II Krọnikol 1 - Edo Bible (E Baibol Ẹdo) Version 1996

E Solomọn Ne Ọba, Nọ Ẹwaẹn Vbe Erhunmwu

¹ Obọ e Solomọn ne ovbi e Devid ne ọba keghi gba otọe arriọba Izrẹl, e Nọyaẹnmwa ne Osanobua keghi wa fiangbe ẹe, ọ keghi ya ẹe gha mwẹ ẹtin ẹsẹse.

² E Solomọn ne ọba keghi yi iyi ne avbe ekaolotu ni gbearoghe arriaisẹn kevbe arhin iyisẹn, avbe ewọe arriọba hia, avbe ọkaẹgbẹe hia kevbe emwa ni dekẹe hia,

³ ọ na wẹ ne iran lele irẹn gha rrie owa ugamwẹ ne ọ rre Gibiọn. Iran kegha rrie evba rhunmwuda evba nii ọ re a mu Owa Ukpọn ne a ya rẹn wẹ e Nọyaẹnmwa rre evba, ne Mosis ne ọguọmwadia e Nọyaẹnmwa ru vbe otọ ẹgbo, yi.

⁴ (Sokpan Ẹkpẹti Ile ne ọ rrọọ kegha rre Jerusalẹm a keghi mu ẹẹn ye owa ukpọn ne Devid ne ọba bọe vbe ọ mu ẹẹn ke kirriat Jearim rre.)

⁵ Aka oze ne Bezalẹl ne ovbi Uri kevbe eyẹ Họ ru, kevbe gha rre Gibiọn vbe odaro Owa Ukpọn ne a ya rẹn wẹ e Nọyaẹnmwa rre evba. E Solomọn ne Ọba kevbe avbe emwa nii keghi ru ugamwẹ e Nọyaẹnmwa vbe evba.

⁶ Ọba keghi ga e Nọyaẹnmwa vbe ne ọ na gbele emwi izọese vbe uhunmwu aka oze nii, ọ keghi gbele ifi emwi arriaisẹn ọ na vbe giẹn eso ikun ẹnrẹn hia vbe uhunmwu nene aka.

⁷ E Nọyaẹnmwa keghi rhie egbe maa e Solomọn vbe asọn nii, ọ nọ rẹn wẹẹ, “De emwi ne u gha ho ne I rhie ne uẹn?”

⁸ E Solomọn keghi wanniẹn wẹẹ, “Ẹghẹ hia ọ re u ya rhie maa ighẹ u ho ẹmwẹ e Devid ne erha mwẹ ẹsẹse. Banbanna nian u gunmwẹ sẹtin rriọba lele ẹe.

⁹ E Nọyaẹnmwa ne Osanobua, mu emwi ne u yan ma erha mwẹ sẹ. U ya mwẹ rriọba emwa ni bun vbenian nẹ, emwa ne a i sẹtin ka zẹ vbene iran ghi bun sẹ.

¹⁰ Rhunmwuda ọnii, rhie ẹwaẹn kevbe irẹnmwi ne I gha sẹtin ya gha khaemwisẹ yan iran mẹ. A dẹghe ẹ i re vberriọ, vbe i a gha sẹtin ya rriọba emwa ruẹn na ni bun sẹrriọ hẹ?”

¹¹ Osanobua keghi zẹ mwẹ wanniẹn e Solomọn wẹẹ, “U guara zẹ nẹ. Ne u gha na te nọ ẹfe ra emwi ẹwe ra usi ra uwu avbe eghian ruẹn, ra ne a kue kha wẹ ẹdẹ agbọn nọtaẹn ọghe uwẹ, u keghi nọ irẹnmwi kevbe ẹwaẹn ne u sẹtin gha khaemwisẹ yan emwa mwẹ ne I ya uwẹ rriọba yan.

¹² I gha rhie ẹwaẹn kevbe irẹnmwi ne uẹn. Ye vbe deba ọnii, I gha rhie ẹfe, emwi ẹwe kevbe usi ne uẹn sẹẹ ne ọbakọba he ka gha mwẹ vbe ẹghẹ ne ọ gberra ra ne iran gha vbe mwẹ vbe ẹdẹ ne ọ dee.”

Ẹtin Kevbe Ẹfe Solomọn

¹³ Ẹre Solomọn na kpao vbe owa ugamwẹ ne ọ rre Gibiọn rre, ehe ne Owa Ukpọn ne a ya rẹn wẹ e Nọyaẹnmwa rre evba ye, ọ na gha die Jerusalẹm. Evba ọ re ọ na gha kha yan Izrẹl.

¹⁴ Ọ keghi si ivbiyokuo koko, ọ kegha mwẹ ikẹkẹ okuọ uri eva yan arriaisẹn (1,400) kevbe ẹsin igbinna arriaisẹn iweva (12,000). Ọ keghi viọ eso vbọ ye Jerusalẹm, ọ na viọ nekpa lele ihẹ ughughan vbe ẹvbo ọvbehe.

¹⁵ Vbe ẹghẹ ọ re esiliva kevbe igoru keghi kpọkua vbe Jerusalẹm vbene okuta ye, erhan sida keghi gba ehe hia zẹ vbe erhan sikamọ vbe ototọ oke Juda.

¹⁶ Ọba kegha mwẹ emwa ni gbearoghe vbene a viọ ẹsin kevbe Musri ke Silisia rre hẹ.

¹⁷ Kevbe vbene a viọ ikẹkẹ okuọ ke Igipt rre hẹ, iran kegha viọ avbe ikẹkẹ okuọ kevbe ẹsin gie ẹẹ, avbe ọba e Hiti kevbe Siria, iran kegha khiẹn nẹ ikẹkẹ okuọ ọkpọkpa esiliva uri eha (600), kevbe ẹsin ọkpọkpa, esiliva ekigbesiyeha yan iyisẹn (150).