II Krọnikol 12 - Edo Bible (E Baibol Ẹdo) Version 1996

Igipt Mu Okuo Gha die Juda

¹ Ugbẹn vbe ẹkun e Rehoboam ghi se otọ nẹ vbe ẹkete, rẹn kevbe emwa rẹn hia keghi he uhi e Nọyaẹnmwa ye otọ.

² Ọ ghi rre ukpo ne ogisẹn ne Rehoboam rriọba, a keghi rri iran oya ye ẹmwẹ ne iran ma na ghi rhie egbe mu e Nọyaẹnmwa. E Sisiak ne ọba Igipt na mu okuọ gha die Jerusalẹm.

³ Ke ẹe kevbe ivbiyokuo ne arria ehan (1,200) ni hin ikẹkẹ okuọ, arriaisẹn iyeha (60,000) keghi hin ẹsin, deba ivbiyokuo kẹkan ne a i sẹtin ka vbe uwu ne ivbiyokuo e Libya ye, kevbe ọghe Suk kevbe ọghe Sudan.

⁴ Ọ keghi khọn munọ avbe ẹvbo ne a gbe odin gaa vbe Juda ọ kegha die Jerusalẹm.

⁵ E Siemaia ne akhasẹ keghi bu e Rehoboam ne ọba kevbe avbe olotu e Juda ni lẹ fe Sisiak gha die Jerusalẹm, ọ tama iran wẹẹ, “Uhunmwu ne Nọyaẹnmwa gie gie uwa ọ re ọ na khin: ‘Wa fi iyeke gbe mwẹ nẹ, banbanna nian, mẹ vbe sẹ uwa rae ne Sisiak.’ ”

⁶ Ọba kevbe avbe ekaolotu ni keghi miẹnkue wẹ iran ru orukhọ, iran keghi kha wẹẹ, “Emwi ne Nọyaẹnmwa ru na, ọ ru ẹe ẹse.”

⁷ Ugbẹn vbe Nọyaẹnmwa ghi miẹn ọna, ọ keghi dọlegbe gu e Siemaia guan wẹẹ, “Rhunmwuda ne iran na miẹn orukhọ iran kue na, I i gha fuẹn iran uan.

⁸ Sokpan, e Sisiak gha dekun iran, egbe ire egbe ne iran gha ya miẹn uhunmwu. Obọ ohu mwẹ i ra ghi da Jerusalẹm gbe. Sokpan e Sisiak gha khọn iran, iran ghi do rẹn alughaẹn ne ọ rre a ga mwẹ kevbe a ga iran ni rriegie vbe agbọn.”

⁹ E Sisiak ne ọba kegha die Jerusalẹm, ọ na silo emwi ighobioye vbe Ọgua Osa kevbe ẹguae. Ọ keghi viọ emwi hia, ya sẹ egbe asa igoru ne Solomọn ru.

¹⁰ E Rehoboam keghi ru avbe asa oze viọ ye ihẹ iran. Ọ keghi viọ ne emwa ni khẹ onurho viọ mwẹ.

¹¹ Ẹghẹ ke ẹghẹ ne ọba a ya ye Ọgua Osa, avbe ni khẹ onurho ghi hẹ ọre gha khian, iran ghi vbe dọlegbe do hẹ iran ye owa ọkhẹ.

¹² Rhunmwuda ne ọ na mu egbe rriotọ ne Nọyaẹnmwa, ohu e Nọyaẹnmwa ma wa fuẹn ọnrẹn fo, emwi kevbe gha maa ne Juda.

Arriọba E Rehoboam

¹³ E Rehoboam rriọba vbe Jerusalẹm, ọ keghi rhie ba ẹtin ne ọ mwẹ zẹ vbe ọba. Ukpo ọkpa yan iyeva ọ re ọ gha ye vbe ọ rriọba, ọ keghi ya ukpo ehairrọvbugie vbe ẹkete vbe Jerusalẹm, ehe ne Nọyaẹnmwa zẹe vbe otọe ẹvbo Izrẹl wẹ evba nii ọ re a gha na gha ga irẹn. e Naama ọ re a tie iye Rehoboam, otọe ẹvbo ne a tie ẹre Amọn ọ re ọ ke rre.

¹⁴ Emwi dan ọ re ọ ru rhunmwuda, ọ ma zẹdẹ gbẹn odẹ ghe iho e Nọyaẹnmwa.

¹⁵ Iwinna ne Rehoboam winnaẹn, kevbe emwi ne a gbẹnnẹ ye otọ vbe ekpa uniẹn ọnrẹn, a gha miẹn ehia vbe Okha Ọghe Siemaia Ne Akhasẹ kevbe Ebe Okha Ọghe Ido Ne Akhasẹ. Ẹghẹ hia ọre Rehoboam kevbe Jeroboam ya gha gu egbe khọn.

¹⁶ E Rehoboam keghi wu, a na re ẹre ye idin avbe ọba vbe Ẹvbo e Devid. Abija ne ovbi ẹre keghi rriọba lele ẹe.