II Krọnikol 4 - Edo Bible (E Baibol Ẹdo) Version 1996

Emwi Ne A Ya Ru Emwi Vbe Uwu Ọgua Osa

¹ E Solomọn ne Ọba keghi ru Ogiukpo oze, ọ kegha re ibata ọgban vbe igienẹnẹ, uyomwẹ ọnrẹn kegha re ibata ekesugie.

² Ọ keghi vbe ru ẹgbẹdin ne ọ lẹga ọghe oze, ibata ihinrọn vbe ukhiọnmwẹ vbe udinmwimwẹ mwẹ, ibata ekesugie vbe uvbẹmwẹ kevbe ibata isẹn yan iyeva vbe ọlẹga.

³ A keghi mu ona ọgbagba eva lẹga ehọ ẹre vbe iyeke ẹre ighẹ ẹgbẹdin nii, ọkpa kegha rre odukhunmwu enọkpa. Emwi ne a ya munọ ona yọ na kegha re ama ẹkhuia ẹmila ne a sa ginna ẹgbẹdin nii.

⁴ A keghi mu ẹgbẹdin nii yan ẹkhuia ẹmila iweva iyeke, ehia keghi viọ aro da ore.

⁵ Zẹ vbe ne emwi ne a ya ru ẹgbẹdin na mwẹ imi sẹ kegha re akhuẹn obọ eha. Ehọ ẹre kevbe yevbe ehọ ukpu, ọ na vbokho egbe ghe iyeke zẹ vbe obobo ne ọ rhan nẹ. Ẹgbẹdin nii keghi gua omwa egalọn arriaisẹn ekesugie (15,000).

⁶ Iran keghi vbe ru igarawa igbe, a na wẹ ne a viọ isẹn ye odẹ ekẹn Ọgua Osa kevbe isẹn nekpa ye odẹ okuọ. Enii ọre a wẹ ne a ya gha kpe avbe emiowo ne a wẹ ne a giẹn uan zẹ vbe ese ne a zọ re. Amẹ ne ọ rre ẹgbẹdin nọkhua ni ọ re a wẹ ne avbe ohẹn ya gha khuẹ.

^7-8 Iran keghi ru erhan ọmukpa igoru igbe zẹ vbe ne a ka ya ru ẹe dee yi kevbe eteburu igbe. Iran keghi viọ ẹre ye ọgua nọkhua vbe uwu Ọgua Osa, erhan ọmukpa isẹn kevbe eteburu isẹn vbe obọ na kevbe obọ nọkpa. Iran kevbe ru ọkpan igoru iyisẹn.

⁹ Iran keghi ru ẹghodo uwowa ne avbe ohẹn, kevbe ẹghodo ore, a keghi ya oze rhu avbe ẹkhu ni rre ẹkpo avbe ẹghodo ni.

¹⁰ A keghi mu ẹgbẹdin ni ye okhiẹ ne ọ rre ẹkpo ekẹn kevbe orrie vbe Ọgua Osa.

^11-16 E Huram keghi vbe ru avbe akhe, ovbẹvbẹ kevbe ọkpan. Emwi hia ne ọ wa tama e Solomọn ighẹ rẹn gha ru ye uwu Ọgua Osa, ọ keghi wa ru ehia gba: Orrẹ ne eva Ehe ne ọ mwẹ imi vbe uhunmwu avbe orrẹ ni ne ọ ye vbe ọkpan Avbe ọgiọrọ ne a do ẹre ọrhiowẹlowẹ ya mu ona ye avbe orre ọkpọkpa, ikpẹrọnmwọ oze arriaeva ne a mwamwa ẹre uviẹn eva ya mu ona ye ẹzi orrẹ nii Avbe okotọ igbe Avbe igarawa igbe Ẹgbẹdin nii Avbe ẹkhuia ẹmila iweva ne a mu ẹgbẹdin nii yan Avbe akhe, ovbẹvbẹ kevbe ekuiyẹ, oyiya E Huram ne ọkaoiwinna keghi ya oze ne a kpe ru avbe emwi na hia zẹ vbene Solomọn ne ọba tama rẹn, ne a miẹn gha lo vbe Ọgua Osa e Nọyaẹnmwa.

¹⁷ Ọba keghi wẹ ne a ru avbe emwi na hia vbe ọgua ogun ne ọ rre ẹkpo e Sukọt kevbe Zẹrẹda vbe Iya e Jọdan.

¹⁸ Avbe emwi ne a ru keghi bun sẹrriọ wẹ ọmwa rhọkpa, ma ghi mwa inu oze ne a loro, vbene ọ khua sẹhẹ.

¹⁹ E Solomọn ne ọba na vbe wẹ ne a ya igoru ru avbe emwi ne a ya te Ọgua Osa, Ogiukpo kevbe eteburu ne a viọ ebrẹd ne a ya yo imuohan gie Osa ye.

²⁰ Avbe erhan ọmukpa kevbe avbe ukpa igoru ne a ra gha rhu ye odaro Ehe Ne ọ Huan Sẹe Ehia, zẹ vbe ne a mwamwa ẹn.

²¹ Avbe obobo ne a ya te ẹre, avbe ukpa kevbe awan,

²² emwi ne a ya dọ ukpa yọ, avbe ọkpan ne a viọ eturari yi, kevbe avbe ọkpan ne wẹwẹrhẹ ne a ya wan erhẹn. Igoru ne a ma gua ọ re a ya ru avbe emwi na hia. avbe ẹkhu ore ni rre Ọgua Osa kevbe avbe ẹkhu ni rre Ehe Ne ọ Huan Sẹe Ehia, igoru ọ re a ya rhu ehia.