ye otọe na ne ọ re ọwuẹ, ne uwẹ vbe mu ne emwa ruẹn ne ọ gha re ọghe iran etẹbitẹ.

²⁸ “A dẹghe ukhunmwu ọ re ọ ghi la ẹvbo ra egboghogbogho nọ, ra te emwiokọ hia sohie ra te irhiso rri ọe rua, ra te eghian mu okuọ gie emwa ruẹn, ra dẹghe emianmwẹ nọ ra ohuẹhuẹ vbe uwu emwa ruẹn.

²⁹ U ghi họn erhunmwu iran. A dẹghe ọmwaikọmwa vbe uwu ivbi Izrẹl ne emwa ruẹn miẹn emwi ne ọ da ẹre egbe, ọ na viọ obọ erhunmwu ghe okhunmwu da Ọgua Osa ruẹ na.

³⁰ U ghi họn erhunmwu iran. Danmwehọ iran vbe owa ruẹ vbe ẹrinmwi ne u yabọ iran. Wẹ ọkpa kẹkan ọ re ọ rẹn emwi ne ọmwa mu ro vbe ekhọe. U ghi ru dọmwadẹ ọghe ọe vbene ọ khẹ ke ẹe.

³¹ Ne emwa ruẹn miẹn ehe na gha mu ohan ruẹn, ne iran vbe gha họn ẹmwẹ ne uẹn vbe ẹghẹ hia ne iran gha ya vbe otọe nii ne u mu ne avbe erha mwa odede.

³² “Orhunmwuyẹn ne ọ rre isi ne ọ rrei gha họn otiti ukpọlọmwẹ kevbe iwegbe ruẹ, kevbe vbene u wa zabọ ru emwi hẹ ọ na gha de do na erhunmwu vbe Ọgua Osa na.

³³ Rọn erhunmwu ẹnrẹn. Họn ọghe ọe vbe ẹrinmwi ne u ye, ne u ru emwi ne ọ nọ rẹn ne ẹẹn, ne emwa ne agbọn hia miẹn ehe na rẹn ruẹn, ne iran vbe gha họn ẹmwẹ ruẹn vbene ivbi Izrẹl ne emwa ruẹn ru. Ẹghẹ nii, iran ghi do rẹn wẹ, Ọgua Osa ne I bọe na ọrọre ehe ne a gha na gha ga a.

³⁴ “U gha tama emwa ruẹn ne iran mu okuọ gie eghian iran, iran na na erhunmwu ghe ruẹ vbe ehe ne iran a rhirhi gha ye, iran na mu aro da ẹvbo na ne uwẹ hannọ zẹ, kevbe Ọgua Osa ne I bọe ne uẹn na.

³⁵ Họn erhunmwu iran, họn urhu iran vbe ẹrinmwi, ne u gie obọ iran ke ukhunmwu.

³⁶ “Emwa ruẹn gha rukhọ ghe ruẹ, — a i miẹn ọmwa ne ẹ i ru orukhọ — ighẹ ohu na mu ẹẹn, u na gie obọ eghian iran ke okhunmwu, iran na vbe hẹ iran oghunmwu gha rrie ẹvbo ọvbehe, ọ gha khọn rẹn ne ẹvbo nii wa gha rrei.

³⁷ Họn erhunmwu emwa ruẹn. a dẹghe iran roiro fiekhọewerriẹ iran na na erhunmwu ghe ruẹ iran na miẹn orukhọ iran kue wẹ ẹwobi ne emwa orukhọ ọ re iran khin, u ghi họn erhunmwu iran Nọyaẹnmwa.

³⁸ A dẹghe iran gele roiro fi uyinmwẹ werriẹ vbe ẹkoata ne ọ sẹ otọ ẹko, iran na mu aro da otọ na ne uwẹ mu ne avbe erha mwa odede, ẹvbo na ne uwẹ zẹe kevbe Ọgua Osa na ne I bọ ne uẹn, gha na erhunmwu ghe ruẹ.

³⁹ U ghi họn erhunmwu iran. U ghi họn urhu iran vbe owa ruẹ vbe ẹrinmwi ne u tohan iran, ne u ya orukhọ hia ọghe emwa ruẹn bọ iran.

⁴⁰ “Banbanna nian, Osanobua mwẹ, tọn aro mu ghe ima ne u gha họn erhunmwu ne a na vbe emwa na.

⁴¹ Guakpao nian e Nọyaẹnmwa Osanobua, uwẹ kevbe Ẹkpẹti Ile ne ima ya rẹn ẹtin ruẹn, la uwu Ọgua Osa ne u gha rre evba ni rhinrin ẹdẹ. Fiangbe avbe ohẹn ruẹn vbe emwi ne iran ru hia, ne ọyẹnmwẹ gha sẹ emwa ruẹn hia rhunmwuda ne u na maa ne iran.

⁴² E Nọyaẹnmwa ne Osanobua, ghẹ he ọba ruẹ ne u wẹ zẹe, ya aho ẹmwẹ ọmwa ruẹn ye Devid ne ọguọmwadia ruẹ re.”