II Krọnikol 10 - Edo Bible (E Baibol Ẹdo) Version 1996

Avbe Ẹwae Ni Rre Odẹ Okuọ Sọtẹ

¹ E Rehoboam kegha rrie Siẹkẹm, ehe ne ivbi Izrẹl na si koko ne iran do ma ẹre ọba.

² Ugbẹn vbe Jeroboam ne ovbi e Nebat ne ọ lẹ gha rrie Igipt ne ọ miẹn ehe na lẹfe vbe obọ e Solomọn ghi họn ẹmwẹ na, ọ keghi werriegbe gha die owa.

³ Avbe ẹwae ni rre odẹ okuọ keghi gie ne a tie ẹre, iran hia na gba bu a Rehoboam gha khian, iran tama rẹn wẹẹ,

⁴ “Ihẹ nọkhua ọre erha a kun yan ima, u gha gie ihẹ na hogha, u na gie egbe rọkhọ ima sẹ ọnii, ma gha ya ekhọe hia ga a.”

⁵ E Rehoboam keghi wanniẹn wẹẹ, “Wa rhie ikpẹdẹ eha mẹ ya roro ẹmwẹ na. Iyeke ọnii, wa ghi dọlegbe gha dee.” Ẹre iran na gele kpao.

⁶ E Rehoboam ne ọba keghi mu ẹmwẹ na ma avbe eniwanrẹn, iran ni gha gu e Solomọn ne erha ẹe zẹ iro wẹẹ, “De ewanniẹn ne uwa wẹ ne I rhie ne iran na?”

⁷ Iran wanniẹn tama rẹn wẹẹ, “Adeghẹ u ya obọ esi mu iran na, u gha ru emwi ne ọ yẹ iran, u na rhie ewanniẹn ne ọ la ehọ ne iran, iran gha ya ekhọe ẹmwata ga a vbe ẹghẹ hia.”

⁸ Sokpan rẹn ma rhie ibude avbe eniwanrẹn, sokpan, ọ keghi bu avbe igbama ne iran gha wan kugbe, ni ghi vbe re emwa ni guẹe zẹ iro.

⁹ Ọ keghi nọ iran wẹẹ, “Vbe i a gha ru emwi na hẹ? Vbe i a gha khama emwa ni wẹ ne I ya ihẹ iran khian ne ọ hogha?”

¹⁰ Iran keghi wanniẹn wẹẹ, “Vbene u gha tama iran ọ re ọna khin. Ikpinhianbọ mwẹ nekherhe kpọlọ sẹ ẹkun erha mwẹ.

¹¹ Erha mwẹ kun ihẹ ne ọ khua ne uwa mu, me gha ru ẹe ne ọ khua sẹ ọnii, asan ọ re ọ ya gbele uwa, sokpan ekoboko ọ re I ra ya mama uwa.”

¹² Vbe iyeke ikpẹdẹ eha, e Jeroboam kevbe avbe emwa nii hia keghi bu e Rehoboam gha dee, zẹ vbene ọ tama iran.

¹³ Ọba keghi wa mu ude ne avbe eniwanrẹn bu ẹre re fua, ọ na zaro mu emwa ni,

¹⁴ zẹ vbene avbe igbama wẹ ne ọ ru ẹe. Ọ keghi kha wẹẹ, “Erha mwẹ kun ihẹ ne ọ khua yan uwa, mẹ gha ru ẹe ne ọ khua sẹ ọnii, asan ọ re ọ ya gbele uwa, ekoboko ọre I ra ya mama uwa.”

¹⁵ Ihọ ọghe Nọyaẹnmwa Osanobua nọ ne ọ mu ẹẹn sẹ ighẹ ẹmwẹ ne ọ la unu Ahija ne akhasẹ, ovbi e Silo tama e Jeroboam ne ovbi e Nebat. Onii ọ si ẹe ne ọba ma na zẹ ye emwa ni re.

¹⁶ Emwa ni ghi miẹn wẹ ọba ma zẹdẹ zẹ ye iran re, iran keghi datu wẹ, wa sẹ e Devid kevbe ẹgbẹe ọ re rae. De emwi ne iran he ru ne ima ẹdẹ yi? Wa gie ima gha rrie o ivbi Izrẹl! Ne Rehoboam gha do ọghe enegbe ẹre khian. Erriọ ọre ivbi Izrẹl na sọtẹ.

¹⁷ Iran na kpao sẹ Rehoboam rae ne ọ ya gha rriọba iran ni rre otọ e Juda ọkpa!

¹⁸ Ẹre Rehoboam ne ọba na gie Adoniram ne ọ gbearoghe emwa ne a munọ ẹn ya gha winna, ne ọ bu ivbi Izrẹl gha khian, sokpan iran keghi filo okuta gbe ẹe rua. Ọ ghi họn ẹmwẹ na, e Rehoboam keghi zẹgiẹgiẹ hin ikẹkẹ okuọ ẹre, ọ na lẹfua gha rrie Jerusalẹm.

¹⁹ Ke ẹghẹ ni gha dee, emwa ni rre odẹ okuọ otọe arriọba Izrẹl, te iran sọtẹ uniẹn ivbiọba ọghe Devid.