II Kọrinti 4 - Edo Bible (E Baibol Ẹdo) Version 1996

Emwi Ighobioye Orhiọn Ne Ọ Rre Uwu Akhe Obuẹ

¹ Te Osanobua, vbe uwu itohan rẹn wa iwinna na ne ima, rhunmwuda ọnii, ẹtin i fo mwa.

² Ma ghi ban emwi ẹkhokho kevbe emwi ekhue hia ye efẹn ọkpa, ma i ya erẹrẹ ru emwi, ra ne a gha ya ẹmwẹ Osanobua khian ohoghe. Vbe uwu uwanmwẹ ne ọwa mu otọ fo ọghe ẹmwata, ma ghi gha yin vbe odaro Osanobua, ma ghi gha hia ne a rhie egbe mwa ye egbe ihe ne ekhọe emwa hia gha na gha ta ẹmwẹ ima ne ọ maa.

³ Rhunmwuda, a deghẹ iyẹn ne ọ maa ne ima kpe orhu ẹre, re emwi ne a rhie lẹre, obọ iran ni ra fuan ọre ọ na re emwi ne a rhie lẹre.

⁴ Iran ma yayi, rhunmwuda ẹbọ dan ọghe agbọn na mu ekhọe iran dee ye uwu ebiebi nẹ. Ọ ma gie iran bẹghe uwanmwẹ ne ọ wan mu iran, uwanmwẹ ne ọ ke Iyẹn Ne ọ maa vbe ekpa uyi Kristi rre, ọmwa ne ọ re ama ne a ya gie Osanobua dandaandan.

⁵ Rhunmwuda, ẹ i re egbe ima ma kpe orhu ẹre, ma kpe orhu Jesu Kristi zẹ vbe Nọyaẹnmwa, kevbe ima tobọ mwa zẹ vbe eguọmwadia uwa vbe ekpa Jesu.

⁶ Osanobua ne ọ kha re wẹẹ, “Uwanmwẹ gha wan ke uwu ebiebi ladian,” ọre ọ vbe wan uwanmwẹ ọnrẹn ye ima ekhọe, ne ọ rhie uwanmwẹ ọghe a rẹn uyi Osanobua ne ima, zẹ vbe ne ọ wan ladian vbe ugbaro Kristi.

⁷ Sevba, ma ni mwẹ emwi ighobioye orhiọn na, te ima yevbe akhe kẹkan ne a ya obuẹ ma, ne a miẹn ehe na rhie ma wẹ, ẹtin ne ọ sẹ ehia, ọghe Osanobua nọ, ighẹ ẹ i re ọghe ọmwa.

⁸ Ẹghẹ hia ọre a ya rueghe mwa, sokpan a ma rẹnkhẹn mwa an, ma zẹdia bi iro eva, sokpan iro ma han mwa.

⁹ Eghian wa bun ẹsẹse, sokpan ma i re ne ẹ i mwẹ ọse, a rhe fian ima ẹwẹn nọ da ugbẹnso, sokpan a ma miẹn ima uhunmwu.

¹⁰ Ẹghẹ hia ma ya dada uwu e Jesu khian vbe egbe ne ọ sẹtin wu ọghomwa na, ne a miẹn ehe na vbe gha dẹghe uyinmwẹ ọghọe vbe egbe mwa.

¹¹ Vbe ẹdẹ agbọn mwa hia, ma rhie uhunmwu da uwu, rhunmwuda Jesu, ne arrọọ ọghọe miẹn ehe na rhie egbe maa vbe egbe ne ọ sẹtin wu ọghe ima na.

¹² Ọna rhie maa wẹ, uwu winna vbe uwu ima, sokpan arrọọ winna vbe uwu uwa.

¹³ Ebe kha re wẹ, “I guan rẹn rhunmwuda ighẹ iyayi.” Vbe uwu ekhọe iyayi vberriọ, ma vbe guan rhunmwuda ighẹ ma yayi.

¹⁴ Rhunmwuda ma rẹnrẹn wẹ, Osanobua ne ọ huẹn Nọyaẹnmwa Jesu ye agbọn, gha vbe huẹn ima kpaegbe ba Jesu. Ọ ghi viọ ima kevbe uwa gha die odaro irẹn.

¹⁵ Rhunmwuda uwa ọre ena hia khin, zẹ vbene ẹsọhẹ Osanobua ya sẹ egbe emwa ni bun, erriọ iran gha vbe ya gha na erhunmwu sẹ ayọ ba ekpọnmwẹ ne uyi Osanobua.

Ne A Gha Rrọọ Vbe Ekpa Iyayi

¹⁶ Ọna ọre ọ si ẹe ne ẹtin i na fo mwa. A gha rhe miẹn wẹ ikinnegbe mwa heko wiẹghua khian, sokpan, orhiọn mwa ghi gha khian ọgbọn yọ ẹdẹgbegbe.

¹⁷ Ọlọghọmwa kherhe ne ọ rhie gberra khian ne ima ye na, gha rhie uyi nọkhua ọghe etẹbitẹ ne ọ kpọlọ sẹ ọlọghọmwa na ẹsẹse gie ima.

¹⁸ Rhunmwuda, ẹ i re emwi ne a dẹghe ma rhie aro daa, sokpan avbe emwi ne a i dẹghe nọ. Emwi ne a sẹtin dẹghe, ovbi ẹghẹ kherhe ọre ọ ya vbe otọ, sokpan emwi ne a i dẹghe ọre ọ rrọ ẹdẹdẹmwẹdẹ.