II Krọnikol 5 - Edo Bible (E Baibol Ẹdo) Version 1996

¹ E Solomọn ne ọba ghi winna iwinna Ọgua Osa fo nẹ, ọ keghi mwamwa avbe emwi hia ne Devid ne erha ẹe ya fi ohan ne Osanobua ye uwu avbe aza Ọgua Osa, avbe esiliva, igoru kevbe avbe emwi ọvbehe.

A Mu Ẹkpẹti Ile Gha Die Ọgua Osa

² Ẹre Solomọn ne ọba na tie avbe ọkaolotu ọghe dọmwadẹ ẹgbẹe kevbe ẹwae ni rre Izrẹl ne iran do miẹn egbe vbe Jerusalẹm, ne iran do mu Ẹkpẹti Ile e Nọyaẹnmwa ke Zaiọn ne Ẹvbo e Devid gha rrie Ọgua Osa.

³ Iran hia keghi do si egbe koko vbe ẹghẹ Emwiukpo Irhu.

⁴ Avbe ọkaolotu hia ghi si egbe koko nẹ, avbe Livai keghi tọn Ẹkpẹti Ile ni mu.

⁵ Iran na mu ẹẹn gha rrie Ọgua Osa, avbe ohẹn kevbe avbe Livai kevbe mu Owa Ukpọn ne a ya rẹn ighẹ e Nọyaẹnmwa rre evba, kevbe avbe emwi ne a lo vbọ hia gha rrie Ọgua Osa.

⁶ E Solomọn ne ọba kevbe ivbi Izrẹl hia keghi si egbe koko vbe odaro Ẹkpẹti Ile, iran na ya ohuan kevbe ẹmila ni bun zẹ ese — ehia bu sẹrriọ wẹ ẹ i gia ka.

⁷ Ẹre avbe ohẹn na mu Ẹkpẹti Ile e Nọyaẹnmwa la uwu Ọgua Osa, iran keghi ya mu ẹẹn ye Ehe Ne ọ Huan Sẹe Ehia. Vbe ototọ avbe emwi ni zẹ ifuẹn nii.

⁸ Ifuẹn ne iran rhan rẹn keghi degue Ẹkpẹti nii kevbe avbe ọkpọ ne a ya mu ẹẹn.

⁹ Ọmwa ne ọ mudia ye odaro Ehe Ne ọ Huan Sẹe Ehia sẹtin wa bẹghe ukpẹ avbe ọkpọ nii, sokpan, ehe ọvbehe ne a ghi na sẹtin bẹghe ẹre, ẹ i ghi rrọọ. (Avbe ọkpọ ni ye rre evba do sẹ ẹdẹnẹrẹ na.)

¹⁰ Emwi rhọkpa ma vbe gha rre uwu Ẹkpẹti Ile nii gberra uhanhan okuta eva ne Mosis viọ yọ vbe uhunmwu oke Sainai, vbe ẹghẹ ne Nọyaẹnmwa na gu avbe ivbi Izrẹl ta ile vbe iran ke otọe Igipt dee.

Uyi Ọghe Nọyaẹnmwa

^11-14 Avbe ohẹn ni rre evba hia fẹẹrẹ vbe ne a i na vbe lele oka ne iran ye vbọ, keghi wa ya egbe fi ohan. Kevbe avbe Livai ni kpe ẹzi kẹn ighẹ avbe Asaf, e Heman kevbe Jedutun kevbe iran ni rre ẹwae iran hia keghi ya ukpọn eto ovbiohuẹ han an. Avbe Livai keghi sikẹ odẹ ahọ ọghe ogiukpo kevbe iran kevbe isẹ kevbe akpata vbe obọ. Avbe ohẹn iyehan (120) keghi mudia ke iran gha kpe okpe. Iran ni kpe okpe kegha kpe okpe, iran kegha kpe ẹre ye avbe iran ni so ihuan ẹre vbene ọ na wa gua ẹe ro, deba isẹ kevbe avbe emwi ihuan ọvbehe, vbe ne iran na gha rho e Nọyaẹnmwa wẹẹ: “Wa rho e Nọyaẹnmwa, rhunmwuda, rẹn ma an, aho ẹmwẹ ọmwa rẹn, etẹbitẹ nọ.” Avbe ohẹn ghi wa kpao hin uwu Ọgua Osa rre ni, vbe ọwarọkpa, okuku ne wain wain, ne ọ gbe ebiebi ye ọmwa aro, ne ọ re ama ne ọ rhie maa wẹ e Nọyaẹnmwa rre evba keghi wa vuọn rẹn. Iran ma ghi sẹtin gha ru ugamwẹ ni khian.