II Krọnikol 11 - Edo Bible (E Baibol Ẹdo) Version 1996

Ẹmwẹ Akhasẹ Ne Siemaia Tae

¹ E Rehoboam ne ọba ghi sẹ Jerusalẹm, ọ keghi tie avbe ivbiyokuo arriaisẹn iyihinrin (180,000) ni maa sẹ vbe Bẹnjamin kevbe Juda si koko ọ te wẹ rẹn ra khọn okuọ ne ọ dọlegbe viọ avbe ẹwae ni rre odẹ okuọ Izrẹl ne iran do gha ga gie irẹn,

² sokpan, e Nọyaẹnmwa tama e Siemaia ne akhasẹ.

³ Ne ọ ya tama e Rehoboam kevbe emwa ẹwae Bẹnjamin kevbe Juda wẹẹ,

⁴ “Wa ghẹ mu okuọ gie ivbi Izrẹl ne ihua uwa. Wa gha rrie owa. Wa hia fẹẹrẹ. Emwi ne ọ sunu na, vbene I ho ẹre yi nọ.” Iran keghi họn ẹmwẹ ne Nọyaẹnmwa tae, iran ma ghi yo ya gu e Jeroboam gbinna.

E Rehoboam Gba Odin Ga Ẹvbo

⁵ E Rehoboam kegha rre Jerusalẹm, ọ na wẹ ne a gba odin ga avbe ẹvbo na vbe Juda, kevbe Bẹnjamin.

⁶ E Bẹtlẹhẹm, Etam, e Tẹkoa,

⁷ e Bẹtzọ, e Soko, Adulam,

⁸ e Gat, e Maresia, e Zif,

⁹ Adoreim, e Lakis, Azẹka,

¹⁰ e Zora, Aijalọn kevbe Hibrọn.

¹¹ Ọ keghi gba odin ne ọ wegbe ga iran, ọ na vbe zẹlẹ ne ọdakha ọkpọkpa ye ehia, ọ na vbe ru ẹe ne a gha viọ evbare gie iran, ofigbọn oliv kevbe ayọn.

¹² Deba asa kevbe asoro. Odẹ vbenian, ọ keghi ru ẹe ne Juda kevbe Bẹnjamin gha rre ototọ irẹn.

Avbe Ohẹn Kevbe Livai Si Gha Die Judah

¹³ Avbe ohẹn kevbe Livai na si kpao vbe otọe Izrẹl hia rre gha die Juda.

¹⁴ Avbe Livai keghi sẹ otọ ne aranmwẹ na rria iran rae, iran kegha die Juda kevbe Jerusalẹm rhunmwuda, e Jeroboam ne ọba Izrẹl kevbe iran ni rriọba lele ẹe ma gie iran winna zẹ vbe ohẹn e Nọyaẹnmwa.

¹⁵ E Jeroboam keghi ma avbe ohẹn ọghe ọe ne iran ya gha winna vbe aro ẹbọ enigẹbọ, kevbe ne iran gha ga avbe orhiọn esu kevbe avbe ẹbọ ne ọ mannọ ẹn zẹ vbe ama ẹkhuia ẹmila.

¹⁶ Emwa hia ni ho ne iran ye ekhọe ẹmwata ga e Nọyaẹnmwa ne Osanobua ọghe Izrẹl keghi ke dọmwadẹ ẹwae ni rre Izrẹl lele avbe Livai gha die Jerusalẹm ne iran miẹn ehe na gha zẹ ese ghe Nọyaẹnmwa ne Osanobua avbe erha iran odede.

¹⁷ Ọna keghi ye arriọba e Juda ya owẹ muotọ. Vbe ikpiia gbalaka, iran mudia ye Rehoboam ne ovbi e Solomọn iyeke, iran kegha yin zẹ vbene iran gha ru vbe ẹghẹ e Devid kevbe Solomọn ne ọba.

Ẹgbẹe Rehoboam

¹⁸ E Rehoboam keghi rhie Mahalat ne ovbi e Jerimot ne ovbi e Devid rọnmwẹ, iye ẹe ighẹ nene okhuo kevbe gha re Abihẹl ne ovbi Eliab kevbe eyẹ e Jese nọkhua.

¹⁹ Iran na biẹlẹ emọ ikpia eha, ena ọ re Jeus, e Siemaria kevbe Zaham.

²⁰ Vbe okiekie, ọ keghi rhie Maaka ne ovbi Absalọm ne okhuo, iran na biẹlẹ emọ ikpia, enẹ, ena ọre Abija, Atai, Ziza kevbe Sielomit.

²¹ Inu ikhuo ne Rehoboam gha mwẹ hia kegha re evairrọvbugie ọ keghi vbe zẹlẹ ọse iyeha, ọ keghi biẹlẹ emọ ikpia evairrọvbe ọgban kevbe emọ ikhuo iyeha. Ikhuo ne ọ viọ ye owa kevbe avbe ọse ne ọ zẹlẹ ye ore, Maaka ọre ọ gha re amwebọ ne ọ rrọọ.

²² Ovbi okhuo nii ne okpia ne a tie ẹre Abija, ọ re ọ vbe ho ẹmwẹ ọnrẹn sẹ vbe uwu ivbi ẹre nekpa hia, ọ na vbe zẹẹ ọe wẹ rẹn ọre ọ ghae rriọba lele irẹn.

²³ E Rehoboam keghi ya ẹwaẹn viọ ivbi ẹre ne ikpia hia ye ukpo ọdakha, ọ na gha iran lele avbe ẹvbo ne a gbe odin gaa vbe Juda kevbe Bẹnjamin. Ọ kegha viọ emwi ne iran ẹsẹse. Ọ na vbe viọ ikhuo ni bun ne iran.